Mga Tigtan-aw nga Naladlad sa Kapeligrohan

TINAMPO SA MAGSUSULAT SA PAGMATA! SA PINLANDIA

ALANG sa daghang bata, ang mga sine, telebisyon, video, DVD, elektronikong mga dula, ug ang Internet maoy naandan na nga mga butang sa kinabuhi. Usa ka bag-ong taho nga gipatik sa Board of Film Classification sa Pinlandia nag-ingon nga “sumala sa pipila ka banabana, ang panahong gigugol sa mga bata ug mga batan-on sa pagdula ug pagtan-aw niini maoy mga 20 ngadto sa 30 ka pilo nga mas daghan kay sa panahong gigugol sa pagpakig-uban sa ilang pamilya.”a Ikasubo, kini nagladlad sa mga bata sa daghan kaayong makadaot nga talan-awon.

Ang mga awtoridad sa ubang mga nasod naningkamot sa pagpanalipod sa mga bata pinaagi sa paghatag ug klasipikasyon sa mga salida ug paglatid ug edad sa tugotang motan-aw niini. Apan, sumala sa taho, ang mga bata ug ang ilang mga ginikanan usahay wala makasabot sa klasipikasyon sa salida, o kaha giisip nila kini nga dili kaayo importante. Dugang pa, daghang sinehan ug mga paabangan ug video ang nasayrang dili manumbaling sa gilatid nga edad nga tugotang motan-aw sa salida. Gawas pa niana, ang ubang mga programa ug mga sine walay klasipikasyon.

Usa sa mga magtutudlo nga gisurbi miingon: “Morag dili ra isipon sa mga estudyante nga mapintas ang usa ka salida o dula kon wala silay makitang dugo nga mibanaw.” Daghang dula sa video ug kompiyuter​—ug bisan ang mga kartuning nga gidisenyo para gayod sa mga bata​—mahimong makadaot kanila.

Ang taho nag-ingon nga ang matag panimalay dunay “pangunang tulubagon sa pagsusi sa mga sine ug mga salida sa telebisyon nga tan-awon sa mga bata.” Kini mihinapos pinaagi sa pagsukna ug makapahinuklog nga pangutana: “Kita bang mga hamtong dunay tinguha, kalig-on, ug pamaagi sa pagpanalipod sa mga bata batok sa makadaot nga mga epekto sa mga salida ug mga dula?”

[Footnote]