Ang Pamesti ug Panghindik Maoy Nakapugong Kanako sa Pagdawat sa Kamatuoran

SUMALA SA GIASOY NI EILEEN BRUMBAUGH

AKO gimatuto sa relihiyong Old Order German Baptist Brethren, nga susama sa relihiyong Amish ug Mennonite. Ang relihiyong Brethren nagsugod sa Alemanya sa 1708 ingong bahin sa espirituwal nga pagkanahigmata nga gitawag ug Pietismo. Ang The Encyclopedia of Religion nag-ingon nga ang Pietismo nailhan pinaagi sa “panglantaw niini nga ang katawhan nanginahanglan sa ebanghelyo ni Kristo.” Kana nga panglantaw mitultol sa maong relihiyon sa paglansad ug malamposong misyonaryong mga kampanya sa lainlaing kayutaan.

Sa 1719 usa ka gamayng grupo nga gipangunahan ni Alexander Mack miabot sa dapit nga gitawag karon ug Pennsylvania, sa Tinipong Bansa. Sukad niadto, dihay dugang mga grupo ang naporma ug mibulag sa usag usa. Ang matag grupo nagsunod sa kaugalingong interpretasyon niini sa mga pagtulon-an ni Alexander Mack. Ang among gamayng simbahan may 50 ka membro. Gipasiugda ang pagbasag Bibliya ug bug-os nga pagsunod sa opisyal nga mga desisyon sa mga membro sa simbahan.

Sa labing menos tulo ka kaliwatan, ang akong pamilya naghupot niining maong pagtuo ug paagi sa kinabuhi. Mianib ako sa maong relihiyon ug nabawtismohan sa dihang ako 13 anyos. Gimatuto ako sa pagtuo nga sayop ang pagpanag-iya ug paggamit ug awto, traktora, telepono, o radyo o bisan unsang dekoryenteng butang. Ang among mga kababayen-an simpleng mamesti, ug dili kami magpaputol sa among buhok ug kanunay kaming magpandong sa ulo. Ang among mga kalalakin-an dunay bungot. Sa among hunahuna, ang pagkadili-bahin sa kalibotan nagkahulogan ug dili pagsul-ob ug modernong mga sinina, paggamit ug mek-ap, o alahas, nga para namo maoy mga pasundayag sa makadaot nga garbo.

Gitudloan kami sa pagpakitag dakong pagtahod sa Bibliya, nga among giisip nga among espirituwal nga pagkaon. Kada buntag una pa mamahaw, magtigom mi sa sala ug maminaw kang Papa nga magbasag usa ka kapitulo gikan sa Bibliya ug magkomento bahin sa iyang gibasa. Dayon kaming tanan moluhod samtang mag-ampo si Papa. Human niana, sumaysumayon ni Mama ang Amahan Namo. Maghinamhinam gayod ako sa among pagsimba sa buntag, tungod kay mag-uban ang tibuok pamilya, nga maghisgot sa espirituwal nga mga butang.

Nagpuyo kami sa usa ka uma duol sa Delphi, Indiana, diin nananom mig lainlaing matang sa mga utanon. Among hakoton kini ngadto sa lungsod pinaagig kabayo o karwahe, ug dayon amo kining ibaligya diha sa dalan o sa mga balay. Para namo ang pagkugi maoy bahin sa among pag-alagad sa Diyos. Busa puliki kami niini, gawas kon Dominggo, sa dihang dili kami motrabaho ug bug-at nga trabaho. Apan, usahay ang among pamilya puliki kaayo sa among uma nga nahimong hagit ang pag-una sa espirituwal nga mga butang.

Kaminyoon ug Pamilya

Sa 1963, sa dihang ako 17 anyos, naminyo ako kang James, laing membro sa Old Brethren. Ang iyang mga apohan sa sungkod maoy mga membro na sa relihiyong Old Brethren. Kaming duha may kusganong tinguha sa pag-alagad sa Diyos ug nagtuo nga ang among relihiyon mao ang bugtong matuod nga relihiyon.

Sa pagka-1975 nakabaton mig unom ka anak, ug sa 1983 natawo ang among ikapitong anak nga kinamanghoran. Si Rebecca, nga sunod sa kamagulangan, mao ang bugtong babaye. Nagkugi mi, nagdaginot sa gasto, ug nagkinabuhing yano. Naningkamot mi sa pagsilsil diha sa among mga anak sa mga prinsipyo sa Bibliya nga among nakat-onan gikan sa among mga ginikanan ug sa ubang membro sa Old Brethren.

Ang panggawas nga panagway importante kaayo sa Old Brethren. Tungod kay walay makabasa sa kasingkasing, nagtuo mi nga ang pagpamesti sa usa ka tawo magpadayag kon unsay iyang sulod nga pagkatawo. Busa, kon maghinobra ang estilo sa buhok sa usa ka membro, timailhan kini sa garbo. Kon ang mga disenyo sa panapton sobra ka dagko, kana maoy timailhan usab sa garbo. Usahay, morag mas hinungdanon na hinuon kining mga butanga kay sa Kasulatan mismo.

Nagsilbi sa Sentensiya sa Pagkabilanggo

Sa ulahing bahin sa katuigang 1960, si Jesse nga manghod nga lalaki sa akong bana nga gimatuto usab sa Old Brethren, gibilanggo tungod sa pagdumili sa pagserbisyo sa militar. Samtang didto siya, iyang nahimamat ang mga Saksi ni Jehova, kinsa nagtuo usab nga ang pag-apil sa gubat dili uyon sa mga prinsipyo sa Bibliya. (Isaias 2:4; Mateo 26:52) Naikag si Jesse sa daghang panaghisgot sa Bibliya uban sa mga Saksi ni Jehova ug nakaobserbar sa ilang mga hiyas. Tapos sa dugayng pagtuon sa Bibliya, nabawtismohan siya ingong usa sa mga Saksi ni Jehova​—nga nakapaguol kaayo kanamo.

Si Jesse nakigsulti sa akong bana bahin sa iyang nakat-onan. Iyang gihikay usab nga regular nga makadawat ug mga magasing Bantayanang Torre ug Pagmata! si James. Ang pagbasa niini nakapukawg samot sa interes ni James sa Bibliya. Sanglit si James nagtinguha gayod sa pag-alagad sa Diyos apan kanunayng mobating halayo Kaniya, interesado kaayo siya sa bisan unsa nga makatabang kaniya nga mas masuod sa Diyos.

Ang among mga pastor nagdasig kanamo sa pagbasag relihiyosong mga magasin sa mga Amish, Mennonite, ug sa uban pang mga balasahon nga iya sa Old Brethren, bisan tuod giisip namo kining maong mga relihiyona nga bahin sa kalibotan. Apan, ang akong amahan supak kaayo sa mga Saksi. Nagtuo siya nga kami dili gayod angay nga mobasag Ang Bantayanang Torre ug Pagmata! Busa natugaw ako sa dihang akong nakita si James nga nagbasa niana. Nahadlok ako nga motuo siya sa bakak nga mga pagtulon-an.

Bisan pa niana, dugay nang nagduda si James sa pipila ka mga pagtulon-an sa Old Brethren nga gituohan niyang sukwahi sa Bibliya​—ilabina ang pagtulon-an nga sala ang pagtrabaho ug bug-at nga trabaho kon Dominggo. Pananglitan, ang Old Brethren nagtudlo nga puwedeng magpainom sa imong mga hayop kon Dominggo apan gidili ang pagpangibot ug sagbot. Ang mga pastor dili makahatag ug Kasulatanhong katarongan sa maong lagda. Sa inanay, ako usab nagsugod sa pagduhaduha bahin sa maong mga pagtulon-an.

Tungod kay dugay na ming nagtuo nga ang among relihiyon iya sa Diyos ug nasayod kami kon unsay among maagoman kon mobiya kami niini, nalisdan kami sa pagbulag gikan sa Old Brethren. Apan, ang among tanlag dili na motugot kanamo nga magpabilin pa sa usa ka relihiyon nga giisip namong wala magsunod sa Bibliya. Busa sa 1983 misulat kami nga nagpatin-aw sa among mga katarongan sa pagbiya ug mihangyo nga basahon ang sulat ngadto sa kongregasyon. Gipalagpot kami gikan sa grupo.

Pagpangita sa Tinuod nga Relihiyon

Human niadto, gisugdan namo ang pagpangita sa tinuod nga relihiyon. Gipangita namo ang relihiyon nga nagatuman sa kon unsay ilang ginatudlo sa mga tawo nga pagabuhaton. Una sa tanan, gipinig namo ang mga relihiyon nga nag-apil-apil sa gubat. Nadani gihapon mi sa relihiyon nga ilado sa ilang yano nga pagkinabuhi ug pagpamesti, kay nagtuo kami nga mao kiniy ilhanan nga ang usa ka relihiyon dili bahin sa kalibotan. Gikan sa 1983 ngadto sa 1985, gipanaw namo ang nasod, nga nagsusi sa nagkalainlaing mga relihiyon​—mga Mennonite, Quaker, ug uban pang mga grupo nga nagkinabuhing yano.

Niadtong tungora ang mga Saksi ni Jehova miduaw kanamo sa among uma, duol sa Camden, Indiana. Naminaw mi, nga naghangyo kanila nga King James nga bersiyon lang nga Bibliya ang gamiton. Gitahod nako ang baroganan sa mga Saksi maylabot sa pakiggubat. Apan nalisdan ko sa pagpaminaw kanila tungod kay kon wala sila makasabot nga kinahanglang magpabiling bulag sa kalibotan pinaagi sa pagpamesti nga yano, nan para nako dili sila ang matuod nga relihiyon. Nagtuo ako nga garbo ang hinungdan kon nganong ang mga tawo lahi ug pamesti kanamo. Nagtuo ako nga mahimong mapahitas-on ang tawo tungod sa mga kabtangan.

Si James misugod sa pagtambong sa Kingdom Hall sa mga Saksi ni Jehova uban sa pipila sa among mga anak nga lalaki. Naglagot kaayo ko. Giawhag ako sa akong bana sa pagkuyog kaniya, apan midumili ako. Unya usa ka adlaw niana miingon siya, “Bisag dili ka motuo sa tanan nilang mga pagtulon-an, adto lang ug tan-awa mismo kon giunsa nila pagtagad ang usag usa.” Nakadayeg gayod siya niini.

Sa kataposan, midesidir ako sa pagkuyog apan mapanagan-on kaayo ako. Miadto ako sa Kingdom Hall nga nagsul-ob ug simpleng sinina ug kalo. Ang uban sa akong mga anak nga lalaki nagtiniil, ug ang ilang sinina simple lang usab. Bisan pa niana, giduol mi sa mga Saksi ug mahigugmaon kaming gitagad. Naghunahuna ko, ‘Lahi mi, apan gidawat gihapon nila kami.’

Nakadayeg ako sa ilang mahigugmaong tinamdan, apan determinado gihapon ako nga mag-obserbar lang. Dili gani ko motindog ni moawit sa ilang mga alawiton. Human sa tigom nagsukna kog daghan kaayong pangutana kanila, nga nangutana bahin sa ilang ginahimo nga para nako maoy sayop o bahin sa kahulogan sa usa ka teksto. Bisan tuod ug dili kaayo ko mataktikanhon, ang matag usa nga akong gipangutana nagpakitag tinuod nga interes kanako. Nakadayeg usab ako kay makapangutana ko kang bisan kinsa ug magkapareho ang ilang mga tubag. Usahay isulat nila ang tubag, nga makatabang kaayo, kay matun-an nako kana sa akong kaugalingon sa ulahi.

Sa ting-init sa 1985, ang among pamilya mitambong sa kombensiyon sa mga Saksi ni Jehova sa Memphis, Tennessee​—aron lang mag-obserbar. Bungoton gihapon si James, ug yano gihapon ang among pamesti. Tali sa mga sesyon aduna gayoy moduol kanamo. Nadani kami sa gugma, pagtagad, ug pagdawat nga gipakita. Nakadayeg usab kami sa panaghiusa kay bisan asa kami motambong ug tigom, pareho ang mga pagtulon-an.

Si James, nga napalihok tungod sa personal nga interes sa mga Saksi, midawat ug pagtuon sa Bibliya. Iyang gisusi pag-ayo ang tanan, kay gustong maneguro sa iyang gitun-an. (Buhat 17:11; 1 Tesalonica 5:​21) Sa ngadtongadto, nagtuo si James nga nakaplagan na niya ang kamatuoran. Apan, naglibog ako. Gusto kong mobuhat sa kon unsay husto, apan dili ko gusto nga mahimong “moderno” ug isipong “kalibotanon.” Sa dihang misugot ako nga moapil sa pagtuon sa Bibliya, duna akoy King James Version ug duna sab koy mas modernong Bag-ong Kalibotang Hubad. Gisusi nakog maayo ang matag bersikulo diha sa duha ka hubad aron makaseguro nga dili ako mahisalaag.

Kon sa Unsang Paagi Ako Nakombinsir

Samtang nagtuon kami uban sa mga Saksi, among nakat-onan nga ang atong langitnong Amahan maoy usa ka Diyos, dili tulo sa usa, ug nga kita mismo ang kalag ug nga kita wala magbaton ug dili-mamatay nga kalag. (Genesis 2:7; Deuteronomio 6:4; Ezequiel 18:4; 1 Corinto 8:​5, 6) Nakat-onan usab namo nga ang impiyerno mao ang komon nga lubnganan sa tanang katawhan, dili usa ka dapit sa kalayonhong pagsakit. (Job 14:13; Salmo 16:10; Ecclesiastes 9:​5, 10; Buhat 2:​31) Ang pagkakat-on sa kamatuoran bahin sa impiyerno hinungdanon kaayo, tungod kay ang Old Brethren wala magkauyon sa kahulogan niini.

Bisan pa niana, nagduhaduha gihapon ako kon sa unsang paagi nga ang mga Saksi mao ang tinuod nga relihiyon sanglit, sa akong hunahuna, sila maoy bahin man gihapon sa kalibotan. Wala sila magkinabuhing “simple,” nga sa akong pagtuo hinungdanon kaayo. Apan, sa samang higayon naamgohan nako nga ilang gituman ang sugo ni Jesus nga isangyaw ang maayong balita sa Gingharian ngadto sa tanang katawhan. Naglibog gyod ko kaayo!​—Mateo 24:14; 28:19, 20.

Niining malisod nga panahon, ang gugma sa mga Saksi nakatabang kanako sa pagpadayon sa akong pagsusi. Ang tibuok kongregasyon nagpakitag interes sa among pamilya. Samtang ang lainlaing membro sa kongregasyon moduaw kanamo​—nga usahay mopalit ug gatas ug itlog aron makaduaw​—among nakita nga sila tinuod gayod nga maayong mga tawo. Moduaw gihapon sila sa among balay bisag nasayod sila nga duna nay Saksi nga nagtuon kanamo. Gani, bisan unsang orasa nga anaa sila sa duol sa balay, mohapit gayod sila. Gikinahanglan gayod namo ang maong higayon aron mailhan ang mga Saksi, ug naapresyar namo ang ilang tinuod nga interes ug gugma.

Dili lang kay ang mga Saksi sa kongregasyon nga kinadul-an kanamo ang nagpakitag interes. Samtang nakigbisog ako sa isyu maylabot sa hustong pagpamesti ug panghindik, si Kay Briggs, usa ka Saksi gikan sa duol nga kongregasyon, kinsa mipili sa pagpamestig simple ug wala magmek-ap, miduaw kanako. Komportable ako kaniya ug nakapakigsulti ako kaniya nga walay panagana. Dayon usa ka adlaw giduaw ako ni Lewis Flora, kinsa gimatuto usab sa usa ka relihiyon nga nagkinabuhing yano. Iyang nakita sa akong nawong nga nalibog kaayo ko ug nagpadala siyag napulo-ka-panid nga sulat, nga naningkamot nga mahupay ang akong nalibog nga hunahuna. Nakahilak ako sa iyang kalulot, ug kadaghan nakong gibasa ang iyang sulat.

Gihangyo nako ang usa ka nagapanaw nga magtatan-aw, si Brader O’Dell, sa pagpatin-aw kanako sa Isaias 3:​18-​23 ug 1 Pedro 3:​3, 4. “Dili ba kining mga bersikuloha nagpakita nga kinahanglang mag-sul-ob ug simpleng sinina aron pahimut-an ang Diyos?” nangutana ako. Siya nangatarongan: “Sayop ba ang pagsul-ob ug kalo? Sayop ba ang pagsalapid sa buhok?” Sa Old Brethren, salapiron namo ang buhok sa mga batang babaye, ug ang mga babaye magsul-ob ug kalo. Nasabtan nako ang panagsumpaki, ug nakadayeg ako sa pailob ug maayong batasan sa nagapanaw nga magtatan-aw.

Sa inanay, ako dugang ug dugang nakombinsir, apan dihay usa ka isyu nga naghasol gihapon kaayo nako​—ang mga babaye magpaputol sa ilang buhok. Nangatarongan ang Kristohanong mga ansiyano kanako nga ang buhok sa pipila ka babaye dili gayod motubo nga ingon ka taas sa buhok sa ubang babaye. Mas maayo ba ang buhok sa usa ka babaye kay sa lain tungod niana? Gitabangan usab ko nila nga masabtan ang papel sa tanlag maylabot sa pagpamesti ug panghindik ug gihatagan ako ug sinulat nga impormasyon aron basahon sa balay.

Milihok Sumala sa Among Nakat-onan

Among gipangita ang maayong bunga, ug amo kining nakaplagan. Si Jesus nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Nakombinsir kami nga ang mga Saksi ni Jehova maoy mga tawo nga nagpakitag tinuod nga gugma. Bisan pa niana, nakapalibog kaayo kini sa among duha ka magulang nga mga anak, si Nathan ug Rebecca, kay gidawat nila ang Old Brethren nga relihiyon ug nabawtismohan ingong mga membro. Sa ngadtongadto, napalihok sila sa kamatuoran sa Bibliya nga among gipaambit kanila, maingon man usab sa gugma nga gipakita sa mga Saksi.

Pananglitan, si Rebecca dugay nang nangandoy ug suod nga relasyon uban sa Diyos. Iyang nakaplagan nga mas sayon ang pag-ampo kaniya sa dihang iyang nakat-onan nga wala gimbut-ing daan sa Diyos kon sa unsang paagi molihok ang usa o kon unsay umaabot sa usa. Mas nasuod usab siya sa Diyos sa dihang iyang nasabtan nga ang Diyos maoy usa ka tinuod nga persona inay kay usa ka bahin sa misteryosong Trinidad ug usa nga mahimo niyang sundogon. (Efeso 5:1) Ug nalipay siya nga dili na siya kinahanglang mogamit sa karaang pinulongan sa King James Version sa dihang makigsulti sa Diyos. Sa dihang iyang nakat-onan ang mga kinahanglanon sa Diyos maylabot sa pag-ampo, maingon man ang katuyoan sa Diyos alang sa katawhan nga mabuhi sa walay kataposan sa usa ka paraisong yuta, siya mibati nga mas nasuod sa iyang Maglalalang.​—Salmo 37:29; Pinadayag 21:​3, 4.

Mga Pribilehiyo nga Among Gitagamtam

Si James ug ako ug ang among lima ka magulang nga mga anak​—si Nathan, Rebecca, George, Daniel, ug John​—nabawtismohan ingong mga Saksi ni Jehova niadtong ting-init sa 1987. Si Harley nabawtismohan sa 1989, ug si Simon sa 1994. Ang among tibuok pamilya nagpabiling debotado sa buluhaton nga gisugo ni Jesu-Kristo nga himoon sa iyang mga sumusunod, nga mao, ang pagmantala sa maayong balita sa Gingharian sa Diyos.

Ang among lima ka magulang nga mga anak nga lalaki​—si Nathan, George, Daniel, John, ug Harley—​maingon man ang among anak nga babaye nga si Rebecca​—ang matag usa nakaalagad sa sangang buhatan sa mga Saksi ni Jehova sa T.B. Si George nag-alagad gihapon didto human sa 14 ka tuig, ug si Simon, nga nakahuman sa pag-eskuyla sa 2001, bag-o lang nga nahimo usab nga membro sa pamilya sa sangang buhatan. Ang tanan namong anak nga lalaki maoy mga ansiyano o kaha ministeryal nga alagad sa kongregasyon sa mga Saksi ni Jehova. Ang akong bana nag-alagad ingong usa ka ansiyano sa Kongregasyon sa Thayer, sa Missouri, ug ako nagpabiling puliki diha sa ministeryo.

Kami karon dunay tulo ka apo​—si Jessica, Latisha, ug si Caleb​—ug nalipay sa pagkakita nga ginasilsil sa ilang mga ginikanan ang gugma kang Jehova diha sa ilang linghod nga mga kasingkasing. Ingong usa ka pamilya, nalipay kami nga si Jehova nagkabig kanamo ngadto kaniya ug gitabangan kami sa pag-ila sa iyang katawhan nga nagdala sa iyang ngalan pinaagi sa diyosnong gugma nga ilang gipasundayag.

Maluoy kami niadtong adunay kusganong tinguha nga pahimut-an ang Diyos apan kansang mga tanlag tingali naimpluwensiyahan sa ilang palibot inay kay sa Bibliya. Nanghinaot kami nga ilang makaplagan ang kalipay nga among gibati karon sa pagpamalaybalay, dili aron sa pagbaligyag mga utanon, kondili aron sa pagpaambit sa mensahe bahin sa Gingharian sa Diyos ug sa matahom nga mga butang nga pagahimoon niini. Manglugmaw ang mga luha sa akong mga mata nga mapasalamaton sa dihang mamalandong ako sa tanang pailob ug gugma nga gipakita kanamo sa katawhan nga nagdala sa ngalan ni Jehova!

[Mga hulagway sa panid 19]

Sa mga siyete anyos pa ako, ug sa mihamtong na

[Hulagway sa panid 20]

Si James, George, Harley, ug Simon, nga nagsul-ob ug simpleng sinina

[Hulagway sa panid 21]

Kining akong hulagway nga nagdalag mga abot ngadto sa tiyanggihan migula sa lokal nga mantalaan

[Credit Line]

Journal and Courier, Lafayette, Indiana

[Hulagway sa panid 23]

Uban sa among pamilya karon