Mga Magmamantala sa Gingharian Nagtaho

Gibaslan ang Pagpangita sa Kamatuoran

ANG Bibliya nagamando kanato nga “pangitaa si Jehova, . . . sangpita siya.” (Isaias 55:6) Si Solomon giingnan ni Jehova: “Kon mangita ka kang [Jehova], siya imong hikaplagan.” (1 Cronicas 28:9) Ang usa ka batan-ong babaye sa Pinlandiya nangita sa kamatuoran bahin kang Jehova ug tugob gibaslan.

Siya niadto sakop sa State Church of Finland ug mitungha sa Confirmation School, kay naglaom nga makaplagan niya ang kamatuoran bahin sa Diyos. Apan, siya nahiubos. Wala kaayo nila basaha ang Bibliya sa tunghaan. Ngani, gipasidan-an siya sa pari nga dili kana basahon, kay kana makapadaot sa iyang utok.

Bisan pa niana, misugod siya sa pagbasa sa Bibliya tapos sa iyang pagtungha. Siya misimba usab, apan wala niya hikaplagi ang katagbawan didto. Unya siya miadto sa Pentekostal nga Iglesya diin siya “misulod sa pagtuo.” Sila miampo alang kaniya ug giingnan siyang sa maong panahon nabatonan na niya ang pagtuo. Apan wala niya batia nga suod sa Diyos kay sa nangagi.

Misulat siya ngadto sa “Gang and Street Service Center” alang sa tabang, apan gihatagan lamang siyag numero sa telepono. Sa mitawag siya, ang telepono gitubag sa usa ka Metodista nga miampo alang kaniya ug misulti kaniyang dili bililhon kon unsang simbahana ang iyang adtoan basta dili siya moapil sa mga Saksi ni Jehova o sa mga Mormon!

Siya mitambong sa People’s Mission ug gihatagag mga pulyeto nga ipanghatag nga nag-ulohang Jehovah’s Witnesses, the Deception of the Time of the End. Kadto wala gihapon makatagbaw sa iyang pagpangita sa kamatuoran o maghatag kaniyag katuyoan sa kinabuhi.

Unya mibisita siya sa iyang tiya nga nakapakurat kaniya kay siya gisultihang siya nagtuo nga ang mga Saksi ni Jehova nagtudlo sa kamatuoran. Ang iyaan kalmadong nagbasag mga kasulatan gikan sa Bibliya nga nagpamatuod nga maoy katuyoan sa Diyos nga himoon kining yutaa nga paraiso, ug mihatag kaniya sa librong Ang Kamatuoran nga Motultol sa Kinabuhing Dayon. Gibasa sa batan-ong babaye ang libro uban ang tuyo nga mangitag sayop niana—sa pagpanghimakak niana—apan hinunoa sa wala madugay nakaamgo nga kadto nasudlan sa kamatuoran, nga nagpakita kaniya sa katuyoan sa kinabuhi nga maoy iyang gipangita. Siya misulat ngadto sa mga magpapatik alang sa ubang mga libro ug mihangyo nga may mobisita kaniya. Duha lamang ka adlaw sa ulahi, duha ka payunir nga igsoong babaye ang miabot sa iyang hagdanan. Nahikay ang usa ka pagtuon sa Bibliya ug ang batan-ong babaye misugod sa pagtambong sa mga tigom sa Kingdom Hall, diin siya dulot nakadayeg ug natandog sa mahigugmaong palibot nga naglungtad didto. Siya mipadayon sa iyang pagtuon sa Bibliya, nabawtismohan usa ka tuig sa ulahi, misugod sa pagpayunir, ug mitambong sa Tunghaan sa Payunir nga Pag-alagad. “Sa kataposan ako mahimong malipayon,” matud niya. Gibaslan ang iyang pagpangita sa kamatuoran.

Ang susamang mga kasinatian gisubli sa libolibong beses sulod sa ‘konklusyon niining sistemaha sa mga butang,’ dihang si Jesus, ang Maayong Magbalantay, nagatigom sa iyang “ubang mga karnero” sumala sa gitagna sa Juan 10:16. (Mateo 24:3) Nan, malipayon kadtong nagapangita sa kamatuoran sa Bibliya ug si kinsa pagabalosan sa Diyos.—Mateo 7:7.