Ang Hunahuna sa Bibliya
Ang Tanan Bang Relihiyon Maoy Lainlaing mga Dalan Padulong sa Diyos?
“NAKAPLAGAN ko nga halos dili katuohan nga gipili sa Diyos sa tibuok uniberso nga mailhan siya pinaagi sa usa ka relihiyosong tradisyon,” nag-ingon ang awtor nga si Marcus Borg. Ang nakadaog sa Nobel Peace Prize nga si Desmond Tutu miingon: “Walay relihiyon nga makapangangkong nabatonan niini ang bug-os nga kamatuoran bahin sa misteryo” sa pagtuo. Ang usa ka iladong panglantaw sa mga Hindu mao ang “Jotto moth, totto poth,” nga kon hubaron nato nagpasabot nga ang tanang relihiyon maoy lainlaing mga dalan lamang padulong sa samang tumong. Ang mga Budhista nagtuo usab niini. Sa pagkatinuod, milyonmilyong tawo nagtuo nga ang tanang relihiyon maoy lainlaing mga dalan padulong sa Diyos.
Ang magsusulat sa kasaysayan nga si Geoffrey Parrinder miingon: “Usahay gikaingon nga ang tanang relihiyon adunay samang tumong, o samang mga paagi sa kamatuoran, o nga ang tanan nagtudlo pa gani sa samang mga doktrina.” Ang mga pagtulon-an, mga rituwal, ug mga diyos sa mga relihiyon maoy susama gayod. Ang kadaghanang relihiyon nagahisgot bahin sa gugma ug nagatudlo nga ang pagbuno, pagpangawat, ug pagpamakak maoy daotan. Diha sa kadaghanang relihiyosong mga grupo, ang pipila sinserong naningkamot sa pagtabang sa uban. Busa, kon ang usa sinsero sa iyang mga gituohan ug magkinabuhi nga dalayegon, hinungdanon ba kon unsang relihiyona ang iyang gipasakopan? O ang tanan bang relihiyon maoy lainlaing mga dalan lamang padulong sa Diyos?
Pagkasinsero Lamang—Igo na ba Kini?
Tagda ang kahimtang sa unang-siglong Hudiyong lalaki nga ginganlag Saulo, kinsa nahimong unang-siglong Kristohanong apostol nga nailhang si Pablo. Usa siya ka masiboton kaayong sumusunod sa Judaismo, ug kini ang nag-agak kaniya nga paningkamotang pahunongon ang pagsimba sa mga sumusunod ni Kristo, kansang pagsimba gibati niyang dili husto. (Buhat 8:1-3; 9:1, 2) Apan pinaagi sa kaluoy sa Diyos nakaamgo si Saulo nga ang relihiyoso kaayong mga tawo nga sama kaniya mahimong may kasibot alang sa Diyos, ug bisan pa niana, tungod kay wala kanila ang tanang kamatuoran, sila mahimong sayop. (Roma 10:2) Sa dihang dugang nahibaloan ni Saulo ang bahin sa kabubut-on ug mga pakiglabot sa Diyos, siya nag-usab ug misugod pagsimba kauban sa mismong mga tawo nga iyang gilutos kanhi—ang mga sumusunod ni Jesu-Kristo.—1 Timoteo 1:12-16.
Nag-ingon ba ang Bibliya nga adunay gatosan ka pagtuo nga kapilian ug nga bisan unsay atong pilion kini maoy dalawaton sa Diyos? Nakadawat si apostol Pablo ug mga instruksiyon gikan sa gibanhawng Jesu-Kristo nga nagsultig kaatbang kaayo. Gipadala siya ni Jesus ngadto sa mga tawo sa kanasoran “aron sa pagpabuka sa ilang mga mata, aron sa pagpaliso kanila gikan sa kangitngit ngadto sa kahayag ug gikan sa awtoridad ni Satanas ngadto sa Diyos.” (Buhat 26:17, 18) Tin-aw, hinungdanon ang atong pagpili sa relihiyon. Daghan sa katawhan diin si Pablo gipadala aduna nay relihiyon. Apan sila diha sa “kangitngit.” Sa pagkatinuod, kon ang tanang relihiyon maoy lainlaing mga dalan lamang padulong sa kinabuhing walay kataposan ug pag-uyon sa Diyos, dili na unta kinahanglang bansayon ni Jesus ang iyang mga sumusunod alang sa buluhatong paghimog mga tinun-an nga iyang gisugo kanila nga buhaton.—Mateo 28:19, 20.
Sa iyang bantog nga Wali sa Bukid, si Jesus miingon: “Sulod kamo agi sa sigpit nga ganghaan; tungod kay halapad ug haluag ang dalan padulong sa kalaglagan, ug daghan ang mga nagasulod agi niini; samtang sigpit ang ganghaan ug hagip-ot ang dalan padulong sa kinabuhi, ug diyutay ra ang mga nakakaplag niini.” (Mateo 7:13, 14) Ang Bibliya tin-awng nagsulti nga adunay “usa ka pagtuo.” (Efeso 4:5) Dayag, daghan nga anaa sa “haluag” nga dalan aduna nay relihiyon. Apan wala nila mabatoni ang “usa ka pagtuo.” Sanglit adunay usa lamang ka matuod nga dagway sa pagsimba, kadtong nagtinguha sa pagkaplag nianang matuod nga pagtuo kinahanglang mangita niana.
Pagpangita sa Matuod nga Diyos
Sukad pa sa mismong pagsugod sa kasaysayan sa tawo, ang Diyos nagsulti sa mga tawo kon unsay buot niyang buhaton nila. (Genesis 1:28; 2:15-17; 4:3-5) Karon ang iyang mga kinahanglanon tin-awng gisaysay diha sa Bibliya. Nagpaposible kini kanato sa pag-ila tali sa dalawatong pagsimba ug dili-dalawatong pagsimba. (Mateo 15:3-9) Napanunod sa pipila ka tawo ang ilang relihiyon, samtang ang uban misunod lamang sa kinabag-an diha sa komunidad. Alang sa daghan, ang relihiyon gitino kon kanus-a o diin sila gipanganak. Apan, angay ba nimong taghaptaghapon ang imong pagpili sa relihiyon o tugotan nga ang uban maoy modesisyon alang kanimo?
Ang imong pagpili sa relihiyon angayng usa ka may-kasayorang pagpili nga gipasukad sa mainampingong pagsusi sa Kasulatan. Sa unang siglo, labaw pa ang gihimo sa pipila ka edukadong mga tawo kay sa yano lang nga pagdawat sa tin-awng kahinungdanon sa mga pulong ni apostol Pablo. Ilang ‘gisusi nga maampingon ang Kasulatan sa adlaw-adlaw kon tinuod ba kining mga butanga.’ (Buhat 17:11; 1 Juan 4:1) Nganong dili nimo buhaton ang ingon?
Gihubit sa Bibliya ang Diyos sa uniberso ingong nagapangita sa katawhan nga mosimba kaniya sa kamatuoran. Sumala sa natala sa Juan 4:23, 24, si Jesus misaysay: “Bisan pa niana, ang takna nagsingabot, ug mao na karon, sa dihang ang matuod nga mga magsisimba magasimba sa Amahan uban sa espiritu ug sa kamatuoran, kay, sa pagkatinuod, ang Amahan nagapangita sa mga ingon kanila aron magasimba kaniya. Ang Diyos maoy Espiritu, ug silang magasimba kaniya kinahanglan nga magasimba uban sa espiritu ug sa kamatuoran.” Ang “pagsimba nga hinlo ug wala mahugawi sa panglantaw sa atong Diyos ug Amahan” mao lamang ang dalawaton kaniya. (Santiago 1:27) Gipanalanginan sa Diyos ang pagpangita sa milyonmilyong tawo aron makaplagan ang sigpit nga dalan padulong sa kinabuhi. Siya dili mohatag ug kinabuhing walay kataposan ngadto kanilang walay-interes kondili ngadto kanilang naghimog tinuod nga paningkamot sa pagpangita sa sigpit nga dalan nga iyang gitagana ug dayon nagsubay niana.—Malaquias 3:18.