Sa Dili Madugay Wala nay Sakit o Kamatayon!

WALAY mausa ang mahimuot nga masakit, ni ang mga tawo buot mamatay. Usa ka propesor sa sosyolohiya medikal miasertar: “Ang pagpangita sa mas taas nga kinabuhi daw halos unibersohanon latas sa kasaysayan ug sa kadaghanan sa katilingban. Maylabot kini sa sukaranang tinguha sa pagtipig-kaugalingon . . . Si Ponce de Leon mao lamang ang labing ilado sa taas nga kutay sa mga tawo nga migahin sa ilang kinabuhi sa pagpangita sa mas taas nga kinabuhi. Kadaghanan sa siyensiya medikal gipahanungod sa pagtipig sa mas taas nga kinabuhi pinaagi sa pagkombate sa sakit ug kamatayon.”

Gipahinabo sa kamatayon ang kahapdos sa atong sulod kinaiya nga sa dihang kini mahidangat sa mga higala ug mga membro sa pamilya, halos kanunay kita natural nga mosulay sa paghapin sa hapak niini. Ang librong Funeral Customs the World Over naniid: “Walay grupo, bisan pa unsa ka primitibo o sibilisado, nga pasagdan sa kaugalingon niini ug sa mahimo niini ang dili modispatsar sa mga lawas sa mga membro niini uban sa seremonya. . . . Gitagbaw niini ang lalom unibersohanong kinaiya. Ang pagbuhat niini daw sa ‘maayo,’ ug ang dili pagbuhat niini, labi na niadtong suod konektado sa pamilya, pagbati, ipon nga kinabuhi, kumon nga kasinatian o ubang bugkos, daw ‘sayop,’ dinatural nga paglihay, usa ka butang nga pangayoan ug pasaylo o ikaulaw. . . . [Ang tawo] persona nga molubong sa iyang patay uban sa seremonya.”

Sinugdan sa Sakit ug Kamatayon

Busa ang ideya nga ang sakit ug kamatayon mawagtang usa ka adlaw gamhanang makadani, apan may basihanan ba alang sa maong pagtuo? Oo duna, ug kini rasonable, kasaligan, ug dimasayop. Kini ang dinasig nga Pulong sa atong Maglalalang​—ang Balaang Bibliya.

Klarong gitin-aw nianang basahon ang sinugdan sa tawhanong kaalaot. Gisuginlan kita nga ang unang tawo, si Adan, gilalang sa Diyos ug gipahaluna sa puloy-anan nga paraisong tanaman sa usa ka dapit sa Tungang Silangan. Si Adan gilalang hingpit; ang sakit ug kamatayon wala niya hiilhi. Wala madugay giduyogan siya sa iyang hingpit usab nga asawa, ug magkauban sila duna sa paglaom sa dayong kinabuhi sa yuta.​—Genesis 2:15-17, 21-24.

Kining nindot nga kahimtang wala molungtad ug dugay. Ngano? Tungod kay hakog nga gipili ni Adan ang dalan sa kinabuhi nga independiyente sa Diyos. Miresulta ang hago nga trabaho, sakit, balatian, ug sa kaulahian kamatayon. (Genesis 3:17-19) Gipanunod sa iyang mga kaliwat ang dimalipayong matang sa kinabuhi nga gipili ni Adan. Gitin-aw sa Roma 5:12: “Pinaagi sa usa ka tawo ang sala misulod sa kalibotan ug ang kamatayon pinaagi sa sala, ug busa ang kamatayon mikuyanap sa tanang tawo tungod kay silang tanan nakasala.” Gidugang sa Roma 8:22: “Kita nahibalo nga ang tibuok kalalangan padayon sa pag-agulo ug sa kasakit hangtod karon.”

Sa Yuta o sa Langit?

Bisan pa, gipasaligan kita sa Bibliya nga sa dili madugay ang Diyos mopasig-uli sa masinugtanong katawhan sa malipayong kahimtang nga giwala nila Adan ug Eva. Matod sa Pinadayag 21:3, 4: “Ang Diyos mismo mouban kanila. Ug iyang pahiran ang tanang luha gikan sa ilang mga mata, ug ang kamatayon wala na, ni ang pagbalata ni ang paghilak ni ang kasakit pa. Ang nahaunang mga butang miagi na.” Susamang nakita usab sa karaang manalagna ang panahon dihang “walay residente ang moingon: ‘Masakiton ako.’”​—Isaias 33:24.

Mahanduraw ba nimo ang kalibotan nga walay mga ospital, mga hayaan sa patay, ug mga lubnganan? Mahanduraw ba nimo ang mabuhi nga dayon, libre bisan sa hulga sa pag-antos ug kamatayon? Oo, gitandog sa saad sa Diyos ang mga pagbati nga lalom naa kanatong tanan. Apan, sa unsang paagi kita makaseguro nga kining kahibudnganang paglaom alang sa atong planetang Yuta​—dili sa langit? Matikdi ang konteksto sa gihisgotan sa nag-unang mga teksto sa Kasulatan. Ang unang mga bersikulo sa Pinadayag kapitulo 21 namolong mahitungod sa “usa ka bag-ong langit ug usa ka bag-ong yuta.” Gihimo ang klarong pahayag nga ang Diyos mouban sa katawhan ug sila mahimong iyang katawhan. Ang saad sa basahon sa Isaias nga walay mausa ang masakit gisundan sa reperensiya sa “katawhan nga nagpuyo sa yuta,” nga “gipasaylo sa ilang kasal-anan.”

Busa gipunting niining makadasig nga mga saad ang kinabuhi sa yuta! Ug kini harmonya sa pag-ampo ni Jesus sa iyang Amahan: “Pasagdi nga matuman ang imong kabubut-on, maingon sa langit, mao man sa yuta.”​—Mateo 6:10.

Nganong sa Dili Madugay?

Gitabangan sa mga Saksi ni Jehova ang minilyon nga makaamgo nga kining mga saad matuman sa haduol nga umaabot. Sa unsang basihanan, bisan pa, gibati nila nga segurado kaayo niini? Basi sa naghingaping ebidensiya nga kita nagkinabuhi na sa “kataposang mga adlaw” sa presente nga sistema, o kahikayan, sa mga butang sa yuta. (2 Timoteo 3:1-5) Gihangyo sa mga disipolo ni Jesus ang ilhanan kon kanus-a kining konklusyon sa mga butang mahitabo. Ingong tubag gitagna ni Jesus sa detalye ang anam-anam nga uswag sa mga hitabo sa kalibotan nga nahitabo sukad sa pagbuto sa Gubat sa Kalibotan I sa 1914.a Unya iyang gidugang: “Sa dihang inyong makita kining tanang mga butang, hibaloi nga siya haduol na sa mga ganghaan. Sa pagkamatuod ako magaingon kaninyo nga sa dili pa mahanaw kining kaliwatana kining tanang mga butang mahitabo.” Busa ang pipila sa kaliwatan nga nabuhi sukad 1914 buhi nga makakita sa kataposan sa karon sistema sa kalibotan.​—Mateo 24:33, 34.

Nianang panahona suguon ni Jehova nga Diyos ang iyang Anak, si Kristo Jesus, sa pag-asdang ug paglaglag sa tanang hinongdan sa pag-antos ug kaalaot sa nawong niining matahom planetang Yuta. Namolong ang Bibliya sa pagwagtang sa pagkadaotan ingon “gubat sa dakong adlaw sa Diyos nga Labing Gamhanan” sa Armagedon.​—Pinadayag 16:14, 16.

Dakong gidaghanon sa mahadlokon-Diyos nga katawhan ang makalabang buhi niining makalilisang nga kaugmaran ug mabuhi sa pagkakita sa pagsugod sa malinawong pagmando ni Kristo Jesus. (Pinadayag 7:9, 14; 20:4) Bisan pa kining pagmandoa gikan sa langit, ang mapuslanong mga resulta niini pahimudsan niadtong tanang mabuhi sa yuta​—ang mga makalabang buhi sa gubat sa Armagedon ug minilyon sa minilyon kinsa sa kaulahian banhawon gikan sa mga minatay. Unya ang saad mahimong matuod: “Siya [Kristo] kinahanglan momando ingon hari hangtod ibutang sa Diyos ang tanang kaaway ubos sa iyang mga tiil. Ug ingon kataposang kaaway, ang kamatayon pagalaglagon.”​—1 Corinto 15:25, 26.

Busa kita sa masaligon makapahayag: “Sa dili madugay wala nay sakit o kamatayon!” Dili kini damgo lamang, ni kini mahandurawong hunahuna lamang. Kini seguro nga saad ni Jehova nga Diyos, “kinsa dili makabakak.” Ibutang ba nimo ang imong pagsalig niining paglaoma? Kini makaayo kanimo sa walay kataposan!​—Tito 1:2.

[Footnote]

[Hulagway sa panid 7]

Sa dili madugay ang sakit ug kamatayon pulihan sa lagsik maayong lawas ug dayong kinabuhi