Nakakat-on Kami sa Pagsalig sa Diyos Latas sa Kasakitan

SUMALA SA GIASOY NI ROSIE MAJOR

Mabdos akog lima ka bulan sa una nakong anak sa dihang namatikdan sa akong ugangang-babaye nga ang akong mga bitiis daw nanghupong pag-ayo. Niadtong adlawa sa Marso 1992, ang akong bana, si Joey, ug ako walay kasayoran nga ang hapit na namong masinati magsulay sa among pagsalig kang Jehova.

USA ka semana sa ulahi ang akong obstetrisyan nakadiskobreng sobra ka taas ang presyon sa akong dugo. Sa misugyot siya nga ako magpaospital alang sa mga pagsusi ug pagpaniid, ako natural nga nabalaka. Ang mga pagsusi nagpaila nga nakaagom ako ug preeclampsia, posibleng makapatay nga komplikasyon sa pagmabdos.a

Ang doktora sa ospital misugyot gayod nga himoon dayon ang pinugos nga pagbati aron manganak aron mapanalipdan ako ug ang bata. Nakuratan pag-ayo ang akong bana ug ako. “Apan ang bata 24 pa lang ka semana ang edad!” ako naghingak pagsulti. “Sa unsang paagi posibleng mabuhi ang among bata sa gawas sa tagoangkan?” “Buweno, akong sulayan nga maghulat ug kadiyot,” ang doktora malulotong mitubag. “Apan, kon mograbe ang imong kondisyon, kinahanglang ipahimugso ko kana.” Milabay ang napulog-tulo ka adlaw, apan ang akong kondisyon daling migrabe. Ang doktora nagpatawag sa akong bana, ug gihimo namo ang lisod nga desisyon nga ipadayon ang pag-anak.

Ang Pag-anak

Sa gabii una sa pag-anak, si Dr. McNeil, usa ka pediatrisyan, nakigkita kanamo sa pagpatin-aw kon unsay among atubangon tungod sa ahat kaayo nga bata—posibleng kadaot sa utok, mga baga nga wala pa kaayo maugmad aron moobra sa hustong paagi, ug daghang lagmit nga mga komplikasyon. Ako miampo alang sa “kalinaw sa Diyos nga nagalabaw sa tanang panghunahuna” ug alang sa kalig-on sa pagdawat ug pagsagubang bisan kon unsay mahitabo. (Filipos 4:7) Sa pagkabuntag ang among bata gianak pinaagi sa sesaryan. Ang iyang timbang mao lamay usa ka libra ug napulo ka onsa. Ginganlan namo siyang JoAnn Shelley.

Lima ka adlaw sa ulahi ako mipauli nga walay dala. Ang gamitoy kong anak nga babaye nahibilin sa espesyal nga yunit sa pag-atiman sa bata sa ospital, nga nakigbisog alang sa iyang kinabuhi. Human sa duha ka semana si JoAnn nataptan ug pulmonya. Mapasalamaton kami sa dihang siya nalig-onlig-on, apan pipila lang ka adlaw sa ulahi siya naimpeksiyon sa lubot ug kinahanglang ibalhin ngadto sa intensive care nga bahin sa yunit. Sulod sa laing unom ka adlaw, naulian ug diyutay si JoAnn ug nagsugod gani sa pagpangunod. Nalipay kami! Apan wala magdugay ang among kalipay. Gipahibalo kami ni Dr. McNeil nga si JoAnn anemik. Misugyot siya nga mosulay pagpangitag sintetikong hormone nga erythropoietin (EPO) aron dasigon ang paggama sa pulang selula sa dugo ni JoAnn. Ang sangang buhatan sa mga Saksi ni Jehova dinhi sa Bahamas mikontak sa mga hawas sa Hospital Information Services sa Brooklyn, New York. Gihatagan dayon nila si Dr. McNeil sa kinaulahiang kasayoran bahin sa pagkamapalit ug paggamit sa EPO, ug iyang gisugdan ang pagtambal nga gigamit kana.

Mga Suliran sa Unahan

Miaginod ang ubay-ubayng semana nga may kabalaka. Si JoAnn niadtong panahona nakigbisog sa usa ka impeksiyon sa iyang lubot, sa mga kombulsiyon nga nagpahinabog panagsang apnea (mga yugto sa pag-utong), mubong ihap sa hemoglobin, ug sa brongkitis. Nahadlok kami nga ang bisan hain nianang mga sulirana basin mao ang kataposang komplikasyon nga makapatay kaniya. Apan si JoAnn inanayng miarang-arang. Sa tulo ka bulan nga edad, didto pa siya sa ospital ug mitimbang ug tulo lang ka libra. Apan sa unang higayon sa iyang kinabuhi, siya nagginhawa sa iyang kaugalingon nga walay dugang nga oksiheno. Ang iyang hemoglobin nagpataas nga nagkanormal. Ang doktor miingon nga kon madugangan siyag usa pa ka libra, amo siyang madala sa balay.

Tulo ka semana sa ulahi si JoAnn nakaagom ug seryosong atake sa apnea. Ang mga pagsusi napakyas sa pagpadayag sa hinungdan. Ang mga pag-atake sa apnea nahimong mapinadayonon ug kanunayng nahitabo duyog sa pagpakaon. Sa kataposan, nadiskobrehan nga si JoAnn may gastroesophageal reflux. Ang iyang esopago dili mosira human siya mokaon, busa ang sulod sa iyang tungol mobalik sa iyang tutonlan. Inigkahitabo niadto, siya matuk-an ug dili makaginhawa.

Sa sinugdan sa Oktubre, si JoAnn nataptan sa usa ka virus diha sa yunit sa mga bata. Daghan sa ahat nga mga bata didto nangamatay gumikan niana. Sa maong luyang kahimtang, si JoAnn nakaagom sa daw kinadugayang atake sa apnea nga iyang nasinati sukad. Ang tanang paninguha sa pagpaginhawa kaniya napakyas. Ang pediatrisyan niadtong tungora hapit nang modeklarar nga siya patay na, sa dihang dili ikapatin-aw nga siya misugod pagginhawa—nga unya misugod sa pagkombulsiyon dihadiha. Sa makausa pa siya gibutang sa ventilator, ug naseguro namo nga kadto na ang kataposan ni JoAnn. Apan siya naluwas, ug kami mapasalamaton kang Jehova.

Pagkat-on sa Labaw nga Pagsalig Kang Jehova

Ang mga suliran nga among giatubang sa wala pa matawo si JoAnn ikatandi ngadto sa pagkahulog gikan sa usa ka barko duol sa pantalan, diin kami makalangoy ngadto sa baybayon. Sa pagkakaron kadto samag kami nahulog gikan sa usa ka barko sa tunga sa lawod, nga walay yuta nga makita. Sa paghinumdom, kami nakaamgo nga sa wala pa siya matawo kami may panahong nagsalig pag-ayo sa among kaugalingon. Apan tungod sa among mga kasinatian labot kang JoAnn, kami nakakat-on sa pagsalig kang Jehova diha sa mga kahimtang nga walay tawhanong solusyon. Nakakat-on kami sa pagbuhat sumala sa gitambag ni Jesus—ang pag-atubang sa usa ka adlaw sa usa ka panahon. (Mateo 6:34) Kami nakakat-on sa pagsalig kang Jehova, bisan pag usahay kami wala gani masayod sa eksakto kon unsay iampo. Karon kami nagpasalamat kang Jehova tungod sa kaalam diha sa Bibliya ug sa “gahom nga labaw sa kasagaran,” nga magpaposible nga kami makasagubang nianang grabeng mga kalisdanan.—2 Corinto 4:7.

Sa mga panahon sa krisis, masubsob nga ako lisdan sa paghupot sa akong emosyonal nga panimbang. Ang akong mahunahunaan mao lamang si JoAnn. Ang akong bana, si Joey, bililhon kaayo sa paghatag ug espirituwal nga panimbang. Ako mapasalamaton kaayo kaniya tungod niini.

Si JoAnn Nauli sa Balay

Ang panglawas ni JoAnn inanayng naarang-arang. Usa ka adlaw sa literal iyang gihubot ang tubo sa ventilator gikan sa iyang baba. Si Dr. McNeil mibati sa maong panahon nga si JoAnn makauli na sa balay. Dako ang among kalipay! Sa pagpangandam sa iyang pag-uli sa balay, kami nagtuon kon unsaon pagpakaon kaniya pinaagig tubo. Gihikay usab namo ang suplay sa oksiheno, miabang ug makinang tigsubay sa kasingkasing ug gininhawa, ug mituon sa emerhensiyang pagpaginhawa pag-usab. Sa kataposan, sa Oktubre 30, 1992, si JoAnn gipagawas sa ospital. Siya migugol ug 212 ka adlaw diha sa espesyal nga yunit sa pag-atiman sa bata, ug mao man usab kami.

Sukad sa sinugdan, ang mga sakop sa pamilya ug mga sakop sa lokal nga kongregasyon sa mga Saksi ni Jehova nahimong usa ka tinuod nga panalangin gikan ni Jehova. Sila nanganha ug naghinlo sa balay ug tugkaran, nagluto sa mga pagkaon, nagtabang kanamo nga makaadto sa ospital, ug nagbantay kang JoAnn aron ako makatulog. Sa lakat niana among nakita ang matahom nga mga bahin sa ilang mga pagkatawo nga wala namo hisayri. Pananglitan, ang pipila nagpaambit ug espirituwal nga mga hunahuna nga nakatabang kanila latas sa ilang kaugalingong mga kalisdanan.

Among Kinabuhi Karon

Kami naningkamot pag-ayo aron itagana ang labing maayong medikal nga pagtagad nga anaa alang sa daghang suliran ni JoAnn. Sa dihang siya 19 ka bulan ang edad, among nasayrang si JoAnn may cerebral palsy—resulta sa kadaot sa utok. Dayon, sa Septiyembre 1994, miagi siyag dakong operasyon tungod sa gastroesophageal reflux. Sa 1997, si JoAnn misugod sa pagkaagom sa mga kombulsiyon nga makapameligro sa kinabuhi. Ikalipay, tungod sa mga pagpasibo sa iyang diyeta, ang mga kombulsiyon mihunong na. Ang mga suliran sa panglawas ni JoAnn nakalangan sa iyang lawasnong pagtubo. Apan karon siya nag-eskuyla sa usa ka espesyal nga tunghaan ug maayo ang iyang kahimtang. Dili siya makalakaw, ug ang iyang pagsulti limitado kaayo, apan siya mokuyog kanamo ngadto sa tanan namong Kristohanong mga tigom ug sa among balay-balay nga ministeryo. Siya daw malipayon man.

Si Jehova naghatag kanamog dako kaayong kahupayan niining masulayong mga panahon. Ang among determinasyon mao ang pagpadayon sa pagsalig ug “pagkalipay diha kang Jehova” bisan pa sa wala-damhang mga kalisdanan. (Habacuc 3:17, 18; Ecclesiastes 9:11) Kami naghinamhinam gayod nga nagpaabot sa sinaad sa Diyos nga Paraisong yuta, diin ang pinangga namong JoAnn magtagamtam ug hingpit nga panglawas.—Isaias 33:24.

[Footnote]

[Hulagway sa panid 18]

Ang among anak nga babaye nga si JoAnn

[Hulagway sa panid 20]

Bisan pa sa iyang mga kakulangan, si JoAnn maoy malipayong bata