Maayong Panglawas Alang sa Tanan—Haduol Na!

“ANG ideya nga dili na masakit pag-usab . . . maoy popular karon,” nagtaho ang Alemang magasin nga Focus. Apan dili bag-o kining ideyaha. Sa dihang nagsugod ang kinabuhi sa tawo, dili gayod katuyoan sa Maglalalang nga masakit ang tawo. Ang iyang katuyoan alang sa tawo dili lamang “usa ka dalawatong sukod sa panglawas alang sa tanang tawo sa kalibotan.” (Italiko amoa.) Katuyoan sa atong Maglalalang ang hingpit nga panglawas alang sa tanan!

Busa nganong kitang tanan nag-antos sa sakit ug balatian? Ang Bibliya nag-ingon nga gihimo ni Jehova nga Diyos nga hingpit ang mga ginikanan sa tanang tawo, si Adan ug Eva. Sa nahuman niya ang iyang paglalang, “nakita sa Diyos ang tanan nga iyang gibuhat ug, tan-awa! kadto maayo kaayo.” Dili gayod katuyoan sa atong mahigugmaong Maglalalang nga ang kinabuhi sa tawo hasolon sa sakit ug kamatayon. Apan sa dihang si Adan ug Eva mipili sa pagtalikod sa dalan sa kinabuhi nga gilatid alang kanila, sila nakasala. Ang resulta sa Adanikong sala mao ang kamatayon, nga napasa ngadto sa tanang tawo.​—Genesis 1:31; Roma 5:12.

Dili kay basta na lang gisalikway ni Jehova ang tawo. Ni gitalikdan niya ang iyang orihinal nga katuyoan alang kanila ug sa yuta. Sa tibuok Bibliya, iyang gipahibalo ang iyang katuyoan sa pagpasig-uli sa masinugtanong katawhan ngadto sa ilang orihinal nga kahimtang sa maayong panglawas. Samtang si Jesu-Kristo, ang Anak sa Diyos, dinhi sa yuta, iyang gipasundayag ang gahom sa Diyos sa pag-ayo sa mga abnormalidad. Pananglitan, giayo ni Jesus ang pagkabuta, sanla, pagkabungol, pagpanghupong, patol, ug paralisis.​—Mateo 4:​23, 24; Lucas 5:​12, 13; 7:22; 14:1-4; Juan 9:1-7.

Sa dili madugay mandoan sa Diyos ang iyang Mesiyanikong Hari, si Jesu-Kristo, nga mopuli sa pagdumala sa mga kalihokan sa kalibotan sa katawhan. Ilalom sa iyang administrasyon, ang tagna ni Isaias matuman: “Walay pumoluyo nga moingon: ‘Ako masakiton.’ Ang katawhan nga magpuyo sa yuta mao kadtong mga gipasaylo sa ilang kasaypanan.” (Isaias 33:24) Sa unsang paagi kini mahitabo?

Atong namatikdan nga ang propeta nagsulat bahin sa mga tawo nga “gipasaylo sa ilang kasaypanan.” Busa, ang orihinal nga hinungdan sa sakit​—ang napanunod nga sala sa katawhan—​pagawagtangon. Sa unsang paagi? Ang bili sa halad lukat ni Jesus ipadapat sa masinugtanong katawhan, sa ingon nagkuha sa hinungdan sa sakit ug kamatayon. Ang paraisonhong mga kahimtang masinati sa tanang dapit sa yuta. Ang Kristohanong apostol nga si Juan misulat: “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” Haduol na kanang mahitabo!​—Pinadayag 21:​3, 4; Mateo, kapitulo 24; 2 Timoteo 3:1-5.

Paghupot sa Pagkatimbang

Sa kasamtangan, ang sakit ug balatian mao ang kahimtang sa milyonmilyong tawo. Nan, natural lamang nga ang mga tawo mabalaka bahin sa ilang panglawas ug bahin sa panglawas sa ilang mga minahal.

Gipabilhan gayod sa mga Kristohanon karon ang mga paningkamot sa medikal nga propesyon. Mohimo silag makataronganong mga lakang aron mahimong himsog o magpabiling himsog. Apan, ang saad sa Bibliya bahin sa kaugmaon nga walay sakit motabang kanato sa paghupot sa atong pagkatimbang niining bahina. Hangtod ang Mesiyanikong Hari mopuli sa pagdumala sa mga kalihokan sa katawhan, ang hingpit nga panglawas imposible gayod. Sa atong nakita, bisan pa sa labing makapahinganghang mga diskoberiya wala gihapon maabot sa medisina ang kinahinogang bayabas sa tumoy sa kahoy​—ang maayong panglawas alang sa tanan.

Ang tumong nga “usa ka dalawatong sukod sa panglawas alang sa tanang tawo sa kalibotan” makab-ot sa dili na madugay. Apan dili pinaagi sa HK o sa World Health Organization o sa mga tigplano maylabot sa kalikopan o sa mga repormador sa katilingban o sa mga doktor. Kanang maong kalamposan makab-ot lamang ni Jesu-Kristo. Pagkamakalilipay unya sa dihang ang tawo sa kataposan “ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos”!​—Roma 8:21.

[Mga hulagway sa panid 10]

Aduna unyay maayong panglawas alang sa tanan sa bag-ong kalibotan sa Diyos