Gituman Nila ang Ilang Saad!

SI ANTONIO, nga diha na sa iyang kataposang tuig sa hayskul, buot mohatag ug di-pormal nga pagpamatuod ngadto sa iyang mga klasmet. Busa siya misugyot nga ang iyang magtutudlo sa kasaysayan magpasundayag sa video nga Jehovah’s Witnesses Stand Firm Against Nazi Assault. Bisag maduhaduhaon, ang magtutudlo miuyon, nga miingong iyang ipasundayag ang video sa pagkasunod adlaw.

“Sa sinugdan,” asoy pa ni Antonio, “ang magtutudlo nagtan-aw sa video nga may pagkamapahitas-on; apan sa dihang iyang namatikdan nga iladong mga historyano ang nag-asoy sa kasaysayan sa mga Saksi ni Jehova sa mga kampong konsentrasyon, siya naminaw pag-ayo. Sa pagkatapos iya akong gipasalamatan sa pagsugyot nga ipasalida ang video.”

Panahon sa sunod nga leksiyon, ang magtutudlo misulay paghubit sa buluhaton sa Bibelforscher, segun sa pag-ila sa mga Saksi ni Jehova sa maong panahon sa Alemanya; apan siya nakaamgo nga mas maayong si Antonio ang mohimo niadto. Gisaysay ni Antonio ang papel sa mga Saksi diha sa katilingban ug ang pipila sa ilang mga doktrina. Siya mihinapos sa pag-ingong: “Dayag, ang mga tawo dili makakuha ug bisan unsang kaayohan sa bililhong mensahe nga among ginadala kon sila dili mamati kanamo, kon sila manirado sa ilang mga pultahan sa among atubangan, o kon sila dili mobasa sa among mga publikasyon.”

Ang tanang klasmet ni Antonio miuyon sa iyang panglantaw, ug ang magtutudlo misugyot ug resolusyon ngadto sa klase. Sa unang higayong maarangan, maminaw sila sa mga Saksi ug modawat sa ilang mga publikasyon. Padayong gihisgotan sa klase ang bahin sa video sa pipila ka adlaw. Imong mahanduraw ang kalipay ni Antonio sa misunod nga pipila ka adlaw sa dihang nakita niya ang iyang mga isigkaestudyante nga misulod sa klase nga may mga publikasyon sa Watchtower ug nakadungog sa matag usa kanila nga mapahiyomong miingon: “Kita mo na, gituman ko ang akong saad!”