Ang Kahibulongan nga Kahoyng Tule

TINAMPO SA MAGSUSULAT SA PAGMATA! SA MEXICO

ANG kinatas-ang mga kahoy sa kalibotan mao ang mga redwood sa California, nga makaabot sa gitas-ong 110 metros o mas pa. Bisan pa niana, ang sipro sa Mexico, nga kabanay sa sequoia, maoy naghupot sa rekord alang sa sirkumperensiya. Ang labing bantogang sampol nianang kahoya makita walo ka milya sidlakan sa siyudad sa Oaxaca, Mexico, sa lungsod sa Santa María del Tule. Kini nailhan usab nga kahoyng Tule. Ang sukod sa punoan niini maoy makapahingangha nga 46 metros. Sa paghatag kanimog ideya bahin sa gidak-on niini, kinahanglanon ang labing menos 30 ka tawo nga nagtindog nga dinupa ang mga bukton aron malikosan ang bagang punoan niini, ug kapin sa 500 ka tawo ang makapasilong sa landong niini!

Gibanabana nga ang kahoyng Tule nag-edad nag kapin sa 2,000 ka tuig. Sa dihang gipul-ongan kini niadtong 1996, napulo ka tonelada nga patayng kahoy ang natangtang. Gitawag sa mga molupyo sa maong dapit ang kahoy nga El Gigante (ang Higante). Sa Mexico ang maong espisye nailhang ahuehuete, nga sa pinulongang Nahuatl nagpasabot nga “tigulang sa tubig,” kay kasagarang motubo kini sa daplin sa tubig o sa mga lamaknan.