Gikan sa Among mga Magbabasa

Paglungtad sa Diyos Dili nako mahubit kon unsa ka dako ang tabang kanako sa seryeng “Ang Diyos ba Tinuod nga Naglungtad?” (Pebrero 8, 1999) Kini nagpakita kanako sa Diyos kang kinsa daghan na kaayo akog nadunggan apan wala makaplagi. Salamat gikan sa kinailadman sa akong kasingkasing sa paglamdag sa dalan sa kamatuoran alang sa mga tawo nga sama kanako.

C. P., Brazil

Mapuslan Bisan pa sa Pagkabuta Salamat sa sugilanon sa kinabuhi ni Polytimi Venetsianos nga, “Mapuslan ug Malipayon Bisan pa sa Akong Pagkabuta,” diha sa Pebrero 8, 1999, nga isyu. Ang iyang kaisog ug kalig-on sa pagtuo sa Diyos dulot nga nakatandog sa akong kasingkasing. Sa usa ka bahin, ang kinabuhi niining talagsaong babaye natugob sa kaguol ug kalisod. Apan sa laing bahin, kini dagaya sa bililhong mga kaayohan. Ako nagtuo nga ang iyang sugilanon magsilbi ingong usa ka dakong tabang ug pagdasig sa tanan nga naluya panahon niining malisod nga lumba sa kinabuhi.

K. R., Rusya

Pamesti Ako 11 anyos, ug dili ko ikapahayag sa mga pulong ang akong pasalamat tungod sa ekselenteng instruksiyon diha sa artikulong “Ang Matang sa mga Besti nga Atong Gisul-ob—Hinungdanon ba Gayod Kini?” (Pebrero 8, 1999) Sa miagi buot kong mamesti sama sa akong mga klasmet. Apan kini nga artikulo mitabang kanako sa pagkaamgo nga ang akong pamesti angayng hinlo—dili salawayon o naghinobra.

A. S., Estonia

Ako usahay mobatig kasubo sa dihang ang uban moingon nga ang akong pamesti maoy kinaraan o pormal. Ang inyong artikulo makapadasig kaayo tungod kay kini nagpamatuod nga ang pagsunod sa mga prinsipyo sa Bibliya maoy bililhon.

R. L., Brazil

Sa daghang tuig ang akong pagbati bahin sa mga Saksi ni Jehova maoy panagsagol sa kaluoy ug kahimuot. Dayon usa ka higala mihatag kanakog usa ka kopya sa Pebrero 8, 1999, nga isyu sa Pagmata! Ang pagbasa sa magasin makalingaw kaayo ug nag-usab sa akong opinyon sa mga Saksi. Ang ilabinang nakapadayeg kanako mao ang artikulo bahin sa pamesti, nga naghubit sa ako mismong tinamdan maylabot sa pagpamalit ug mga sinina. Sa umaabot, dili na kaayo ako magsentro sa pagtagad sa mga sinina nga may ngalan sa tigdisenyo. Ug akong hangyoon ang akong higala sa pagkuha alang kanako ug dugang pa sa inyong mga magasin aron mabasa!

U. B., Alemanya

Mga Pamatay sa Peste Ang akong asawa ug ako nahimuot gayod sa artikulong “Ang Kemikal nga Pamatay sa Peste Mopatay Dili Lamang sa Makadaot nga mga Insekto.” (Pebrero 22, 1999) Ingong mga tigpanalipod sa kalikopan, among gisulayan ang pagsanta sa paghilo niining yutaa. Mapasaligon ang pagkahibalo nga adunay mga tawo sa Brazil, Tsina, ug sa ubang kanasoran nga nagpakabana usab ug nagabuhat ug matinabangong buluhaton.

W. G., Canada

Tabi Daghang salamat sa artikulong “Mga Batan-on Nangutana . . . Unsay Daotan Bahin sa Tabi?” (Pebrero 22, 1999) Pipila ka panahon kanhi, sa dihang gipakaylap sa usa ka tawo ang tabi nga ako ang sunod nga tawong palagpoton gikan sa kongregasyon, akong nadiskobrehan mismo kon unsa ka sakit ang tabi. Kanang bakaka masakit gayod kaayo! Ang tawong nagpalakaw sa tabi nangayog pasaylo, apan ang akong pagsalig kaniya nawagtang.

R. M., Switzerland

Ang tabi kaylap sa akong eskuylahan, busa ang artikulo nakapadasig ug nakapalig-on kaayo kanako. Maulaw ako sa pag-ingon nga ako nagtabitabi aron daoton ang dungog sa uban. Ug kon ang mga higala mosulti batok sa uban, mamati ako ug moduyog pa gani sa kabildohay. Busa sa dihang akong nabasa ang artikulo, nakurat ako ug mibati nga ang matag tudlingpulong nagtambag kanako bahin sa mga butang nga akong ginabuhat. Naulaw kaayo ako sa tanang tabitabi nga akong nabuhat. Nahibalo ako nga ang tabi magpadayon sa akong eskuylahan, apan ako determinado nga magmalig-on gayod nga dili makigbahin niana.

M. W., Hapon