Makapatagbawng Ilimnon Gikan sa Usa ka Talagsaong Tanom
TINAMPO SA MAGSUSULAT SA PAGMATA! SA NIGER
GUSTO ba nimong moinom ug bugnawng ilimnon sa usa ka igang nga adlaw? Gusto sa daghang pamilya sa Kasadpang Aprika ang usa ka makapatagbawng ilimnon nga buloknon, lami, makapahimsog, ug barato—ug, kini ginama gikan sa usa ka tanom. Ang ilimnon gitawag ug bissap, ug ang mamulak nga tanom nga gikuhaan niini mao ang tropikanhong roselle o usa ka matang sa antulanga. Kining tanoma makaabot sa gitas-ong duha ka metros o taas pa. Motubo kini sa nagkalainlaing mga rehiyon sa kalibotan apan ilabina diha sa mas init nga mga klima sa mga nasod sama sa Niger, Mali, ug Senegal.
Kon Unsaon Paggama sa Bissap
Usa ka kutsarang dahon nga nagputos sa piyoos sa maong tanom ibutang sa duolag usa ka litrong tubig. Ang kombinasyon pabukalon ug unya pasagdan nga naghulom sulod sa 15 ngadto 20 minutos. Ang mga dahon nga nagputos sa piyoos salaon, ug ang tsa mainom init man o bugnaw, may kalamay o wala. Karong adlawa buot natong mogamag bugnawng ilimnon nga magustohan sa mga bata, busa idugang nato ang kalamay. Ang pipila ka pamilya usab mogama sa ilimnon uban sa pahumot nga yerbabuyna o vanilla. Ang bugnaw, dugom-pula nga bissap ibubo ngadto sa gagmay, tin-awng plastik nga mga putos, nga ibaligtos sa itaas. Kini andam na karong iapod-apod ngadto sa mahinamong mga bata! Malipayon nilang kusniton ang usa ka eskina sa putos ug magkalipay sa ilang paboritong ilimnon. Hinuon, ang uban mopalabi sa pag-inom niini gikan sa baso.
Gawas sa pagkalami, ang bissap makaayo kono kanimo. Kini adunay calcium, phosphorous, iron, bitamina A ug C, ug uban pa! Ang pipila nag-ingon nga ang bissap maoy dili-isog nga purga, makapaihi, ug makapaabtik sa atay. Bisan kon unsay mga sustansiya niini, malipay gayod kita nga gawas sa pagkanindot tan-awon, kining tanoma motagana usab kanatog makapahimsog, makapatagbawng ilimnon!
[Picture Credit Line sa panid 31]
Photo by Kazuo Yamasaki