Ang Hunahuna sa Bibliya

Angay Bang Motambong ang mga Kristohanon sa mga Tigom sa Kongregasyon?

“HINIMBA ako kaniadto, apan karon dili na.” “Sa akong hunahuna makasimba ka sa Diyos bisan asa, dili lamang diha sa simbahan.” “Nagtuo ako sa Diyos ug sa Bibliya, apan dili ako motuo nga kinahanglanon ang pag-adto sa simbahan.” Nakadungog na ba kamo sa susamang mga ekspresyon? Nagkaanam ka daghang tawo karon ang nagsulti nianang mga butanga, ilabina sa Kasadpang mga nasod. Ang mga tawo nga hinimba kaniadto wala na karon maghunahuna nga kini kinahanglanon. Unsay giingon sa Bibliya bahin sa pag-adto sa simbahan?

Ang mga pulong nga “simbahan” ug “mga simbahan” makita kapin sa 110 ka beses diha sa King James Version. Ang ubang mga hubad naggamit usab niining mga terminoha. Ang Gregong pulong nga gihubad “simbahan” sa literal nagkahulogag “pagtawag,” o, sa laing mga pulong, panagkatigom sa katawhan. Pananglitan, ang Buhat 7:​38, sa King James Version, naghisgot bahin kang Moises nga “diha sa simbahan sa kamingawan,” nga mao, taliwala sa natigom nga nasod sa Israel. Sa laing okasyon ang Kasulatan nag-asoy nga “gisugdan ang grabeng paglutos batok sa simbahan,” nga nagtumong sa katilingban sa mga Kristohanon sa Jerusalem. (Buhat 8:​1, The Jerusalem Bible) Sa usa sa iyang mga sulat, gipangomosta ni Pablo ang “simbahan sa balay [ni Filemon],” ang lokal nga kongregasyon nga nagtigom didto.​—Filemon 2, Revised Standard Version.

Tataw, ang terminong “simbahan” nga gigamit sa Bibliya nagpaila, dili sa dapit sa pagsimba, kondili sa usa ka grupo sa mga magsisimba. Nga nag-ila niini, si Clement sa Alexandria, usa ka relihiyosong magtutudlo sa ikaduhang siglo, misulat: “Ang akong gitawag nga Simbahan, dili ang dapit, kondili ang kongregasyon sa mga pinili.” Bisan pa niana, ang mga Kristohanon kinahanglan bang presente diha sa espesipikong dapit o tinukod aron mahimong dalawaton sa Diyos ang ilang pagsimba?

Pagsimba sa Nasod sa Israel

Ang Balaod ni Moises nagbaod nga ang tanang Hudiyong lalaki kinahanglang presente diha sa espesipikong dapit alang sa tulo ka tinuig nga kapistahan. Daghang babaye ug mga bata ang mitambong usab. (Deuteronomio 16:16; Lucas 2:​41-44) Diha sa pipila ka okasyon gitudloan sa mga saserdote ug mga Levihanon ang nagkatigom nga panon, nga nagabasa sa Balaod sa Diyos. Ilang ‘gipatin-aw kini, gihatag ang kahulogan niini, ug gipasabot ang gibasa.’ (Nehemias 8:8) Alang sa mga tuig sa Igpapahulay, ang sugo sa Diyos nag-ingon: “Tigoma ang katawhan, ang mga lalaki ug ang mga babaye ug ang mga bata ug ang imong langyaw nga pumoluyo nga anaa sa sulod sa imong mga ganghaan, aron sila mamati ug aron sila makakat-on, sanglit angay silang mahadlok kang Jehova nga inyong Diyos ug magmatngon sa pagtuman sa tanang pulong niini nga balaod.”​—Deuteronomio 31:12.

Diha lamang sa templo sa Jerusalem ang usa ka tawo makatanyag ug mga halad ngadto sa Diyos ug makadawat ug mga instruksiyon gikan sa mga saserdote. (Deuteronomio 12:​5-7; 2 Cronicas 7:12) Sa ngadtongadto, ang ubang mga balay sa pagsimba gitukod sa Israel​—ang mga sinagoga. Kini maoy mga dapit alang sa pagbasa sa Kasulatan ug alang sa pag-ampo. Apan, ang templo sa Jerusalem mao ang pangunang dapit sa pagsimba. Kini giilustrar sa gitaho sa magsusulat sa Bibliya nga si Lucas. Iyang gihisgotan ang usa ka tigulang nga babaye nga ginganlag Ana, kinsa “wala gayod mopalta sa templo, nga nagahatag ug sagradong pag-alagad adlaw ug gabii uban ang mga pagpuasa ug mga pangamuyo.” (Lucas 2:​36, 37) Ang matuod nga pagsimba duyog sa uban pang debotadong mga tawo mao ang sentro sa kinabuhi ni Ana. Ang ubang mahinadlokon-sa-Diyos nga mga Hudiyo misunod sa susamang dalan.

Matuod nga Pagsimba Human sa Kamatayon ni Kristo

Human sa kamatayon ni Jesus ang iyang mga sumusunod wala na mailalom sa Moisesnong Balaod, ni sila gibaoran sa pagsimba sa templo. (Galacia 3:​23-​25) Sa gihapon, sila nagpadayon sa pagtigom alang sa pag-ampo ug sa pagtuon sa Pulong sa Diyos. Wala silay kuntodo nga mga tinukod, hinunoa naggamit sa pribadong mga balay ug publikong mga dapit. (Buhat 2:​1, 2; 12:12; 19:9; Roma 16:​4, 5) Kay walay rituwalismo ug seremonyas, ang unang-siglong Kristohanong mga tigom maoy yano apan makapalagsik.

Taliwala sa moral nga kangiob sa Romanhong Imperyo, ang mga prinsipyo sa Bibliya nga gitudlo nianang mga tigoma mikislap samag mga brilyante. Ang pipila ka dili-magtutuo nga mitambong sa unang higayon mipatugbaw: “Ang Diyos anaa gayod sa inyong taliwala.” (1 Corinto 14:​24, 25) Oo, ang Diyos diha gayod sa ilang taliwala. “Busa, sa pagkatinuod, ang mga kongregasyon [“mga simbahan,” RS, JB] padayong nalig-on diha sa pagtuo ug miuswag sa gidaghanon adlaw-adlaw.”​—Buhat 16:5.

Ang usa ka Kristohanon niadtong panahona nakabaton ba ug pag-uyon sa Diyos pinaagi sa pagsimba diha sa paganong mga templo o pagsimba nga magkinaugalingon? Ang Bibliya naghatag ug tin-aw nga sugo bahin niining butanga: Ang inuyonang mga magsisimba kinahanglan nga mahimong bahin sa bugtong matuod nga simbahan, o kongregasyon, ang “usa ka lawas” sa matuod nga mga magsisimba. Kini mao ang mga tinun-an ni Jesus, nga gitawag ug mga Kristohanon.​—Efeso 4:​4, 5; Buhat 11:26.

Komosta Karong Adlawa?

Imbes nga dasigon kita sa pagsimba diha sa simbahan, ang Bibliya nagdasig kanato sa pagsimba uban sa simbahan, “ang kongregasyon sa buhing Diyos,” ang katawhan nga “magasimba uban sa espiritu ug sa kamatuoran.” (1 Timoteo 3:​15; Juan 4:24) Ang relihiyosong mga tigom nga giuyonan sa Diyos angayng magtudlo sa mga tawo “diha sa balaang mga buhat sa panggawi ug mga buhat sa diyosnong pagkamahinalaron.” (2 Pedro 3:11) Angay nilang tabangan kadtong presente aron mahimong hamtong nga mga Kristohanon, nga makahimo sa “pag-ila sa maayo ug sa daotan.”​—Hebreohanon 5:14.

Ang mga Saksi ni Jehova naningkamot sa pagsunod sa panig-ingnan sa unang-siglong mga Kristohanon. Kapin sa 91,400 ka kongregasyon sa tibuok kalibotan ang regular nga nagtigom aron magtuon sa Bibliya ug magdinasigay sa usag usa, nga nagbuhat niana sa mga Kingdom Hall, pribadong mga balay, ug ubang mga dapit. Nahiuyon kini sa mga pulong ni apostol Pablo: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom.”​—Hebreohanon 10:​24, 25.