Kinsay Mohinlo sa Atong Yuta?

“AKO nagtagna nga sa tuig 2025 ang pulong nga ‘polusyon’ halos dili na gayod hisgotan sa atong nasod may kalabotan sa atong industriya.” Mao kana ang di pa dugayng panagna nga gihimo sa presidente sa usa ka korporasyon sa kemikal. Nagtuo ka ba nga mahitabo kana? Kon mao, sa unsang paagi kana makab-ot?

Ang tinguha nga mokita mao ang kasagarang nagpasiugda sa pagpamaligya sa dili hilwas nga mga produkto. Pananglitan, ang mga balaod sa pagkatinago sa pamatigayon nagtugot sa mga kompaniya sa igpapatay ug dangan sa paghupot nga tinago sa pipila ka dagkog kita nga mga pormula pinaagi sa paghubit sa mga sangkap niini ingong “dili-aktibo,” usa ka termino nga dali rang sabton ingong “dili-makadaot.” Bisan pa niana, “labing menos 394 ka dili-aktibong mga sangkap ang gigamit ingong aktibong mga igpapatay ug dangan,” nagtaho ang magasing Chemical Week. Niini nga mga sangkap, 209 ang peligrosong mga hugaw, 21 ang opisyal nga giklasipikar ingong makakanser, ug 127 ang peligroso diha sa trabahoan!

Tinuod, ang mga kontrol sa kahilwas sa mga gobyerno kasagarang mapuslanon. Apan ang pangunang interes sa mga gobyerno, matod sa usa ka magsusulat, mao ang “pagtubo sa ekonomiya ug pagganansiya sa industriya.” Busa, sila kanunayng nag-atubang sa pagtimbangtimbang​—mga risgo batok mga benepisyo. Sa sukaranan, ang resulta maoy ‘kontroladong polusyon.’

Busa asa kita modangop alang sa mga solusyon? Usa sa mga Saksi ni Jehova misukna niining pangutanaha ngadto sa usa ka mahigalaong tagbalay. Nagpahayag ug pagsalig sa tawhanong mga lider ug mga siyentipiko, ang tawo mitubag: “Ila ra unyang tul-iron ang mga butang ngadtongadto.”

“Apan kinsa sila?” nangutana ang Saksi. “Dili ba sila maoy mga tawo nga sama kanimo ug kanako? Lagmit mas edukado sila, apan duna silay mga limitasyon, ilang mga kahuyangan. Sila masayop.” Idugang niini ang kadako sa mga problema nga ilang giatubang maingon man ang kadalo ug korapsiyon diha sa tawhanong katilingban.

Nagtuo ka ba usab nga sila magtul-id sa mga butang? Ang taas nga kasaysayan sa kapakyasan sa tawo sa paghimo niana dili makapukaw ug pagsalig. Ang magasing Outdoor Life nag-ingon: “Ang mga siyentipiko ug ang ilang mga ahensiya labi pa gayong hanas sa pagtuon mahitungod sa mga suliran sa polusyon kay sa pagsulbad niana.” Unsay mga kalaoman nga ang mga tawo makasulbad niining ugdang nga mga suliran?

Ang mga Tawo ba Makahimo Niana sa Ilang Kaugalingon?

Ang pagkontrolar sa kemikal nga polusyon dili lamang suliran sa lokal nga mga awtoridad. Tungod kini kay ang mga kemikal nga gigamit sa usa ka nasod nag-apektar sa mga tawo sa silingang mga nasod, bisan sa mga tawo sa tibuok yuta! Ug ang mga tawo wala molampos sa pagpakigkooperar sa pagsulbad sa maong mga suliran sa kalibotan. Ang Bibliya nagpakita kon ngano sa dihang kini nag-ingon: “Ang tawo nagamando sa tawo sa iyang ikadaot.” (Ecclesiastes 8:9) Nganong dili-malamposon ang mga tawo sa pagmando sa ilang kaugalingon? Sa makausa pa, ang Bibliya nagpatin-aw: “Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Unsay buot ipasabot niana?

Kana nagpasabot nga dili katuyoan nga ang mga tawo magmando sa ilang kaugalingon nga walay pagtultol sa Diyos. Tinuod, ang mga tawo nakahimog talagsaong mga butang​—sila nakatukod ug maanindot kaayong mga puy-anan, nakagamag batid-pagkahimong mga kasangkapan, nakabiyahe pa gani ngadto sa bulan​—apan wala silay katakos sa pagmando sa ilang kaugalingon nga walay paggiya sa Diyos. Mao kanay gitudlo sa Bibliya, ug ang kasaysayan nagpamatuod sa katukma sa Bibliya.

Usa ka Nahinloang Yuta​—Sa Unsang Paagi?

Ang atong Maglalalang, si Jehova nga Diyos, kanunayng nabalaka sa katawhan ug niining yutaa, nga iyang giandam alang sa tawo. Human niya lalanga ang mga tawo, siya nagsugo nga ilang atimanon ang yuta ug ang kinabuhi ibabaw niana. (Genesis 1:27, 28; 2:15) Sa ulahi, human mosupak ang unang magtiayon sa iyang mga sugo, mihatag siyag mga instruksiyon ngadto sa nasod sa karaang Israel mahitungod sa pag-atiman sa yuta, lakip sa kinahanglanon nga dili kini tamnan sulod sa bug-os nga usa ka tuig matag pito ka tuig. Nagtugot kini niini nga maulian. (Exodo 23:11; Levitico 25:4-6) Apan ang katawhan nahimong hakog ug misupak sa Diyos. Sila ug ang yuta nag-antos.

Siyempre, ang kemikal nga polusyon sama sa atong nabatonan karon dili posible niadtong panahona. Bisan pa niana, ang yuta nadaot tungod kay ang mga Israelinhon napakyas sa pagpapahulay niana sumala sa katuyoan sa Diyos, ug ang inosenteng mga tawo maoy nag-antos. Busa gitugotan sa Diyos ang mga Babilonyanhon sa pagparot sa Israel ug pagbihag sa nasod ngadto sa Babilonya sulod sa 70 ka tuig. Kini nga silot nagtugot usab sa yuta sa pagpahulay aron kini maulian.​—Levitico 26:27, 28, 34, 35, 43; 2 Cronicas 36:20, 21.

Kining maong kasaysayan nagtudlo kanato nga ang mga tawo dunay tulubagon sa Diyos tungod sa ilang gibuhat ngadto sa yuta. (Roma 15:4) Sa pagkatinuod, ang Diyos nagsaad nga iyang ‘pagalaglagon ang nagalaglag sa yuta.’ (Pinadayag 11:18) Hinungdanon, ang Bibliya naghubit sa matang sa mga tawo nga nakaamot niining maong ‘paglaglag.’ Ang ilang kasagarang mga taras, sumala sa gilista diha sa Bibliya sa 2 Timoteo 3:1-5, naglakip sa pagkalinga sa salapi ug kaugalingon hangtod sa punto nga dili na kaayo magtagad sa Diyos ug, sa pagpasangkad, alang sa iyang linalang, lakip sa mga isigkatawo.

Busa kining duha ka teksto sa Bibliya​—2 Timoteo 3:1-5 ug Pinadayag 11:18​—nagpunting sa duha ka lig-ong mga konklusyon. Una, ang hugaw nga mga hunahuna motultol ngadto sa hugaw nga yuta. Ug ikaduha, ang Diyos manginlabot aron sa pagluwas niining planetaha ug sa mahinadlokon-sa-Diyos nga mga tawo sa dihang ang duha ka matang sa polusyon mahimong grabe na kaayo. Sa unsang paagi manginlabot ang Diyos?

Pinaagi sa iyang manalagnang si Daniel, ang Diyos nagtagna: “Sa mga adlaw nianang mga haria [dayag nagtumong sa mga gobyerno karon] ang Diyos sa langit magatukod ug usa ka gingharian nga . . . magadugmok ug magalaglag niining tanang gingharian, ug kini magpabilin sa panahong walay tino.” (Daniel 2:44) Kanang maong Gingharian maoy tinuod nga gobyerno sa kalibotan. Si Jesu-Kristo nagtudlo sa iyang mga sumusunod sa pag-ampo alang nianang maong gobyerno sa dihang siya miingon: “Busa, kinahanglang mag-ampo kamo niining paagiha: ‘Amahan namo sa mga langit, . . . paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.”​—Mateo 6:9, 10.

Ubos sa mahigugmaong pagdumala sa Gingharian sa Diyos, ang mga saop sa yuta makapahimulos sa talagsaong pribilehiyo sa paghimo sa tibuok planeta nga paraiso. Ang hangin mahimong hinlo ug makapahimuot, ang mga sapa mahimong lunsay, ug modaghan sa yuta ang wala-mahugawing linalang. (Salmo 72:16; Isaias 35:1-​10; Lucas 23:43) Human niana, ang Bibliya nagsaad: “Ang kanhing mga butang [mga sakit, pag-antos, polusyon, ug daghang ubang mga suliran karon] dili na pagahinumdoman pa, ni mosantop pa kini sa kasingkasing.”​—Isaias 65:17.

[Hulagway sa panid 10]

Usa ka hininloang yuta​—buhi ka pa ba unya aron makita kana?