Sa Unsang Paagi ang “Passionflower” Nakabaton sa Ngalan Niini?
UNSANG matang sa passion ang among gipunting? Dayag nga dili ang romantikong passion o kailibgon.
Ang estorya mao nga balik sa ika-16 nga siglo, ang Romano Katolikong mga pari maoy naghatag niining tanoma sa ngalan niini. Matod pa nila nga ang ubang mga bahin sa bulak nagpahinumdom kanila sa pasyon, o pag-antos, ug kamatayon ni Jesu-Kristo. Tan-awa pag-ayo ang ilustrasyon aron sa ingon imong masabtan ang ilang kahubitan. Sila miingon nga ang lima ka gihay ug lima ka samag-gihay nga mga sepal sa bulak nagrepresentar sa napulo ka matinumanong mga apostoles nga miunong kang Kristo panahon sa iyang pag-antos. (Gituyo nilang wala ilakip si Judas, ang mabudhion, ug si Pedro, kinsa milimod kang Kristo tulo ka beses.) Nakita gani nila ang korona sa mga tunok ni Kristo diha sa samag-buhok nga mga ray o rayosrayos ibabaw sa mga gihay. Ang lima ka stamen (laki nga naggamag-malo nga mga siwilsiwil) nagrepresentar sa ginaingong lima ka samad ni Kristo. Ang tulo ka style, nga nanuybo ibabaw sa binhianan sa tanom, dunay samag-butones nga stigma diha sa tumoy, nga samag dakog-ulong lansang. Kini ginaingong nagrepresentar sa mga lansang nga gigamit sa pagpatay kang Jesus. Kadtong mga paria klarong may maayo kaayog imahinasyon!
Sa dihang ilang nakit-an kining matahom nga bulak, kini nanubo diha sa gitawag nato karon nga Latin Amerika. Karon kini gikultibar sa daghang bahin sa kalibotan, apil sa daghang botanikong mga hardin. Ang diametro niini nagkalainlain gikan sa tunga sa pulgada ngadto sa unom ka pulgada, ug nagkalidadis ang mga kolor niini.
Dunay duolan sa 400 ka espisye sa mga passionflower, nga kinaiyanhong nanubo sa init nga mga lugar sa kalibotan. Ang uban niini mamungag makaon nga bunga nga mahimong aslom-aslom ug diyutay o tam-is kaayo. Kining prutasa magamit sa paghimog juice, marmalade, ug bisan ice cream. Ang dagkong granadilla (laing matang sa passion flower) morag bantiyong ug porma ug motimbang ug tulog tunga ka kilo.
Sama sa imo nang nasabtan, dunay labaw pa sa bulak kay sa dagway lamang niini. Ug dunay duolan sa 250,000 ka espisye sa mga angiosperm o mamulak nga mga tanom! Karon aniay ulohan alang sa estudyanteng mahigugmaon sa pagkultibar ug mamulak nga mga tanom.
[Diagram sa panid 24]
(Alang sa aktuwal nga pagkahan-ay, tan-awa ang publikasyon)
SEPAL
RAY
GIHAY
STYLE
STAMEN