Mga Magmamantala sa Gingharian Nagtaho
Gikan sa Depresyon Ngadto sa Kalipay
SI Jehova maoy usa ka Diyos nga malipayon. (1 Timoteo 1:11) Buot niyang kadtong nagaalagad kaniya magmalipayon usab. Busa, kon masulob-on ang usa sa iyang mga alagad, siya tabangan ni Jehova sa pag-antos sa kaguol ug usahay pagbaton pag-usab sa malipayong espiritu. Ang mosunod nga kasinatian gikan sa Uruguay nagailustrar niini.
Usa ka igsoong babaye ang nagpaabot sa usa ka klinika sa Montevideo alang sa resulta sa usa ka pagpasusi sa X-ray. Ang usa ka babayeng naglingkod sa iyang tupad nahadlok kaayo kon unsay itug-an kaniya sa doktor ingong resulta sa pagpasusi nga gihimo niya. Giingnan siya sa igsoong babaye nga sukad siya nahimong Saksi ni Jehova, siya wala nay gikahadlokan. Ugaling, ang babaye miingon nga dili siya moangay sa mga Saksi kay taas kaayong sukdanan ang ilang gidahom gikan sa mga tawo.
Unya gisultihan siya sa igsoong babaye sa unsang paagi ang kahibalo sa kamatuoran sa Bibliya nagtabang kaniya. Siya namatyag 18-anyos nga anak babaye ug nakaagom sa grabeng depresyon sulod sa walo ka tuig. Ang mga sikyatrista o ang mahalong mga medisina wala makatabang niya sa pagbuntog sa maong depresyon. Sa makadaghan, matud niya, siya naospital, apan walay misangpot nga kauswagan. Ang iyang panimalay giatiman sa mga sulugoon kay siya mismo dili makaatiman sa bisan unsa. Gisulayan niya ang paghikog kay siya nawad-ag interes sa kinabuhi. Walay butang ang daw nakatabang.
Unya, giingnan niya ang babaye, usa ka adlaw ang mga Saksi ni Jehova miduaw ug gibinlan siyag pila ka basahon sa Bibliya. Kadto nakahaling sa iyang interes sa Pulong sa Diyos, ug misugod siya sa pagbasa sa Bibliya sa katibuk-an. May butang misugod sa pagkausab sa iyang kahiladman. Misugod siya sa pagbangon sa buntag ug naikag sa iyang panimalay. Gihukom niya ang pag-atiman sa balay sa iyang kaugalingon ug nadiskobrehan niyang makaarang niana. Kadto nahisamag siya wala gayod magsakit! Kadto nakapalipay kaayo niya.
Siya wala na mobalik sa sikyatrista. Ang iyang tinguha nga mabuhi nadasig sa iyang kahibalo sa Pulong sa Diyos, ug kadto napamatud-ang labing maayong medisina. Gipangita niya ang mga Saksi ni Jehova, ug ilang gisugdan ang regular nga pagtuon uban niya. Misugod usab siya sa pagtambong sa mga tigom, ug sa wala madugay siya nabawtismohan. Kay wala na hasola sa depresyon, siya karon nagakalipay sa pag-alagad kang Jehova.
Ang babaye diha sa lawak-hulatanan namatig maayo. Dayon siya miingon ngadto sa igsoong babaye: “Sa dugaydugay na, ang mga Saksi ni Jehova akong mahinagbo; apan kon sa usa ka panahon sa umaabot, ako mahimo gayong usa sa mga Saksi ni Jehova mismo, kana maoy tungod sa imong gisulti sa dili pa dugay. Ang pagpamati kanimo nahisamag pagsugod sa pagkakitag kahayag sa mangitngit nga dapit.”
Daghang tawo sa tibuok nga kalibotan nakakita sa kakawangan sa pagsulay sa pagsulbad sa mga suliran sa kinabuhi sa ilang kaugalingon, ug sila nagadangop kang Jehova nga Diyos. Pagkamalipayon nila nga masayod bahin sa umaabot nga bag-ong kalibotan sa Diyos diin ang tanan mahimong malipayon, ug ang depresyon mahimong butang sa kagahapon!—Proverbio 16:20.