Gikan sa Among mga Magbabasa
Kabataan Anaa sa Krisis Buot kong ipahayag ang akong apresasyon alang sa serye sa Abril 8, 1999, nga isyung, “Kabataan Anaa sa Krisis—Kinsay Manalipod Kanila?” Ako naghunahuna nga ang makapatandog nga ulohan bahin sa pag-abuso sa bata angayng mahimong panukmod kanunay aron pukawon ang opinyon sa mga tawo. Atong katungdanan nga panalipdan ang kalibotan sa atong mga bata. Hinaot nga magpadayon kamo sa inyong maayong buluhaton.
P. P., Buhatan sa Magtatambag Alang mga Bata, Siyudad sa Roma, Italya
Makapakugang ang paghunahuna nga sa sinugdanan sa ika-21ng siglo, daghang bata ang nagtrabaho pa gihapon ingong mga ulipon ug gigamit sa pagpatay sa uban. Mas malisod pa ganing dawaton ang kamatuoran nga kadaghanan kanila gamay ra ug kalaoman nga makabaton ug mas maayong kinabuhi. Sa makausa pa, ang Pagmata! tukmang naghulagway sa kahimtang sa kabataan sa kalibotan.
S. R. B., Brazil
Diborsiyada ako karon, human sa 36 ka tuig nga kaminyoon. Akong nahibaloan nga ang akong bana nag-among-among sa akong minahal nga mga anak babaye sulod sa katuigan. (Dili siya Kristohanon.) Ako bug-os nga nawad-an sa panimbang sa dihang akong nahibaloan kini. Daw walay usa nga nakasabot sa kaseryoso sa seksuwal nga pag-abuso o sa dili matukib nga kasakit nga giantos sa inosenteng mga tawo. Busa ako nagpasalamat kang Jehova nga kamo nagsulat bahin niining maong epidemya.
N. M., Tinipong Bansa
Pagtagad Alang sa mga Tigulang Gipabilhan ko gayod ang ulohang “Ipakitang Ikaw Nagtagad.” (Abril 8, 1999) Daghang tigulang diha sa mga nursing home ang nakalimtan sa ilang mga pamilya. Apan duha ka bulan ang milabay, ang pipila kanamo mihukom sa pagpakighisgot sa Bibliya uban sa pipila ka tawo diha sa duol nga nursing home. Human niadto, kami nagtugtog ug musika alang kanila diha sa piano ug nakighinabi kanila. Kami nagplano sa pagduaw kanila karon nga regular.
C. V., Tinipong Bansa
Aprikanhong Bagyo Ako 12 anyos, ug buot kong pasalamatan kamo tungod sa artikulong “Human sa Bagyo, Nangibabaw ang Kristiyanidad.” (Marso 8, 1999) Akong gihunahuna ang mga igsoong mitabang niadtong anaa sa kalisod maoy dalayegon! Kini nagpahinumdom kanako sa paagi nga ang atong mga igsoon mitabang sa uban human sa dakong linog sa Hanshin sa Hapon. Ang artikulo nagdasig kanako nga magmaisogon ug magbuhat ug maayong mga butang alang sa uban.
R. K., Hapon
Natulog nga mga Masuso Salamat sa artikulong “Sa Unsang Paagi Angayng Matulog ang Usa ka Masuso?” (Marso 22, 1999) Namatay ang akong panganay nga duha ka bulan ug tunga gumikan sa sudden infant death syndrome (SIDS). Kon nabatonan pa lang unta nakong daan kining impormasyona! Bisan pag nakabaton ug laing duha ka matahom nga mga anak, akong gibati pa gihapon ang dako ug dili-mahubit nga kasakit.
A. D., Italya
Ang SIDS dunay pipila ka dagkong mga hinungdan sa kapeligrohan. (Tan-awa ang “Pagpaniid sa Kalibotan” diha sa Enero 22, 1997, nga isyu sa “Pagmata!”) Sa gihapon, sa daghang paagi ang SIDS nagpadayong usa ka medikal nga misteryo. Busa ang mga ginikanan nga namatyag anak tungod sa SIDS angayng dili magbasol sa ilang kaugalingon tungod sa maong trahedya. Ang detalyadong paghisgot sa SIDS diha sa among Enero 22, 1988, nga isyu napamatud-ang makapahupay alang sa daghang nagbangotan nga mga ginikanan.—ED.
“Celiac Disease” Among nadawat ang artikulong “Pagsagubang sa ‘Celiac Disease’” (Marso 22, 1999) tulo ka bulan human namo mahibaloi nga ang among sayis-anyos aduna niana. Sa Rusya kining sakita halos wala mahibaloi bisan taliwala sa mga doktor. Pagkamakapahupay nga ang atong Kristohanong mga igsoong lalaki ug babaye mosabot kon nganong ang among anak nga babaye adunay espesyal nga diyeta! Kining artikuloha nagpalig-on kanamo ug nagpasalig kanamo nga si Jehova kanunayng nagtagad sa mga panginahanglan sa iyang katawhan.
V. P. ug L. P., Rusya
Pagtinguha sa mga Butang nga Dili Nimo Mabatonan Mao pa lamay akong pagkahuman sa pagbasa sa artikulong “Mga Batan-on Nangutana . . . Nganong Dili Nako Mabatonan ang mga Butang nga Gusto Nako?” (Marso 22, 1999) Buot akong magpasalamat kaninyo tungod niining artikuloha kay kini nakapaamgo kanako nga dili ko mabatonan ang tanan nga akong gusto. Apan ingon sa gisulti sa artikulo, si Jehova nahibalo sa atong mga panginahanglan, ug ako malipayon kaayo nga ako nagkinabuhing yano.
C. K., Canada