Kinahanglan Bang Moadtog Templo, Sagradong Dapit, o Simbahan Aron Mag-ampo sa Diyos?

DAGHANG tawo moadtog simbahan aron mag-ampo sa Diyos. Ang uban moadtog lagyong dapit nga giisip nga sagrado. Kinahanglan ba gyong moadtog templo, sagradong dapit, o simbahan aron mag-ampo sa Diyos? O makapakigsulti ka ba kaniya bisan asa o bisan unsang orasa? Unsay giingon sa Bibliya?

Sa sinugdanan sa kasaysayan sa tawo, walay mga balay sa pagsimba. Ang atong unang ginikanan nagpuyo diha sa matahom nga tanaman. (Genesis 2:8) Didto sila nagpakigsulti sa ilang Maglalalang, si Jehova nga Diyos. Sa midaghan na ang tawo, ang mga matarong, sama ni Noe, “naglakaw uban sa matuod nga Diyos” nga walay mga tinukod alang sa pagsimba. (Genesis 6:9) Sila mainampoon ug nahigugma kang Jehova ug siya nahimuot kanila.

Ang Diyos Dili Mopuyo sa mga Tinukod nga Hinimog Tawo

Ang matinumanong mga tawo sa karaang panahon nahibalo nga ang Maglalalang sa yuta ug sa uniberso dili mopuyo sa mga tinukod nga hinimog tawo. “Ang Diyos mopuyo ba gayod uban sa katawhan dinhi sa yuta?” ang maalamong Haring Solomon nangutana. Siya mismo mitubag: “Tan-awa! Ang langit, oo, ang langit sa mga langit, dili makaigo kanimo.” (2 Cronicas 6:18) Tinuod, ang karaang mga Israelitas may tabernakulo ug dayon usa ka templo diin sila magtigom alang sa tinuig nga mga pista sumala sa Balaod sa Diyos. (Exodo 23:14-17) Apan sila makaampo sa Diyos sa tanang panahon—samtang nagbantay sa mga hayop, nanguma, naglipaylipay uban sa pamilya, o nag-inusara.—Salmo 65:2; Mateo 6:6.

Kita usab makaampo sa Diyos bisan asa ug bisan unsang orasa. Ang atong sulondan, si Jesu-Kristo, sagad moadto sa mingawng dapit aron mag-ampo. (Marcos 1:35) Pananglitan, kas-a “siya miadto sa bukid aron sa pag-ampo, ug siya nagpadayon sa tibuok gabii sa pag-ampo ngadto sa Diyos.”—Lucas 6:12.

Kay Hudiyo man, si Jesus dili gyod mosipyat pag-adto sa kapistahan didto sa templo sa Jerusalem. (Juan 2:13, 14) Apan siya nagtagna nga ang templo dili na unya mahimong sentro sa matuod nga pagsimba. Sa nakigsulti sa babayeng Samarianhon duol sa bukid sa Samaria, diin didto dunay templo, si Jesus miingon: “Ang takna nagsingabot sa dihang dili dinhi niining bukira ni sa Jerusalem nga kamo magasimba sa Amahan.” Dayon siya midugang nga ang matuod nga mga magsisimba “magasimba sa Amahan uban sa espiritu ug sa kamatuoran.”—Juan 4:21, 23.

Dili mga tinukod nga gama sa tisa ang importante kang Jesus kondili ang matuod ug kinasingkasing nga pagsimba. Apan nagpasabot ba kana nga ang mga sumusunod ni Jesus, nga sa ulahi gitawag ug mga Kristohanon, dili mogamit ug mga tinukod sa pagsimba sa Diyos? (Buhat 11:26) Dili pod, ug may maayong mga rason kon ngano.

Ang Katawhan sa Diyos Maoy Usa ka Espirituwal nga Pamilya

Ang matuod nga mga alagad sa Diyos maoy usa ka espirituwal nga pamilya. (Lucas 8:21) Ang maayong pamilya maghimog daghang buluhaton nga magkauban, sama sa pagpangaon, ug kini makapasuod kanila. Tinuod usab kana sa espirituwal nga paagi. Ang Kristohanong mga tigom maoy espirituwal nga mga pista diin madasig sila ug molig-on ang ilang panag-igsoonay. Si apostol Pablo misulat: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa.”—Hebreohanon 10:24, 25.

Busa ang matuod nga mga magsisimba nahibalo nga hinungdanon kaayo ang kongregasyon kay kini makatabang sa matag usa sa pag-ugmad sa Kristohanong mga hiyas nga dili bug-os maugmad kon mag-inusara. Lakip niini nga mga hiyas mao ang gugma, pagpasaylo, kalulot, kalumo, ug pakigdait.—2 Corinto 2:7; Galacia 5:19-23.

Diin nagtigom ang unang mga Kristohanon alang sa panag-ubanay ug pagsimba? Sagad, sila nagtigom diha sa mga balay. (Roma 16:5; Colosas 4:15) Pananglitan, sa nagsulat si apostol Pablo sa usa ka kaubang Kristohanon, kining sulata gitumong usab sa “kongregasyon nga anaa sa imong balay.”a—Filemon 1, 2.

Ang katawhan sa Diyos usab karon wala magkinahanglag maluhong mga tinukod kondili mga dapit nga komportable alang sa tanang manambong. Ingon niini nga mga tinukod ang gigamit sa mga Saksi ni Jehova nga gitawag nilag Kingdom Hall. Posibleng dunay Kingdom Hall sa inyong lugar. Kini nga mga tinukod simple, maingon man ang mga tigom didto—nga naglakip ug pag-awit, pag-ampo, ug panaghisgot sa Bibliya.

Gipabilhan sa mga Saksi ni Jehova ang ilang pagpakigsuod sa Diyos diha sa pag-ampo. Busa sila adlaw-adlawng mogahin ug panahon sa pag-ampo sa personal ug uban sa pamilya. Ang Santiago 4:8 nag-ingon: “Duol sa Diyos, ug siya moduol kaninyo.”

[Footnote]

NAKAPAMALANDONG KA BA?

● Ang Diyos ba mopuyo sa mga tinukod nga hinimog tawo?—2 Cronicas 6:18.

● Diin nag-ampo si Jesus sa tibuok gabii?—Lucas 6:12.

● Nganong ang matuod nga mga magsisimba magtigom? —Hebreohanon 10:24, 25.

[Blurb sa panid 15]

Duna bay partikular nga mga dapit diin ang imong mga pag-ampo dunggon?