Gikan sa Among mga Magbabasa

Mga Besti Ako nagsulat kaninyo bahin sa artikulong “Ang Matang sa mga Besti nga Atong Gisul-ob—Hinungdanon ba Gayod Kini?” (Pebrero 8, 1999) Giapresyar ko ang trabahong inyong ginabuhat sa pagtagana kanamo sa “pagkaon sa hustong panahon.” (Mateo 24:45) Apan ang pipila sa mga komento diha sa artikulo daw nagpahayag ug personal nga mga opinyon. Ang pagsulat nga “ang mga kamisen nga manganunsiyo sa imong paboritong mga bituon sa sine o esport . . . basin magnudnod nimo ngadto sa pagsimba sa bayani—idolatriya” maoy dili angay. Posible nga makaangay, nga makadayeg pa, sa usa ka magdudula nga dili makalapas sa bisan unsang sugo sa Bibliya.

M. D., Pransiya

Giapresyar namo ang maong prangkang mga komento, apan dili among tuyo ang paghimog mga lagda o pagpahimutang ug kalagdaan sa sinina. Ang among artikulo nagdasig sa mga magbabasa nga gamiton ang “kaligdong sa hunahuna” sa pagpili sa ilang kaugalingong besti. (1 Timoteo 2:9, 10) Ang komento bahin sa mga T-shirt maoy dili dogmatiko apan nag-ila sa posibilidad nga ang pagsul-ob ug tinong mga estilo basin magdaot sa tigsul-ob mismo. Bisan pag dili daotan ang pagdayeg sa kahanas o hiyas sa usa ka tawo, maalamon ba nga ang usa ka Kristohanon magsul-ob nianang makahatag tingali sa impresyon nga siya nagdayeg sa estilo-sa-kinabuhi ug mga moral sa usang wala magsunod sa mga sukdanan sa Bibliya?—ED.

Nadestiyero sa Siberia Natandog kaayo ako sa kulbahinam nga estorya ni Lembit Toom, “Tunga sa Siglong Nailalom sa Totalitaryanhong Pagpanglupig” (Pebrero 22, 1999), nga dili ako makahulat sa pagpahayag sa akong apresasyon. Gikinahanglan ang dakong pagtuo diha kang Jehova nga Diyos aron siya makalahutay sa maong lisod nga kapanahonan. Ang bag-ong kagawasan nga ginatagamtam sa atong mga igsoon diha sa kanhing Unyon Sobyet angayan gayod kaayo.

J. D., Tinipong Bansa

Nagaawit nga Kahoy Kinasingkasing nga pasalamat tungod sa mga artikulong inyong gipatik bahin sa kinaiyahan. Giapresyar ko ilabina ang artikulong “Usa ka Kahoyng Nagaawit.” (Marso 8, 1999) Wala akoy nasayran bahin sa nagataghoy nga tunok. Human pagbasa bahin sa honing ipatungha niini pinaagi sa tag-as nga mga tunok niini ug way-sulod nga mga bugdobugdo sa kahoy nga mokurog duyog sa hangin, akong gihinuktokan ang Salmo 96:12, 13: “Pasinggita sa kalipay ang tanang kahoy sa lasang sa atubangan ni Jehova.” Sa kaugalingong paagi niini, kining talagsaong kahoy nagdayeg kang Jehova.

M. D., Italya

Rio de Janeiro Ingong usa ka Carioca, usa ka molupyo sa Rio, akong nakitang ang inyong artikulong “Rio de Janeiro—Matahom ug Makaiikag” (Marso 8, 1999) maoy makapadani ug matulon-anon. Ang dungog sa Rio nadaot pag-ayo tungod sa pagpanulat nga magpaukyab.

O. D. C., Brazil

Nga makanunayon, ang inyong impormasyon maayong pagkaandam. Inyong gilikayan ang pagtanyag ug mapihigong panghunahuna bahin sa mga kabos, nga sagad gipasanginlan sa sosyal nga mga suliran sa Rio.

V. R. L., Brazil

Sulat Ngadto sa mga Ginikanan Nadasig kaayo ako sa artikulong “Usa ka Linaing Sulat Ngadto sa Ilang mga Ginikanan.” (Marso 8, 1999) Kadto mao unta ang angay kong gisulat ngadto sa akong mga ginikanan. Sila maayong mga panig-ingnan sa pagtambong sa Kristohanong mga tigom, pagkaregular sa pagsangyaw, ug pagpakitag pagkamaabiabihon. Ang akong amahan usa ka ministeryal nga alagad; siya seguradong puliki kaayo sa mga katungdanan sa kongregasyon. Bisan pa niana, kasagarang nagplano siyag kalingawan alang kanamo, ug wala gayod kami mobatig kasina sa among mga kauban sa tunghaan. Namatay siya sa usa ka aksidente sa sakyanan sa iyang pagpauli gikan sa usa ka Kristohanong kombensiyon, ug ang among kinabuhi nausob pag-ayo. Apan sa paghinumdom sa iyang una-ang-Gingharian nga estilo-sa-kinabuhi ug sa pagtuo sa akong inahan, ako natandog sa pagpadayon pag-alagad kang Jehova.

S. K., Hapon