Sa Unsang Paagi Angayng Matulog ang Usa ka Masuso?

DAGHANG masuso palibot sa kalibotan ang namatay ingong resulta sa Sudden Infant Death Syndrome (SIDS). Sa Tinipong Bansa, mao kini ang labing komon nga hinungdan sa kamatayon taliwala sa mga masuso tali sa mga pangedarong 1 ka bulan ug 12 ka bulan. Aduna bay paagi sa pagkunhod sa kapeligrohan? Sumala sa The Journal of the American Medical Association (JAMA), ang panukiduki sa di pa dugayng katuigan nagpakita nga ang kapeligrohan sa SIDS maorag mous-os ug dako sa dihang ang mga masuso matulog nga maghayang imbes nga magkulob. Ubay-ubayng nasod ang nagsugod ug mga programa aron magmaalerto ang mga ginikanan sa kalangkitan tali sa posisyon sa pagkatulog ug sa SIDS. Sa Australia, Inglaterra, Denmark, New Zealand, ug Norway, ang SIDS mius-os sa labing menos 50 porsiyento human sa usa hangtod duha ka tuig sa publikong mga kampanya nga nagpasiugda sa pagpakatulog sa mga masuso nga maghayang.

Wala masayri kon sa unsang paagi gayod nga ang pagkatulog sa masuso nga magkulob nalangkit sa SIDS, apan ang pipila ka tigdukiduki nagsugyot nga kining nagkulob nga posisyon tingali moresulta sa paghanggab pag-usab sa masuso sa gipagawas nga hangin niini, sa ingon nagpauswag sa sukod sa carbon dioxide diha sa dugo niini. Ang lawas sa masuso mahimo usab nga mosobra ka init tungod kay dili usab kini makapagawas ug kainit sa dihang nagkulob. Kon unsa ugaling, ang mga masuso nga gipahigda nga naghayang man o nagkulob mokiling sa pagpabilin sa maong posisyon. Ang mga pagtuon nagsugyot usab nga ang pagpahayang sa usa ka normal, himsog nga masuso mas maayo kay sa pagpatakilid niini.

Nganong pilion sa mga inahan ang usa ka posisyon sa pagpakatulog kay sa lain? Ang JAMA nag-ingon nga ang mga inahan sagad nga nagsunod lamang sa kostumbre—ilang pakatulgon ang ilang mga masuso sa paagi nga gihimo sa ilang kaugalingong mga inahan o sa uban diha sa ilang komunidad. O mahimong ilang gisagop ang batasan nga ilang napanid-an sa ospital. Ang ubang inahan mibati usab nga ang ilang masuso moangay o mas maayog katulog diha sa usa ka partikular nga posisyon. Daghang inahan ang kanunay nga magpahigda sa masuso nga naghayang sa unang bulan apan pakulobon kini sa ulahi. “Kini nga kiling makapalibog,” matod sa JAMA, “tungod kay ang kapeligrohan sa SIDS maoy kinatas-an taliwala sa mga masuso sa pangedarong 2 hangtod 3 ka bulan.” Ang mga doktor naningkamot sa pagpahibalo sa mga ginikanan sa gagmayng mga masuso mahitungod sa ilang giingon nga simple, epektibong paagi sa pagkunhod sa kapeligrohan sa SIDS—pagpakatulog sa himsog nga mga masuso nga naghayang.a

[Footnote]