TUBAG SA MGA PANGUTANA BAHIN SA BIBLIYA
Sa unsang paagi kita nakabenepisyo sa kamatayon ni Jesus?
Dihang gilalang sa Diyos ang mga tawo, buot niyang mabuhi sila sa walay kataposan sa yuta nga dili masakit o mamatay. Apan ang unang tawo, si Adan, misupak sa Maglalalang ug nawad-ag paglaom nga mabuhi sa walay kataposan. Kay kaliwat ni Adan, atong napanunod kaniya ang kamatayon. (Roma 5:8, 12; 6:23) Ang matuod nga Diyos, si Jehova, nagpadala sa iyang Anak, si Jesus, dinhi sa yuta aron mamatay ug lukaton ang giwala ni Adan.—Basaha ang Juan 3:16.
Si Jesus namatay aron mabatonan sa katawhan ang kinabuhing walay kataposan. Unsaon nimo paghulagway ang kinabuhing walay kataposan sa yuta?
Tungod sa kamatayon ni Jesus, naposible ang kapasayloan sa atong mga sala ug ang kinabuhing walay kataposan. Gihulagway sa Bibliya kon unsa unyay kinabuhi dinhi sa yuta dihang kita dili na matigulang, masakit, ug mamatay.—Basaha ang Isaias 25:8; 33:24; Pinadayag 21:4, 5.
Sa unsang paagi nato handomon ang kamatayon ni Jesus?
Sa gabii una siya mamatay, giingnan ni Jesus ang iyang mga sumusunod nga handomon ang iyang kamatayon pinaagig simpleng seremonyas. Pinaagi sa paghandom sa kamatayon ni Jesus nianang paagiha kada tuig, atong mapamalandong kon unsa ka dako ang gugma ni Jesus ug ni Jehova alang sa katawhan.—Basaha ang Lucas 22:19, 20; 1 Juan 4:9, 10.
Niining tuiga, ang Memoryal sa kamatayon ni Jesus matunong sa Lunes, Abril 14, human sa pagsalop sa adlaw. Ikaw gidapit sa pagtambong uban sa mga Saksi ni Jehova sa inyong dapit.—Basaha ang Roma 1:11, 12.