Gikan sa Among mga Magbabasa
Dili Batok-Hudiyo Salamat sa inyong pag-angkon sa mga butang nga inyong gibasolang gisulti. Bisan tuod buot kong mabasa ang pagpangayog pasaylo bahin niining mga pulonga, igo na ang inyong pagpatin-aw nga ingon niadto ang konteksto. Palihog padayon sa inyong maayong buhat, sa pagkasayod nga ang inyong mga magbabasa nagpabili sa kamalangkobon ug kamatinud-anon sa Pagmata!
W. H., Tinipong Bansa
Gitumong sa magbabasa ang mga pulong sa “Deklarasyon sa mga Kamatuoran,” usa ka resolusyon nga gisagop sa 1933 nga kombensiyon sa Berlin, Alemanya. (Tan-awa ang “Mga Saksi ni Jehova—Maisogon Atubangan sa Kapeligrohan sa Nazi,” sa Hulyo 8, 1998, nga isyu sa “Pagmata!”) Sumala sa gipakita sa artikulo, walay giingon diha sa 1933 nga deklarasyon nga gitumong sa pagpahayag o pagkonsentir sa pagdumot ngadto sa mga Hudiyo, ug gikasubo namo kon ang pipila ka mga pahayag naghatag nianang ideyaha karon. Kon adunay tawo balik sa katuigang 1930 nga nagsabot sa “Deklarasyon sa mga Kamatuoran” nga batok-Hudiyo ang mga Saksi ni Jehova, kining sayop nga pagsabot daling matul-id pinaagi sa pagpaniid sa maisogon ug mabinationg mga buhat sa indibiduwal nga mga Saksi alang sa mga Hudiyo. Dugang pa, ang mga publikasyon sa Watch Tower Society nalakip sa unang nagyagyag ug nagpahayag ug kapungot sa pagtratar sa mga Hudiyo didto sa Uropa.—ED.
Pagmatutog Pito ka Anak nga Lalaki Di nako mapugngan ang paggamit niining kahigayonan sa pagpasalamat kaninyo sa artikulong “Ang mga Hagit ug mga Panalangin sa Pagmatutog Pito ka Anak nga Lalaki.” (Enero 8, 1999) Akong nakaplagan nga ang pagmatutog tin-edyer mahagiton kaayo, ilabina ingong usa ka balo. Niining artikuloha lamang nga ako nakaamgong posible gayod akong makalabang niining hugnaa sa kinabuhi sa akong mga anak.
A. R., Tinipong Bansa
Ako usab gikan sa pamilya nga may pito ka anak. Hangtod ning bag-o pa, kami nahiusa sa pag-alagad kang Jehova. Ugaling lang, mga unom ka bulan kanhi, usa sa akong manghod nga mga babaye napalagpot. Sa akong unang pagkakita niining artikuloha, wala ko ganahi sa pagbasag estorya sa usa ka malamposong pamilya. Ako nag-ampo nga ako makabatog kaayohan gikan sa artikulo nga dili mobatig kasina. Ako nadasig pag-ayo sa pagkasayod nga dunay usa ka pamilyang may kasinatiang susama sa amoa ug nga si Jehova nahangawa sa among kahimtang. Buot kong pasalamatan ang mga Dickman sa pagpaambit sa ilang estorya. Ako nakaseguro nga ang akong mga ginikanan ug mga manghod nakabatog dakong pagdasig ug paghupay gikan niining artikuloha.
W. Y., Hapon
Mga Kudlis sa Nawong Kinasingkasing nga mga pasalamat sa artikulong “Mga Kudlis sa Nawong—Nagakahanaw nga ‘Ilhanang Tarheta’ sa Nigeria.” (Enero 8, 1999) Ang akong bana ug ako adunay mga higalang gikan sa Aprika nga may mga uwat sa nawong, ug nahibulong kami kon unsa kadto. Among nadawat ang tubag sa among pangutana diha sa inyong artikulo.
M. V., Italya
Mga Leyon Salamat sa artikulong “Mga Leyon—Halangdong May-Lambungayng mga Iring sa Aprika.” (Enero 22, 1999) Kining artikuloha hinungdanon kaayo kanako, sanglit gusto ko ug mga leyon sulod na sa daghang katuigan. Nakadayeg gayod ako kanila tungod kay sila matahom ug isog. Sa umaabot gusto kong mahiuban sa “may-lambungay nga nating leyon.”—Isaias 11:6-9.
E. A. S., Brazil
Mga Tanom Batok Polusyon Talagsaon gayod ang gamay nga artikulong “Mga Tanom Batok Polusyon” (Enero 22, 1999). Ang artikulo nagpamatuod gayod nga dunay usa ka mahigugmaon, matinagdanon, intelihenteng Maglalalang. Nagpakita kini kon giunsa paglalang ni Jehova ang yuta aron maatiman niini ang kaugalingon, bisan pag nameligro sa mga paningkamot sa tawo sa paglaglag sa yuta. Ang artikulo nagpalig-on usab sa akong paglaom sa pagkinabuhi sa Paraiso nga gisaad ni Jesus sa Lucas 23:43.
R. J., Tinipong Bansa