Gikan sa Among mga Magbabasa

Pagkontrolar sa mga “Phobia” Samtang akong gibasa ang mga artikulo bahin sa mga phobia (Hulyo 22, 1998), gibati kong daw dunay usa ka makapahupayng bukton nga miagbay kanako. Sa kataposan, dunay nakasabot sa tinuod-kinabuhing kahadlok nga giantos sa akong asawa sa tibuok niyang kinabuhi. Ang social phobia nagsakit kaniya sa hilabihan. Wala gayod ako sa bug-os makasabot kon unsay iyang giantos. Ang iyang grabeng kahadlok sa pagsulti diha sa publiko, paggamit sa telepono, pagpakiglabot sa uban, maingon man ang iyang pagkawala-sa-kaugalingon ug mga atake sa kalisang—kining tanang mga simtoma gihubit sa inyong mga artikulo. Kadto maorag ang tanang piraso sa jigsaw puzzle nahusay. Nasaypan gayod pagsabot sa daghang tawo ang kalisang ug kakuyaw nga giantos sa akong asawa ug nag-isip niini ingong binastos o batok-sosyal nga batasan. Akong laoman nga ilang basahon kining maayo kaayo nga mga artikulo.

M. C., Scotland

Ang akong anak lalaki, nga diyes anyos lamang, gidayagnos nga may agoraphobia sayosayo niining tuiga. Lisod kaayo kadto nga pakigbisog. Dunay duha ka butang nga giangayan nako pag-ayo sa artikulo. Ang una mao ang seksiyong “Mga Tawo nga ‘May mga Pagbating Sama sa Atoa.’” Nakatabang gayod kini sa akong anak lalaki sa pagsabot nga wala siya mag-inusara. Ang ikaduha mao ang mahunahunaong paagi sa pagsulat sa mga artikulo. Wala kini maghukom o magpakamenos, kondili kini gisulat uban ang gugma, kalulot, kaalam, ug dugang pang gugma.

K. J., Australia

Giisip ko nga mapuslanon kining mga artikuloha sanglit nagtagad kini kon unsay mahimo sa usa ka tawo. Inyong gisaysay ang paninugdang mga tikang aron posibleng makontrolar ang mga phobia. Nagtabang kini kanako sa pagbati nga akong mabatonan ang tabang nga akong gikinahanglan ug mouswag.

J. I., Hapon

Kadto ang unang higayon nga ako mibating nasabtan. Dili ko mahubit kon unsa ka makapahupay ang pagkasayod nga si Jehova makasabot sa pag-antos nga ikapahinabo sa social phobia. Ang mga artikulo nakatabang usab sa akong mga higala nga masabtan pag dugang kon unsay akong kahimtang.

G. O., Alemanya

Nahingangha ako sa empatiya nga inyong gipakita alang niadtong, sama kanako, nag-antos sa mga social phobia. Kining mga artikuloha mao gayod ang gikinahanglan. Dakong kadasig ang gihatag niini kanako sa pagkasayod nga ang uban adunay samang suliran! Andam na ako sa pag-atubang ug sa pagpukgo niini nga phobia.

S. D., Italya

Nganong Dili Ako Makasentro sa Pagtagad? Mihilak ako sa kalipay sa gibasa ko ang artikulong “Mga Batan-on Nangutana . . . Nganong Dili Ako Makasentro sa Pagtagad?” (Hulyo 22, 1998) Ako 18 anyos ug nag-alagad diha sa bug-os-panahong ministeryo. Nabalaka ako tungod kay dili ako makasentro sa pagtagad, ug hinungdanon kini aron makatabang sa mga tawo diha sa ministeryo sa kanataran. Mibati akog kaguol tungod kay dili ako makahinumdom ug makaanalisar sa mga butang. Tinuod, sumala sa giingon sa Bibliya, nga si Jehova magtaganag pagkaon sa hustong panahon.

A. R. C. R., Tinipong Bansa

Mga Sugyot Alang sa mga Biyahedor Usa ka sugyot nga wala diha sa “Mga Sugyot Alang sa mga Biyahedor,” sa artikulong “Dengge—Ang Hilanat Gumikan sa Pinaakan” (Hulyo 22, 1998), mao ang pagmosketiro inigkagabii, ilabina kanang naesprihan ug pamatay sa insekto.

I. H., Inglaterra

Among giapresyar ang mga komento sa magbabasa. Aron masanta ang malarya, kining sugyota makatabang gayod. (Tan-awa ang “Pagmata!” sa Hulyo 22, 1997, panid 31.) Apan, sumala sa U.S. Centers for Disease Control, ang lamok nga makapahilanat ug dengge “mopalabi pagpaak sa mga tawo inigmaadlaw.” Kini kasagarang mopaak “sa buntag sulod sa daghang oras human sa banagbanag ug sa kilumkilom sulod sa daghang oras una pa mongitngit.” Busa, ang pagmosketiro inigkagabii tingali dili kaayo epektibo sa pagpugong niining partikular nga sakit.—ED.