“Nasunod Ko na ang Pagtuo”

SUMALA SA GIASOY SA MGA HIGALA NI BRUNELLA INCONDITI

“ANG Sabado maoy malaay ug mamingawng adlaw. Nag-inusara ako sa kuwarto, nga mibatig kawalay-paglaom. Kadto daw samag nagalakaw sa koridor. Maayo ang tanan, ug kalit lang, may misira sa pultahan sa atubangan nako mismo, ug wala nay lutsanan pa, bisan giunsa pa nako pagpaningkamot.”

Gibatig hilabihang kahigawad ang 15-anyos nga si Brunella Inconditi. Ang labing hinungdanong adlaw sa iyang batan-ong kinabuhi hapit nang molabay. Sayo niadtong tuiga ang iyang nagtubong gugma alang kang Jehova ug sa Bibliya nagtukmod kaniya sa pagpahinungod sa iyang kinabuhi ngadto kaniya. Niadtong Hulyo 1990 siya bawtismohan sa “Putling Pinulongan” nga Distritong Kombensiyon sa mga Saksi ni Jehova sa Montreal, Canada. Hinunoa, si Brunella miatubang ug pagsulay sa iyang pagtuo nga molungtad sa tibuok niyang kinabuhi.

Duha ka adlaw una gidahom niya nga simbolohan ang iyang pahinungod pinaagi sa bawtismo sa tubig, nasayran ni Brunella nga siya adunay leukemia. Ang mga doktor sa lokal nga ospital sa mga bata buot nga sugdan dayon ang pagtambal, busa si Brunella nagpabilin sa ospital.

Ang Iyang Kaugalingong mga Pulong Nagtandog sa mga Doktor

Si Brunella nasayod nga ang dugo balaan alang kang Jehova nga Diyos. (Levitico 17:11) Ang iyang mga ginikanan, si Edmondo ug Nicoletta, nagpaigo nga dili mogamit ug pag-abuno sa dugo sa pagtambal sa ilang anak babaye. “Buot ni Brunella nga madungog usab kana sa mga doktor gikan kaniya, bisan tuod siya menor de edad pa,” nahinumdom ang iyang amahan. “Hugot niyang gisultihan sila nga dili siya buot ug pagtambal nga makalapas sa sugo sa Bibliya sa ‘paglikay sa dugo.’”​—Buhat 15:20.

Sa Hulyo 10, 1990, tulo ka doktor ug usa ka tig-alagad sa katilingban nakigkita sa mga ginikanan ni Brunella ug sa duha ka ministro gikan sa lokal nga kongregasyon sa mga Saksi ni Jehova. Ang mga pagsusi nagpamatuod nga si Brunella may acute lymphoblastic leukemia. Ang mga doktor misaysay sa ilang plano sa pagsukol sa sakit. Sa mataktikanhon ilang gihubit nga lisod kaayong tambalan kana. “Ang panggawi ni Brunella ug determinasyon sa pagsugot sa Diyos nakatandog sa mga doktor ug sa tig-alagad sa katilingban. Sila nadani sa gugma sa iyang mga ginikanan ug sa pagpaluyo sa mga higala gikan sa Kristohanong kongregasyon. Giapresyar usab nila ang paagi nga gisabot namo ug gitahod ang ilang baroganan,” nahinumdom ang usa sa mga ansiano sa kongregasyon.

Ang mga doktor nagplano nga likayan ang pag-abuno ug dugo. Si Brunella modawat ug mabug-osong kemoterapiya, apan dili kaayo isog kay sa kasagaran. Kini magpakunhod sa kadaot ngadto sa iyang mga selula sa dugo nga gipahinabo sa pagtambal. “Ang mga doktor naghunahuna sa pisikal, emosyonal, ug espirituwal nga mga panginahanglan ni Brunella,” misaysay si Nicoletta. “Sa dihang gihangyo namo sila sa pagkonsulta sa usa ka espesyalista nga nasinati sa walay-dugo nga pagtambal sa leukemia sa mga bata, sila miuyon.” Si Brunella ug ang mga kawani sa ospital gihugpong sa usa ka mainitong bugkos sa pagbati.

Espirituwal nga mga Tumong

Bisan tuod ang unang pagtambal mipatunghag pila ka maayong resulta, ang kalisdanan ni Brunella nagsugod pa lamang. Pagka-Nobyembre 1990 ang iyang sakit miarang-arang, busa sa walay langan siya gibawtismohan. Sa pagpamalandong sa miaging pila ka bulan, miangkon si Brunella: “Dili gayod kadto sayon. Kinahanglang lig-on ka kaayo, ug kinahanglang positibo ang imong panghunahuna. . . . Ang akong pagtuo nasulayan, apan ako nagpabiling lig-on, ug nagplano gihapon ako nga himoong karera ang pagregular payunir [bug-os-panahong-ministro].”

Sayo sa 1991, misugmat ang sakit ni Brunella. Hapit siyang mamatay samtang nailalom sa kemoterapiya, apan sa kahibulong ug kalipay sa tanan, siya naulian. Pagka-Agosto makaarang na siya sa paggugol niadtong bulana diha sa publikong ministeryo ingong oksilyare payunir. Migrabe na usab ang iyang sakit, ug pagka-Nobyembre 1991 ang iyang lawas gitakboyan sa kanser diha sa daghang bahin niini. Ang laing tem sa mga doktor sa laing ospital misugod sa pagtambal kaniya pinaagig radyasyon.

Bisan ilalom sa maong malisod nga mga kahimtang, si Brunella nagpabiling malig-on ug nagbutang ug espirituwal nga mga tumong alang sa iyang kaugalingon. Sa dihang unang nasayod bahin sa leukemia, gitagalan siyag unom na lang ka bulan. Niadtong tungora, halos usa ka tuig ug tunga sa ulahi, si Brunella naghimo pa ug mga plano alang sa umaabot. “Wala siya mag-usik ug panahon sa paghago alang sa iyang mga tumong,” mikomento ang usa ka ansiano sa kongregasyon. “Ang pagtuo ni Brunella sa gisaad sa Diyos nga Paraiso nagpalig-on kaniya sa panahon sa iyang kalisdanan. Mitubo siya ngadto sa Kristohanong pagkahamtong bisan tuod batan-on pa kaayo. Ang iyang kagawian ug tinamdan nagdasig sa kongregasyon ug nagdani sa mga kasingkasing niadtong nakaila kaniya, lakip na sa mga kawani sa ospital.” Nahinumdom ang iyang inahan: “Wala gayod siya magreklamo. Sa dihang may mangutana kon unsay iyang gibati, motubag siya, ‘Maayo’ o, ‘Dili daotan, ug komosta ka?’”

Usa ka Seguradong Umaabot

Nagplano si Brunella nga motambong sa “Tigdalag Kahayag” Distritong Kombensiyon sa mga Saksi ni Jehova niadtong Hulyo 1992. Hinunoa, sa panahon sa kombensiyon, naospital si Brunella, ug siya himalatyon. Bisan pa niana, mitambong siya sa kombensiyon nga naglingkod sa silyang may ligid, nga buot motan-aw sa drama nga Paghimo sa Kon Unsay Matarong sa mga Mata ni Jehova.

Mipauli siya sa iyang pamilya alang sa kataposang pila ka adlaw sa iyang kinabuhi. “Hangtod sa kataposan, mas mabalak-on siya sa uban kay sa iyang kaugalingon,” matud ni Nicoletta. “Dasigon niya sila sa pagtuon sa Bibliya, nga magsulti kanila, ‘Mag-uban kita sa Paraiso.’”

Si Brunella namatay niadtong Hulyo 27, 1992, nga lig-on sa iyang paglaom sa usa ka pagkabanhaw sa kinabuhi sa Paraiso sa yuta. Nagsugod pa lamang siya sa pagpangagpas sa iyang mga tumong, apan siya nagplano sa pagpadayon sa iyang dedikadong dalan human sa iyang pagkabanhaw. Pipila lang ka adlaw una siya mamatay, si Brunella misulat sa mosunod nga sulat, nga gibasa panahon sa serbisyo sa iyang kamatayon.

“Minahal nga mga Higala:

“Salamat sa pagtambong. Giapresyar pag-ayo sa akong pamilya ang inyong presensiya.

“Ngadto sa mga tawo nga suod kanako​—daghan kitag naagian. Diha kitay daghang malisod nga panahon, apan diha usab ing makapahimuot nga mga panahon. Kadto usa ka malisod ug dugay nga pakigbisog, apan wala nako batia nga ako napakyas. Sumala sa giingon sa Kasulatan, ‘Gibugno ko na ang maayong bugno, ako nakadagan na hangtod sa pagkatapos, nasunod ko na ang pagtuo.’​—2 Timoteo 4:7.

“Daghan usab ako ug nakat-onan, ug mihamtong ako, ug ang akong mga higala ug kadtong naglibot kanako nakakita sa kausaban. Buot kong pasalamatan kadtong tanang tawo nga nagpaluyo kanako.

“Kamo nga nagtuo sa bag-ong sistema ug kang Jehova nasayod nga adunay pagkabanhaw, sumala sa giingon sa Juan 5:28, 29. Busa magmalig-on sa kamatuoran, ug magkita kita pag-usab.

“Buot kong pasalamatan kadtong mga tawo nga nasayod kon unsay akong nasinati. Dugayng paghalog ug usa ka halok alang sa matag usa kaninyo. Gimahal ko kamong tanan.”

Wala tugoti ni Brunella ang iyang pagkabatan-on o ang iyang sakit nga mag-oktaba sa iyang pahinungod sa Diyos. Ang iyang panig-ingnan sa pagtuo ug determinasyon nagdasig sa batan-on ug tigulang sa pagsalikway sa bisan unsa nga mahimong makapugong kanila sa pagdagan sa lumba sa kinabuhi.​—Hebreohanon 12:1.