Akong Gidawat ang Hunahuna sa Diyos Bahin sa Dugo

Usa ka Doktor Miasoy sa Iyang Sugilanon

DIDTO ako sa awditoryum sa ospital, nga nagsumaryo sa resulta sa usa ka awtopsiya ngadto sa usa ka grupo sa mga doktor. Ang namatay nga pasyente may makamatayng tumor, ug ako miingon, “Makahinapos kita nga ang direktang hinungdan sa pagkamatay niining pasyenteha mao ang pagkadaot sa pulang mga selula sa dugo ug ang grabeng pagkadaot sa rinyon gumikan sa pag-abonog daghang dugo.”

Usa ka propesor mitindog ug masuk-anong misinggit, “Buot ba nimong ipasabot nga kami nag-abonog sayop nga tipo sa dugo?” Mitubag ako, “Dili kanay akong gipasabot.” Nga mipasundayag ug pipila ka slide sa gagmayng mga bahin sa rinyon sa pasyente, ako midugang, “Atong makita ang pagkabungkag sa daghang pulang mga selula sa dugo diha sa rinyon ug busa kita makahinapos nga mao kini ang hinungdan sa grabeng pagkadaot sa rinyon.”a Ang kahimtang nahimong dili kalmado, ug nauga ang akong baba tungod sa kakulba. Bisan pag ako maoy batan-ong doktor ug siya maoy propesor, gibati ko nga dili mahimong akong isibog ang akong argumento.

Sa dihang nahitabo ang maong kasinatian, ako dili pa usa ka Saksi ni Jehova. Natawo ako sa 1943 sa Sendai, usa ka siyudad sa amihanang bahin sa Hapon. Kay ang akong amahan maoy usa ka pathologist ug sikyatrista, midesidir ako nga mokuha sa kurso sa medisina. Sa ikaduha kong tuig sa tunghaan sa medisina, niadtong 1970, ako naminyo sa usa ka dalaga nga ginganlag Masuko.

Pagsulod sa Natad sa Patolohiya

Nanarbaho si Masuko sa pagsuportar kanamo samtang gitapos ko ang akong pagtuon. Ang natad sa medisina nakapainteres kanako. Ako nahibulong kaayo sa maayong-pagkabuhat nga lawas sa tawo! Bisan pa niana, wala gayod ako maghunahuna nga adunay Maglalalang. Nagtuo ako nga ang medikal nga panukiduki makahatag ug kahulogan sa akong kinabuhi. Busa human sa pagkahimong doktor, gipili ko nga mopadayon sa akong pagtuon sa medisina pinaagi sa pagsulod sa natad sa patolohiya​—nga mao ang pagtuon sa mga kinaiya, mga hinungdan, ug mga epekto sa balatian.

Samtang nag-awtopsiya sa mga pasyente nga namatay sa kanser, ako nagduhaduha na sa pagkaepektibo sa pag-abonog dugo. Ang mga pasyente nga may grabe nang kanser tingali anemik tungod sa paghemoreds. Kay ang chemotherapy makapagrabe man sa anemya, ang mga doktor kasagarang moresetag abono sa dugo. Bisan pa niana, natahap ako nga ang abono sa dugo makapakaylap lang sa kanser. Hinuon, nasayran na karon nga ang abono sa dugo makapahinabog immunosuppression, nga makapadako sa posibilidad nga ang tumor mobalik ug mamenosan ang lugway sa kinabuhi sa mga pasyenteng may kanser.b

Sa 1975, akong nasinati ang kaso nga gihisgotan sa sinugdan sa artikulo. Ang propesor mao ang nagdumala sa operasyon ug maoy espesyalista sa hematology. Busa dili katingad-ang siya nasuko sa dihang siya nakadungog sa akong giingon nga ang pag-abono ug dugo maoy hinungdan sa pagkamatay sa pasyente! Bisan pa niadto, akong gipadayon ang akong presentasyon, ug siya inanayng mikalma ra.

Walay Sakit o Kamatayon

Sa maong panahon giduaw ang akong asawa sa usa ka edarang babaye nga usa ka Saksi ni Jehova. Iyang gigamit ang pulong “Jehova” sa iyang pagsangyaw, ug ang akong asawa nangutana kon unsay kahulogan niana. Ang Saksi mitubag, “Jehova ang ngalan sa matuod nga Diyos.” Si Masuko nagbasa sa Bibliya sukad pa sa iyang pagkabata, apan ang ngalan sa Diyos gipulihan ug “GINOO” diha sa Bibliya nga iyang gigamit. Niadtong higayona iyang nasayran nga ang Diyos maoy usa ka persona nga adunay ngalan!

Misugod dayon si Masuko sa pagtuon sa Bibliya uban sa edaran nga Saksi. Sa akong pag-abot sa balay gikan sa ospital sa mga ala-1:00 s.b., ang akong asawa mahinamong misugilon kanako, “Ang Bibliya nag-ingon nga ang sakit ug ang kamatayon hanawon!” Mitubag ako, “Pagkanindot unya niana!” Mipadayon siya, “Sanglit haduol na ang bag-ong kalibotan, dili ko gustong imong usikan ang imong panahon.” Abi ko ug gusto niya nga mohunong ako sa pagkadoktor, busa ako nasuko ug ang among relasyon nahimong dili kaayo hapsay.

Apan ang akong asawa wala mohunong sa pagpukaw sa akong interes. Mainampoon siyang nangitag nahiangay nga mga kasulatan ug iya kanang gipakita kanako. Ang mga pulong sa Ecclesiastes 2:​22, 23 ang ilabinang nakatandog sa akong kasingkasing: “Unsay naangkon sa tawo sa tanan niyang kahago ug sa pagsingkamot sa iyang kasingkasing diin siya naghago ilalom sa adlaw? . . . Sa magabii ang iyang kasingkasing dili makapahulay. Kini usab kakawangan lamang.” Mapadapat kini sa akong gihimo​—gigamit ko ang akong kinabuhi sa medikal nga siyensiya adlaw ug gabii apan wala ako makakaplag ug tinuod nga katagbawan.

Usa ka buntag sa Dominggo sa Hulyo 1975, sa pag-adto sa akong asawa sa Kingdom Hall sa mga Saksi ni Jehova, kalit akong nakadesidir nga moadto usab didto. Natingala kaayo ang akong asawa sa pagkakita niya kanako didto, ug ako mainitong giabiabi sa mga Saksi. Sukad niadto, tigtambongan na ako sa tigom kada Dominggo. Duolan sa usa ka bulan sa ulahi, ang usa ka Saksi misugod sa pagdumalag pagtuon sa Bibliya uban nako. Tulo ka bulan human sa unang pagbisita sa mga Saksi ni Jehova sa akong asawa, siya nabawtismohan.

Pagdawat sa Hunahuna sa Diyos Bahin sa Dugo

Sa wala madugay akong nakat-onan nga ang Bibliya nagsugo sa mga Kristohanon nga ‘moayad sa dugo.’ (Buhat 15:28, 29; Genesis 9:4) Sanglit ako may pagduhaduha na bahin sa pagkaepektibo sa abono sa dugo, dali kong nadawat ang hunahuna sa Diyos bahin sa dugo.c Naghunahuna ako, ‘Kon adunay Maglalalang ug kanay iyang ginaingon, nan husto gayod kana.’

Nakat-onan ko usab nga ang hinungdan sa sakit ug kamatayon mao ang sala nga napanunod gikan ni Adan. (Roma 5:12) Niadtong panahona, ako nanukiduki bahin sa arteriosclerosis. Samtang kita magkaedaran, ang atong mga arteriya mogahi ug mohiktin, nga makapahinabo ug mga sakit sama sa mga sakit sa kasingkasing, mga sakit sa utok, ug sakit sa rinyon. Makataronganon nga ang hinungdan mao ang atong napanunod nga pagkadili-hingpit. Human niadto, ang akong kasibot sa medisina naawop. Si Jehova nga Diyos lamang ang makahanaw sa sakit ug kamatayon!

Niadtong Marso 1976, human sa pito ka bulan nakong pagtuon sa Bibliya, gihunong ko ang akong panukiduki diha sa ospital sa unibersidad. Nahadlok ako nga dili na ako makatrabaho pag-usab ingong doktor, apan nakakaplag akog trabaho sa laing ospital. Nabawtismohan ako niadtong Mayo 1976. Nakahukom ako nga ang labing maayong paagi nga akong gamiton ang akong kinabuhi mao ang pag-alagad ingong bug-os-panahong tig-ebanghelyo, o payunir, nga akong gisugdan sa Hulyo 1977.

Pagdepensa sa Hunahuna sa Diyos Bahin sa Dugo

Niadtong Nobyembre 1979, kami ni Masuko mibalhin ngadto sa usa ka kongregasyon sa Chiba Prefecture diin dako ang panginahanglan alang sa mga magwawali. Nakakaplag akog ospital diin nakatrabaho akog partaym. Sa una kong adlaw sa trabaho, gialirongan ako sa usa ka grupo sa mga siruhano. Walay puas ang ilang pagsukna kanako, “Ingong usa sa mga Saksi ni Jehova, unsay imong buhaton kon adunay usa ka pasyente nga nagkinahanglag abono sa dugo?”

Sa matinahorong paagi akong gipatin-aw nga sundon ko ang ginaingon sa Diyos bahin sa dugo. Gipatin-aw ko nga adunay mga kapuli sa abono sa dugo ug buhaton ko ang akong maarangan sa pagtabang sa akong mga pasyente. Human sa mga usa ka oras nga panaghisgot, ang pangulo sa siruhiya mitubag, “Nasabtan ko. Apan kon dad-on dinhi ang usa ka pasyente nga nawad-an ug daghan kaayong dugo, kami na lay moatiman kaniya.” Ang pangulo sa siruhiya nailhan nga usa ka tawong lisod ikasabot, apan human niadtong panaghisgota kami nakaugmad ug maayong relasyon, ug siya kanunayng nagtahod sa akong mga tinuohan.

Pagtahod sa Dugo Gisulayan

Samtang nag-alagad kami sa Chiba, ang bag-ong hedkuwarter sa mga Saksi ni Jehova sa Hapon ginatukod niadto sa Ebina. Kami sa akong asawa tigdrayb paingon didto kausa sa usa ka semana aron maatiman ang panglawas sa mga boluntaryong Saksi nga nagtukod sa maong pasilidad, nga gitawag ug Bethel. Paglabay sa pipila ka bulan, nakadawat kamig imbitasyon nga moalagad nga bug-os panahon sa Ebina Bethel. Busa, niadtong Marso 1981 misugod kami pagpuyo sa temporaryong mga tinukod nga gipuy-an sa kapig 500 ka boluntaryong trabahante. Sa buntag, ako motabang paghinlo sa banyo ug mga kasilyas sa dapit sa konstruksiyon, ug sa hapon ako mohimog medikal nga mga pagsusi.

Usa sa akong mga pasyente mao si Ilma Iszlaub, nga miabot sa Hapon gikan sa Australia niadtong 1949 isip misyonarya. Siya may sakit nga leukemia ug giingnan sa iyang mga doktor nga pipila na lang ka bulan ang iyang kinabuhi. Si Ilma wala magpaabonog dugo aron malugwayan ang iyang kinabuhi ug mipalabi nga didto magpuyo sa Bethel hangtod sa iyang pagkamatay. Niadtong panahona ang mga tambal nga makadasig sa produksiyon sa pulang selula sa dugo, sama sa erythropoietin, wala pa. Busa may mga higayon nga ang iyang hemoglobin mius-os ngadto sa 3 o 4 ka gramo! (Ang normal maoy 12 ngadto 15.) Apan gibuhat ko ang akong maarangan sa pagtambal kaniya. Si Ilma nagpadayon sa pagpasundayag sa iyang dili-matarog nga pagtuo sa Pulong sa Diyos hangtod siya namatay sa Enero 1988​—mga pito ka tuig sa ulahi!

Latas sa katuigan ang ubay-ubayng boluntaryo sa sangang buhatan sa mga Saksi ni Jehova sa Hapon nagkinahanglag operasyon. Dalayegon ang mga doktor sa duol nga mga ospital kay sila mikooperar pinaagi sa paghimo sa mga operasyon nga walay abono sa dugo. Ako gidapit sa daghang higayon nga mosulod sa lawak sa operasyon aron motan-aw sa mga paagi, ug may mga higayon nga ako miayuda sa operasyon. Mapasalamaton ako sa mga doktor nga nagpakitag pagtahod sa baroganan sa mga Saksi ni Jehova bahin sa dugo. Ang pagtrabaho kauban nila naghatag kanakog daghang kahigayonan sa pagpaambit sa akong mga tinuohan. Usa sa mga doktor karong bag-o nahimong bawtismadong Saksi.

Makaiikag, ang paningkamot sa mga doktor sa pagtambal sa mga Saksi ni Jehova nga walay abono sa dugo may dakong epekto diha sa pagpanambal. Ang mga operasyon nga walay abono sa dugo naghatag ug ebidensiya sa mga kaayohan sa paglikay sa abono sa dugo. Gipadayag sa mga pagtuon nga ang mga pasyente mas daling maulian ug diyutay rag suliran human sa operasyon.

Pagpadayon sa Pagkat-on Gikan sa Labing Maayong Doktor

Naningkamot ako nga makanunot sa kinabag-ohang mga kauswagan sa medisina. Bisan pa niana, nagpadayon usab ako sa pagkat-on gikan ni Jehova, ang labing maayong Doktor. Siya dili lamang makakita kon unsay anaa sa gawas, kondili siya makakita sa atong katibuk-ang pagkatawo. (1 Samuel 16:7) Isip doktor, naningkamot ako sa pagtambal sa matag pasyente ingong bug-os nga tawo, nga dili lang ang iyang sakit ang hatagag pagtagad. Tungod niini ako makahatag ug mas maayong medikal nga pag-atiman sa usa ka pasyente.

Nag-alagad gihapon ako sa Bethel, ug ang pagtabang sa uban nga makakat-on bahin kang Jehova​—lakip ang iyang hunahuna bahin sa dugo​—maoy usa gihapon sa akong kinalabwang mga kalipay. Giampo ko nga sa dili madugay hanawon na sa Dakong Doktor, si Jehova nga Diyos, ang tanang sakit ug kamatayon.​—Sumala sa giasoy ni Yasushi Aizawa.

[Mga footnote]

[Blurb sa panid 14]

“Gipatin-aw ko nga adunay mga kapuli sa abono sa dugo ug buhaton ko ang akong maarangan sa pagtabang sa akong mga pasyente”

[Blurb sa panid 15]

“Ang mga operasyon nga walay abono sa dugo naghatag ug ebidensiya sa mga kaayohan sa paglikay sa abono sa dugo”

[Mga hulagway sa panid 15]

Itaas: Naghatag ug pakigpulong sa Bibliya

Tuo: Uban sa akong asawa, si Masuko, karong adlawa