Kinsa si Jesu-Kristo?

Niining panahona sa tuig diha sa daghang kayutaan sa tibuok kalibotan, ang Pasko ginasaulog. Ginatos ka milyong tawo nagtuo nga si Jesu-Kristo natawo sa Disyembre 25 mga 2,000 ka tuig kanhi. Diha sa mga dibuho ug mga eskultura, lainlain ang paglarawan kaniya ingong masuso diha sa pasungan. Apan, sa pagkamatuod, siya midako sa pagkahamtong ug nabuhi sa yuta sulod sa 33 1/2 ka tuig.

NAHIBULONG ka ba sukad bahin sa pisikal nga panagway ni Jesus sa dihang hamtong na siya? Unsa ang iyang pamanit? Siya ba maskulado ug ambongan, o siya ba luyahon ug maorag masakitong tan-awon, ingon sa paglarawan kaniya sa nagkalainlaing mga tigdibuho latas sa kasiglohan? Siya ba walay bungot o bungoton? Taas ba ang iyang buhok?

Usab, si Jesus ba nagasidlak sa pagkabalaan, sama sa silaw diha sa ibabaw sa iyang ulo ingon sa pagdibuho kaniya sa pipila ka tigdibuho? O lahi ba gayod ang tinuod​—nga siya walay ingon niana nga lahi nga panagway apan sama ra sa mga tawo?

Ang sekular nga mga magsusulat sa kasaysayan ug mga tigdibuho nagpadayag ug nagkasumpaking mga hunahuna latas sa kasiglohan labot sa panagway ni Jesus. Dugang pa, ang kasaligang mga timaan gitagana sa mga asoy sa nakakita mismo kaniya nga gisulat sa mga magsusulat sa Bibliya nga nabuhi sa unang siglo ug nakauban niya.

Apan, ang mosunod mao ang labawng hinungdanong mga pangutana kay sa kon unsay iyang hitsura: Kinsa ba gayod si Jesu-Kristo? Unsang papel ang iyang gidula diha sa katuyoan sa Diyos? Natuman ba niya kanang papela? Unsa siya karon, ug hain man siya? Siya ba adunay katungdanan nga hinungdanon kaayo nga makaapektar sa tanang katawhan, bisan sa daghan nga nangamatay na?

Una, atong susihon ang ebidensiya mahitungod sa panagway ni Jesus. Unsay iyang hitsura?