“Posible ba Gayod nga ang mga Binilanggo Mareporma?”
Mao kanay pangutana diha sa hapin sa Mayo 8, 2001, nga gula sa “Pagmata!” Daghang magbabasa ang nagpasalamat niining serye sa mga artikulo, nga nag-apil sa asoy bahin sa binase sa Bibliya nga edukasyonal nga programa nga ginahimo sa mga Saksi ni Jehova sa prisohan sa estado sa Atlanta, Georgia, T.B.A. Ang mosunod maoy mga kinutlo gikan sa daghang sulat nga nadawat.
◼ “Sa akong pagkanapriso sulod sa walo ka tuig, akong nakita nga malamposon kaayo ang buluhaton sa pagtudlo bahin sa Bibliya nga ginahimo sa mga Saksi ni Jehova sa mga prisohan. Samtang diha pa ako sa prisohan sa Atlanta, nakapribilehiyo ako nga natabangan sa lima niadtong gihisgotan sa inyong artikulo. Ako mapasalamaton kaayo sa ilang gugma ug pagtabang. Ako nagpasalamat sa mga igsoon nga sama kanila, kinsa nagpakita ug gugma kanamo nga nakahimog sayop apan naningkamot sa pagtul-id niana aron mahimong mas maayong tawo.”—R. J.
◼ “Ako sa pagkakaron nabilanggo, ug ang mga igsoon sa lokal nga Kingdom Hall nakahikay ug mapuslanong programa sa pagpanudlo dinhi. Tungod niini, usa ka kaubang piniriso ang nabawtismohan, ug ako, bisag napalagpot kaniadto gikan sa Kristohanong kongregasyon, karon nakabalik na. Daghan pang uban ang nagtuon sa Bibliya. Makadasig ang pagkasayod nga kita maoy bahin sa tibuok-kalibotang buluhaton sa pagpanudlo. Makapalipay gayod ang pag-alagad kang Jehova, bisag asa pa kita magpuyo!”—J. M.
◼ “Sa 1970, ako napriso sa krimen nga wala nako himoa. Nakasilbi ako ug 14 ka tuig nga sentensiya. Samtang napriso, nagsugod ako sa pagtuon sa Bibliya uban sa mga Saksi ni Jehova. Nakadayeg kaayo ako sa ilang pagkamatinud-anon ug pagpakitag kahangawa. Sa nakagawas ako, nagpadayon ako sa pagtuon ug nabawtismohan wala madugay human niana. Usahay, mobati gihapon ako ug kaguol ug kasuko sa inhustisya nga akong naagoman. Apan gipahinumdoman nako ang akong kaugalingon nga taposon ni Jehova ang tanang inhustisya ug pag-antos. Ang mga binilanggo mareporma kon ilang sundon ang mga kasugoan nga makita diha sa Bibliya. Sila makapasalamat usab sa mga paningkamot sa atong kugihang mga igsoon kinsa naghatag sa ilang panahon sa pagtabang kanila. Ako mapasalamaton gayod!”—R. S.
◼ “Sa dihang napriso, ako nanigarilyo, naggamit ug droga, tigpamalikas, ug walay pagtahod sa awtoridad. Ako membro usab sa usa ka gang. Dugang pa nianang tanan, napalagpot ako sa Kristohanong kongregasyon. Karon ako nakabalik na, ug mauswagon sa espirituwal. Tungod sa kamatuoran, akong gibati nga ako may kagawasan na!”—I. G.