Paggamit ug mga Hagdan—Naghimo Ka ba Niining mga Pagsusi sa Kahilwas?
Sinulat sa koresponsal sa Pagmata! sa Irlandia
KINAHANGLANG ilisan ni Paul ang bombilya sa suga sa gawas sa iyang balay. Kinahanglan usab niyang limpiyohan ang gawas nga bahin sa mga bentana sa taas—ang iyang asawa naghisgot niini sa makadaghan. Apan si Paul nagsigeg oktaba niining mga trabahoa. Ngano man? Tungod kay kinahanglang mogamit siya ug hagdan.
Makataronganon ang iyang kahadlok. Nahibalo siya nga ang mga aksidenteng may kalabotan sa mga hagdan makapahinabog grabe, makamatay pa gani, nga mga kadaot. Kini sagad mahitabo tungod kay ang nagtrabaho wala maghunahuna pag-ayo kon sa unsang paagi gamiton ang hagdan sa hustong paagi.
Una pa niya sugdan kining maong mga tahas, unsay kinahanglang konsiderahon ni Paul mahitungod sa mga hagdan? Aniay napulo ka sugyot nga nakatabang kaniya sa pagbuhat sa mga butang sa hilwas nga paagi.
Hilwas ba ang Hagdan?
1 Kuhaa ang angayang hagdan. Basin mokab-ot ka pag-ayo kon ang hagdan mubo ra kaayo. Basin kinahanglang ibutang nimo kini sa peligrosong anggulo kon kini taas ra kaayo. Likayi ang paggamit ug stepladder, o mapilopilo nga tungtonganan, aron sa pagsaka sa imong lawak sa kisame. Taori ug haom nga hagdan ang imong lawak sa kisame, o gamita ang hagdan nga isandig.
2 Susiha pag-ayo ang imong hagdan. Gipondo ba kini sa gawas? Ang kahoy nga mga hagdan modako kon mabasa ug mokupos kon mauga. Ngadtongadto, ang mga ang-ang molugak, nga maghimo sa hagdan nga huyang. Duna bay mga kahoy nga ang ang-ang nangliki, o may timailhan ba kini nga nagabok na? Kasagaran, dunay metal nga nagpalig-on sa ilalom sa matag kahoy nga ang-ang. Kini ba anaa sa hustong dapit ug maayong pagkataod? Ang mga tornilyo ba o mga rematse nga gigamit sa pagtaod sa mga ang-ang nga metal ngadto sa tanos nga bahin sa hagdan nabali o gitay-an? Ang mas dagko nga mga sumpay nga hagdan duna tingaliy mga moton ug mga pisi. Hapsay ba ang paglihok sa mga moton? Ang pisi duna bay mga timailhan sa kagabok, ug igo ba ang gitas-on niini? Himoa dayon ang tanang pag-ayo o pag-ilis.
Ang mga ang-ang sagad dunay mga tudling nga gipahaom niana nga mosanta sa pagkadakin-as. Seguroa nga kuhaon ang bisan unsang hugaw nga natigom na tingali diha sa mga tudling. Ang tanang hagdan kinahanglang dunay mga haklap diha sa tumbanan nga mosanta sa pagkadakin-as. Susiha nga anaa kini ug dili hilabihan ka gisi.
3 Ikarga ang mga hagdan sa hilwas nga paagi. Sa sakyanan, itaod pag-ayo ang hagdan ngadto sa angayan nga butanganan sa hagdan, o igaid kana sa usa ka treyler sa labing menos duha ka bahin. Ang taas nga hagdan mahimong magbitay sa likod sa sakyanan, busa paghigot ug bulobandera nga pasidaan sa tumoy aron sayon ra kining makita sa nagsunod.
Labing hilwas kon duha ka tawo ang magdala sa taas nga hagdan. Apan kon kinahanglang dad-on nimo kini nga walay katabang ug gusto nimong dad-on kini nga pinahigda, ipalusot ang usa ka bukton sa tungatunga sa hagdan ug ipatong kini sa imong abaga, nga naggamit sa laing kamot aron mahuptang timbang kini. Aron dili makaigo ug tawo, ipataas ang atubangang tumoy saylo sa ulo. Apan, hinumdomi nga parehas ra ang gitas-on sa hagdan sa imong likod ug sa atubangan! Ang mga komedya morag naghimong kataw-anan sa dihang ang mga tawo maigo sa hagdan. Apan, sa tinuoray dili gayod kini makapahimuot—ilabina kon ikaw ang nasakitan.
Kon dad-on nimong pinatindog ang hagdan, pas-ana kini, nga naggamit sa usa ka kamot sa pagkupot sa ubos nga bahin niini ug ang laing kamot, nga nagkupot sa bahin sa hagdan nga lapas sa abaga, aron mahuptang timbang kini. Pagbantay sa mga alambre, mga suga, ug mga karatula sa ibabaw!
4 Ipahimutang ang hagdan sa hustong paagi. Alang sa kahilwas, ang hagdan kinahanglang dili magtakilid ug kinahanglang gipahimutang sa anggulo nga 75 grado gikan sa salog.
5 Lig-oni ang tumoy ug ubos sa hagdan. Bantayi kon hain nimo idapat ang tumoy sa hagdan. Tinoa nga ang tumoy nga bahin nga gisandigan sa hagdan lig-on ug dili dangog. Ayaw gayod isandig ang hagdan sa bildo o plastik. Kon posible, ihigot kini pag-ayo sa usa ka taoranan, nga ang tumoy sa hagdan molapas ug mga 1 ka metros sa dapit nga gisandigan sa hagdan diha sa bungbong.
Ilabinang tagdon nga sa unang pagkatkat nimo sa hagdan, imo kining ihigot sa tumoy. Kanang unang pagkatkat dili luwas, ug mao man usab ang kataposan, sa dihang manaog ka human kana matangtang gikan sa ibabaw. Aron himoong mas hilwas ang una ug kataposang pagkatkat, pakupti sa lain ang hagdan diha sa ubos niini samtang mokatkat ka. Apan, epektibo lamang kini kon ang gitas-on sa hagdan dili molapas sa mga lima ka metros.
Kon ang yuta naghandag gikan sa tinukod, pagbutang ug usa ka butang nga bug-at diha sa ubos sa hagdan o paghigot ug mas ubos nga ang-ang sa usa ka taoranan. Kon ang yuta dili patag apan bantok, paggamit ug kalso aron mahimong lebel. Butangi ug tabla o usa ka butang nga susama niana aron himoong lig-on ang ubos sa hagdan kon ang yuta humok o dili bantok.
Kon mogamit ka ug stepladder, seguroa nga ang tanang upat ka tiil niini lig-ong nagbarog sa yuta, nga ang duha ka seksiyon magkabulag ug ang bisan unsang kaw-it alang sa kahilwas gitaod.
Hilwas Ka Ba?
6 Susiha ang imong mga sapatos. Sa dili ka pa mokatkat ug hagdan, seguroa nga ang mga lapalapa sa imong sapatos uga. Kuhaa ang bisan unsa, sama sa lapok, nga makapadakin-as kanimo.
7 Mag-amping sa pagdala sa mga butang. Aron magamit sa pagkatkat ang duha ka kamot, kon posible, dad-a ang mga himan diha sa butanganan nga gitaod sa bakos. Sulayi pagpangita ug kapuling mga paagi sa pag-alsa sa lisod dad-ong mga butang, apan kon kinahanglang mogamit ka ug hagdan, kanunayng ikupot sa hagdan ang imong kamot nga walay dala pinaagi sa pagpadailos niana sa kilid sa hagdan samtang nagkatkat ka. Paghinayhinay ug magmasistematiko, ug ayaw pagdalidali.
Kon mogamit ka ug de-koryenteng mga himan, ayaw gayod gamita ang duha ka kamot sa pagpaandar niana. Pananglitan, ang usa ka barina sa wala damha moungot o mabuhian, nga magpahinabo kanimong mawad-an sa imong panimbang ug mahulog. Ayaw gayod kana pasagding nag-andar kanunay; basin mahulog kini samtang nag-andar.
8 Magmahunahunaon sa uban. Kon nagtrabaho ka sa publikong dapit, himoang dali rang makit-an ang hagdan ug, kon posible, alihi kinig pisi. Kon imong ibalhin ang hagdan nga moliko ug eskina, hibaloi nga ang uban dili magdahom niini. Singgit ug mahigalaong pasidaan, ug susiha kon walay tawo ang agianan.
Kon dala nimo ang mga himan diha sa hagdan, hinumdomi nga bisan ang usa ka gamay nga distornilyador makapahinabog kadaot sa dihang mahulog. Kon kinahanglang molakaw ka tungod sa usa ka hinungdan ug wala nimo ikahigot pag-ayo ang hagdan, pabantayi ug laing tawo, o pahigdaa ang hagdan sa hilwas nga paagi hangtod mobalik ka. Ayawg biyai kana nga walay nagbantay.
9 Susiha ang kahimtang sa imong panglawas. Sanglit ang pagkatkat sa dakong bahin nagkinahanglag panimbang ug kompas, ayaw pagkatkat kon naglain ang imong pamati o kasukaon o nagliponglipong ka.
10 Katkat sa hilwas nga paagi. Sa tanang panahon, magmahunahunaon sa kahilwas. Ayaw gayod tugoti ang duha o kapin pang mga tawo nga mokatkat sa hagdan sa samang higayon. Ayaw gayod pagkatkat kon kusog ang hangin. Ayaw gayod pagtindog sa kinaibabwang ang-ang sa stepladder o saylo sa ikaupat nga ang-ang gikan sa ibabaw sa usa ka taas nga hagdan. Ayaw gayod pasobrahi pagpataas ang sumpay sa hagdan; himoa kanunay nga labing menos tulo ka ang-ang ang magsaylob. Ayaw gayod pagkab-ot ug layo kaayo. Kon mokab-ot ka ug layo kaayo samtang anaa sa hagdan, dali ka rang mawad-an sa panimbang ug mahulog. Inay kay mameligrong masamdan, ibalhin ang hagdan, bisan pag nagkahulogan kini ug mas taas nga panahon sa paghimo sa trabaho. Sa dihang nagkatkat, tan-aw ug deretso sa unahan.
Bisan unsang mga panagana ang imong himoon, kanunay gayong dunay mga kapeligrohan kon mogamit ka ug hagdan. Basin mamenosan nimo kini sa tabang niini nga mga sugyot. Kini nakatabang kang Paul. Pinaagi sa pagsunod niini, siya hilwas nga nakataod ug bag-ong bombilya sa suga sa gawas. Ug ang paglimpiyo sa bentana? Aw, himoon niya kana sa laing panahon . . . tingali!
[Mga hulagway sa panid 22, 23]
1 Kuhaa ang angayang hagdan
2 Susiha pag-ayo ang imong hagdan
3 Ikarga ang mga hagdan sa hilwas nga paagi
4 Ipahimutang ang hagdan sa hustong paagi
5 Lig-oni ang tumoy ug ubos sa hagdan
6 Susiha ang imong mga sapatos
7 Mag-amping sa pagdala sa mga butang
8 Magmahunahunaon sa uban
9 Susiha ang kahimtang sa imong panglawas
10 Katkat sa hilwas nga paagi