Mga Tanom Batok Polusyon

ANG pagkuha sa mga hugaw gikan sa nahugawang yuta ug tubig maoy dugay, mahal, ug sagad lisod nga trabaho. Apan, ang ordinaryong mga tanom napamatud-ang may katakos sa paghimo sa trabaho nga silasila ra.

Ang mga siyentipiko naghunahuna sa paggamit sa ordinaryong pondweed ug kumintang sa paghinlo sa karaang mga dapit sa hinagiban ug pagpabalik sa maayong kahimtang sa yuta. Diha sa mga eksperimento, ang gihinloang parrot feather ug kumintang maayo kaayong mokuhag TNT nga sulod sa usa ka semana walay timailhan sa pabuto nga nagpabilin diha sa mga tisyu sa mga tanom, ni ang pagsunog niini nagpahinabog pagbuto! Ang ubang tigdukiduki nakadiskobre nga ang mga selula ug mga duga sa ordinaryong sugar beet makasuyop ug makadugta sa nitroglycerin.

Komosta na man ang tubig nga nahugawan pag-ayo sa radyoaktibidad? Ang mga mirasol morag makatabang. Ang mga mirasol nga may unom-ka-semanang pangedaron gigamit sa pagsulbad sa suliran sa hugawng tubig diha sa giabandonar nga pabrika sa uranium sa Ohio, T.B.A. Ang resulta? Ang kontaminasyon sa uranium nakunhoran gikan sa aberids nga 200 ka mikrogramo matag litro ngadto sa ubos sa limitasyon sa pagkahilwas nga 20 ka mikrogramo matag litro. Ang ubang mga pagsusi, sa reaktor sa Chernobyl, duol sa Kiev, nagpakitang ang mga mirasol mosuyop ug 95 porsiyento sa radyoaktibong strontium ug cesium sulod sa napulo ka adlaw!

Ang mga mag-uuma sa di madugay tingalig mogamit na sa yellow iris ug bulrush sa ilang paningkamot sa paglikay nga mahugawan ang mga sapa sa mga pamatay sa dangan ug mga pamatay sa sagbot. Kini nga proseso sa paghinlo mahimo sa panguna sa mga mikrobyo diha sa mga sistema sa gamot sa mga tanom nga modugta sa mga hugaw ug mohinlo sa tubig.

Ang mga pananglitan sa ibabaw nag-ilustrar sa kahibulongang katakos sa yuta sa paghinlo sa kaugalingon niini.