Mga Magmamantala sa Gingharian Nagtaho
Pagdawat sa Maayong Balita sa Belgium
“KINSAY nakakitag sama niini?” matud sa sangang-buhatan sa mga Saksi ni Jehova sa Belgium. (Itandi ang Isaias 66:8.) Kining matahom nga nasod nagtaho sa kinatas-ang ihap sa 24,464 ka magmamantala alang sa 1989 tuig sa pag-alagad. May 4-porsiento usab nga pag-uswag sa aberids nga gidaghanon niadtong nakig-ambit sa buluhatong pagsangyaw kada bulan.
◻ Ang maayong balita nga gimantala sa mga Saksi ni Jehova giila sa usa ka Katolikong pari si kinsa sa usa ka Misa sa Dominggo miingon ngadto sa iyang mga parokyano: “Kon moanha sa inyong pultahan ang mga Saksi ni Jehova, buksig dako kini alang kanila. Sila nakabaton sa kamatuoran!” Kini sa tukma maoy gibuhat sa usa ka babaye. Sa pag-abot sa mga Saksi, gibuksan niyag dako ang iyang pultahan ug gidawat ang librong Life—How Did It Get Here? By Evolution or by Creation? Sa ulahi nangutana siya bahin sa librong Ikaw Mabuhing Walay Kataposan sa Paraiso sa Yuta. Nasugdan ang usa ka pagtuon sa Bibliya uban niya, apan wala moapil ang iyang bana. Busa ang usa ka igsoong lalaki mitelepono kaniya ug nangutana kon buot ba niyang mopuyo uban sa iyang asawa sa usa ka mas maayong kalibotan? Ingong sangpotanan, siya miapil sa pagtuon. Ang duruha nag-ipon nga wala makasal sa legal, apan ilang gilegal ang ilang pag-ipon ug sa wala madugay nabawtismohan.
◻ Ang kamatuoran nagbag-o sa kinabuhi sa usa ka batan-ong babaye. Sa dihang siya wala pay 14 anyos, siya gipasagdan nga nagkinaugalingon. Nakahibalag siyag usa ka batan-ong lalaki ug nakig-ipon niya diha sa kalibotan sa mga punk, nga naggamit sa mga droga ug nagpakita sa espiritu sa pagkamabangis. Dayon ang batan-ong lalaki namatay sa usa ka aksidente sa motor. Kadto nagbiya sa batan-ong babaye nga may seryosong sakit sa nerbiyos, ug siya naghunahuna sa paghikog. ‘Asa ba nako hikaplagi ang solusyon sa akong mga suliran?’ siya naghunahuna. Nahibalag niya ang usa ka tawong nagbuhat sa espiritismo nga nagpatuo kaniya nga iyang ikasulti ang iyang namatayng puyopuyo. Sila mieksperimento sa hipnotismo ug extrasensory perception. Kay wala makakita diha niana sa gidahom nga paglipay, siya nahitumpawak na usab sa seryosong depresyon. Sa ubay-ubayng mga bulan siya bug-os nagpalain sa kaugalingon. Dayon usa sa mga Saksi ni Jehova nakahibalag kaniya ug naningkamot sa pagtabang niya sa espirituwal nga paagi. Sa makadiyut kadto gibuhat pinaagig sulat, ug sa nahaigong panahon ang kahimtang natul-id tapos sa dakong paghago ug kaisog sa iyang bahin. Karon siya nahigawas na sa demonyohanong impluwensiya, gikan sa bisyo sa tabako, ug gikan sa dulot nga mga pagbati sa sala. Sa paglabay sa panahon, ang dugang kahibalo sa Bibliya ug ang espiritu ni Jehova nakatabang ug dako kaniya. Gawas pa, ang mga tigom nakapalig-on kaniya, kay siya madasigong nag-andam alang niana. Karon siya bawtismado na ug nagbaton sa espiritu sa pagpayunir. Siya nagadumala nag ubay-ubayng pagtuon sa Bibliya, nga usa kanila uban sa iyang inahan, si kinsa karon nagatambong na sa pipila ka tigom. Sa pagkamatuod, siya gitabangan ni Jehova!
◻ Kadtong nagapahimulos sa kahigayonan sa tunghaan nakatagamtam ug dakong kalamposan sa pagsabwag sa maayong balita. Usa ka batan-ong sister sa tunghaan sa Belgium naasayn sa paghatag ug pakigpulong sa usa ka ulohan nga siya ang magpili. Mihukom siya sa paghisgot bahin sa mga Saksi ni Jehova ug sa ilang mga pagtuo, nga ibase ang iyang impormasyon sa brosyur nga Jehovah’s Witnesses in the 20th Century. Nakadayeg ang iyang propesor. Tapos sa pagpahayag sa iyang pakigpulong ngadto sa klase, gitugotan ang mga estudyante sa pagpangutana. Ang ubay-ubayng klasmet human niadto nangutana kon unsay buhaton nila aron makapuyo sa Paraiso sa Diyos nga gihisgotan sa iyang pakigpulong. Daghan, apil ang propesor, nangayog mga kopya sa lainlaing mga brosyur nga nabatonan sa sister. Ang ubang mga klase mihangyo sa mga brosyur ug dugang impormasyon, ug ang usa ka propesor sa relihiyon nagsusi sa mga brosyur ug nagrekomendar kanila ngadto sa iyang klase.
Ang maisogong aksiyon sa atong batan-ong sister gipanalanginan. Kawhaag-tulo ka brosyur ang naapod-apod ngadto sa duha ka propesor ug sa daghang estudyante; ang usa ka estudyante, kay nakadungog sa pakigpulong, nangayo sa impormasyon sa pagpatin-aw sa buluhaton sa mga Saksi ni Jehova ngadto sa iyang klase.
Daghan ang nagadawat sa maayong balita sa Belgium. Sila nagadawat sa Pulong sa Diyos, “dili ingon nga pulong sa mga tawo, kondili, sumala sa pagkamatuod mao kini, ingon nga pulong sa Diyos, nga nagalihok usab diha kaninyong mga magtutuo.”—1 Tesalonica 2:13.