Determinadong Magkinabuhi Sumala sa Moral nga mga Sukdanan ni Jehova
ANG BIBLIYA nagatin-aw nga kon mag-ipon ang usa ka lalaki ug babaye nga walay legal nga kasal, sila nagabuhat sa pakighilawas, ug nianang kahimtanga, dili magapanunod sa Gingharian sa Diyos. (1 Corinto 6:9, 10) Ang usa ka kasinatian gikan sa British West Indies nagasugid bahin sa usa ka batan-ong babaye nga nakakat-on niining kamatuorana.
Sa St. Lucia, duha ka Saksi ni Jehova nakahibalag sa batan-ong babaye, ug siya nagpakitag interes sa Bibliya. Ingong resulta, nasugdan ang usa ka pagtuon sa Bibliya uban kaniya. Samtang miuswag siya sa iyang pagsabot, iyang nakita nga kinahanglang himoon ang pila ka moral nga kausaban. Bisan pag siya inahan sa upat ka anak, siya dili minyo apan siya nakigpuyopuyo sa usa ka lalaki. Siya ug ang lalaki naghago sa pagtukod sa usa ka gamayng balay nga gipuy-an nilang unom.
Sa pagkaamgong ang iyang kinabuhi wala mahiuyon sa matarong nga mga sukdanan sa Diyos, ang batan-ong babaye determinado sa paghimog mga kausaban. Mahimong iyang minyoan ang lalaki nga iyang giipon o mobulag kaniya. Gipakighisgot niya kini sa lalaki, apan siya walay tinguhang maminyo. Siya kontento na sa pagpuyopuyo. Tungod sa iyang pagtuo unsa kahay iyang buhaton? Kinahanglang himoon niya ang desisyon kon buot niyang pahimut-an si Jehova, ug tapos sa mainampoong pagpalandong, mihukom siya sa pagbulag sa lalaki. Apan asa man siya mopuyo uban sa upat niya ka anak?
Tapos sa pagpakigsabot sa lalaki, nakab-ot ang makiangayong kahikayan—tungaon nila ang balay! Tungod sa mahigugmaong pagtabang sa kaigsoonan, uban sa lalaking iyang bulagan, nabahin ang balay, ang katunga alang kaniya ug ang laing katunga alang sa lalaki. Ang katunga niyang balay gibalhin niadtong adlawa mismo sa laing dapit mga lima ka milya (8 km) ang kalayo. Sulod sa usa ka semana, kadto natukod pag-usab ug nausab ang porma nga nahimong gamay duhag-higdaang balay.
Kay nakahimo na sa gikinahanglang mga tikang sa pagpahiuyon sa iyang kinabuhi sa mga sukdanan ni Jehova, siya misugod dayon sa pag-apil sa pagsangyaw sa kanataran, nga giubanan sa upat niya ka anak. Iyang gipahinungod ang iyang kinabuhi kang Jehova ug sa wala madugay nabawtismohan. Sa pagsaulog sa okasyon, siya nagpalistang auxiliary payunir. Karon siya dugang gipanalanginan sa pagkaaging ang bag-o niyang balay gigamit nga dapit alang sa usa ka Pagtuon sa Basahon sa Kongregasyon nga may aberids nga tumatambong nga 17. Sa pagkamatuod, gipanalanginan ni Jehova ang iyang determinasyon nga mahimong mahinlong magsisimba niya.