Ang Paglaom nga Gitanyag sa Tinuod nga Relihiyon

KINAIYAHAN na nato nga gustong maghisgot bahin sa mga butang may kalabotan kanato o makapainteres kanato. Mao kini ang usa ka katarongan kon nganong ang mga Saksi ni Jehova malipay sa pagpaambit sa katingalahang mensahe sa Bibliya ngadto sa uban. Kanang maong mensahe, nga nagpasiugda sa Gingharian sa Diyos, naundan sa mga tubag sa mga pangutana bahin sa mga butang may kalabotan gayod sa mga tawo karon, sama sa umaabot, kasegurohan, panglawas, ug kalipay.—Lucas 4:43.

Apan una, unsa ang Gingharian sa Diyos?

Usa ka Makapadasig nga Paglaom

Ang Gingharian sa Diyos maoy usa ka kagamhanan sa Diyos nga pagamandoan sa iyang Anak, ang “Prinsipe sa Pakigdait.” Ang Bibliya nag-ingon bahin kaniya: “Alang kanato ang usa ka bata natawo, alang kanato usa ka anak nga lalaki gihatag; ug ang pagmando ingong prinsipe igapatong sa iyang abaga. Ug ang iyang ngalan pagatawgong . . . Prinsipe sa Pakigdait. Sa kadagaya sa pagmando ingong prinsipe ug sa pakigdait walay kataposan.”—Isaias 9:6, 7.

Sa magtan-aw sa halayo pa nga umaabot, oo, sa atong kaugalingong yugto sa kasaysayan uban sa mga magmamando niini, laing tagna sa Bibliya nagtagna: “Sa mga adlaw niadtong mga haria ang Diyos sa langit magatukod ug usa ka gingharian nga dili gayod malumpag. . . . Kini magadugmok ug magaut-ot sa tanan niining mga gingharian, ug kini magabarog sa walay kataposan.”—Daniel 2:44.

Kining Gingharian sa Diyos, nga pagamandoan ni Kristo, ang Prinsipe sa Pakigdait, magatuman sa pag-ampo nga gitudlo ni Jesus sa iyang mga sumusunod sa pag-ampo, nga mao: “Amahan namo sa mga langit . . . , paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” (Mateo 6:9, 10) Unsay kahulogan niini alang sa yuta ug alang kanato sa dihang moabot na ang Gingharian sa Diyos? Palandonga ang mosunod nga mga saad nga gisaad ni Jehova nga Diyos mismo, sumala sa gisulat sa Bibliya. Ang pipila niini giilustrar niining panira.

Usa ka Mensahe nga Gikan sa Diyos

Ang katingalahang mga saad nga makaplagan diha sa Pulong sa Diyos dili gayod angay itago, ug kini magdala kanato ug balik bahin sa panaghisgot sa relihiyon. Si Jesus nagtagna nga una pa moabot ang kataposan sa presenteng sistema sa mga butang, ang iyang mga sumusunod manguna sa paghimog lakang sa pagsangyaw sa Gingharian sa Diyos: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.”—Mateo 24:14; 28:19, 20; Buhat 1:8.

Kining mensahe bahin sa Gingharian sa Diyos mao ang ginasangyaw sa mga Saksi ni Jehova sa tibuok-kalibotan. Ang kaubang magasin niini, Ang Bantayanang Torre, gipatik sa 130 ka pinulongan, ug diha sa hapin sa matag usa sa kapin sa 22 ka milyong kopya nga ginapatik sa matag gula mao ang mga pulong “Nagapahayag sa Gingharian ni Jehova.”

Ingong tawong maalamon, ikaw buot mohimog may-kahibalo nga desisyon bahin sa imong kinabuhi. (Proverbio 18:13) Busa, ikaw personal namong gidapit sa pagkakat-on ug dugang pa bahin sa mahimayaong Gingharian sa Diyos ug kon unsay kahulogan niini alang kanimo. Alang niini, ayaw ipinig ang imong kaugalingon gikan sa paghisgot sa Bibliya. Wala nay laing panaghisgot ang labawng makahatag ug impormasyon, makapaikag, ug hinungdanon.—Juan 17:3.

[Kahon/Mga hulagway sa panid 8, 9]

Mga Saad sa Usa ka Paraisong Yuta

Bug-os nga pakigdait molukop sa yuta. “Sa iyang mga adlaw molambo ang matarong, ug ang kadagaya sa pakigdait hangtod ang bulan mahanaw.”—Salmo 72:7, 8.

Bisan ang mga patay pagabanhawon. “Aduna unyay pagkabanhaw sa mga matarong ug sa mga dili-matarong.”—Buhat 24:15.

Hingpit nga panglawas tagamtamon sa walay kataposan. “Pahiran [sa Diyos] ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa.”—Pinadayag 21:3, 4.

Ang mga tawo magatukod ug magapuyo sa ilang kaugalingong mga balay. “Sila magtukod ug mga balay ug magpuyo niini; ug sila mananom ug kaparasan ug magakaon sa bunga niini.”—Isaias 65:21.

Dagaya unya ang pagkaon. “Aduna unyay daghang lugas sa yuta; sa ibabaw sa kabukiran adunay pag-awas.”—Salmo 72:16.