“Nagsugwak nga mga Siyudad”
“Ang mga tawo labi pang nagbalhinbalhin karon kay sukad masukad, ug kadaghanan niadtong namiya sa ilang mga pinuy-anan nga nangitag mas maayong kinabuhi namalhin sa siyudad.”
MAO kiniy giingon sa publikasyong Foreign Affairs diha sa pasiuna sa usa ka artikulo nga nag-ulohang “Ang Nagsugwak nga mga Siyudad sa Nagakaugmad nga Kalibotan.” Sumala nianang artikuloha, daghang tawo ang “nadani sa kaluho, o napugos sa pagbiya sa banika tungod sa politikanhon ug ekonomikanhon nga kasamok, pagpit-os sa populasyon, ug pagkadaot sa ekolohiya.”
Unsa ba gayod ka kusog ang pagdaghan sa populasyon diha sa mga siyudad? Ang uban nagkalkulo nga ang mga tawo nanghugop ngadto sa mga siyudad sa gidaghanon nga kapin sa usa ka milyon kada semana! Diha sa nagakaugmad nga mga nasod kapin sa 200 ka siyudad karon ang dunay mga populasyon nga lapas na sa usa ka milyon. Mga 20 ka siyudad ang nakaabot na sa gidaghanon nga napulo ka milyon! Ug wala kini momenos. Tagda, pananglitan, ang siyudad sa Lagos, Nigeria. Sumala sa usa ka taho sa Worldwatch Institute, “pagka-2015, ang Lagos lagmit mahimo nang pinuy-anan sa duolan sa 25 ka milyong tawo, nga mouswag gikan sa ikatrese nga kinadak-ang siyudad ngadto sa ikatulong kinadak-ang siyudad sa kalibotan.”
Daghang eksperto ang mibati nga dili kini maayong timailhan kon bahin sa umaabot. Si Federico Mayor, kanhing direktor heneral sa United Nations Educational, Scientific, and Cultural Organization, nagpasidaan nga sa tuig 2035, “tulo ka libong milyon pa nga mga tawo ang magpuyo diha sa mga siyudad nga naglungtad karon.” Aron maatiman kining hilabihan ka dakong populasyon, “kita kinahanglang magtukod ug usa ka libong siyudad nga puy-an ug tulo ka milyong molupyo sa mosunod nga kuwarenta ka tuig, bayente singko ka siyudad kada tuig.”
Nag-ingon usab ang mga eksperto nga ang kusog nga pagdaghan sa mga populasyon sa siyudad dunay makadaot nga epekto diha sa mga siyudad sa tibuok kalibotan. Ug naglakip kana sa mga siyudad diha sa mauswagon nga industriyalisadong kalibotan. Unsa ba gayod ang mga suliran nga giatubang sa mga siyudad, ug unsay epekto niini diha kanimo? Aduna bay bisan unsang mga solusyon sa umaabot? Ang sunod nga mga artikulo nagsusi niining hinungdanong mga isyu.