Ang Labing Bantogang Tawo nga Nabuhi Sukad
KINSAY imong pilion nga labing bantogang tawo nga nabuhi sukad? Si Noe ba, nga nakalabang-buhi sa Lunop ug nahimong katigulangan sa tanan nga buhi karon? (Genesis 7:1, 21, 22; 9:18, 19) Si Nabukodonosor ba, ang karaang magmamando sa kalibotan ug magtutukod sa matahom nga siyudad nga iyang gitawag ug Dakong Babilonya? (Daniel 4:28-30) Tingali si Alejandrong Bantogan, nga gihisgotan bisan diha sa tagna sa Bibliya tungod sa iyang mga kalamposan? (Daniel 8:5-8, 21-22) O si Julio Cesar kaha, ang inilang Romanong magmamando?
Wala dangtig 45 ka tuig human sa kamatayon sa Cesar nga bag-o pang gihisgotan, ang usa ka bata nga ginganlag Jesus natawo sa Betlehem. Nahimo ba siyang labing bantogang tawo nga nabuhi sukad? Mga usa ka gatos ka tuig kanhi, ang reperensiyang basahon nga The Historians’ History of the World miingon: “Mas hinungdanon ang impluwensiya diha sa kasaysayan sa mga kalihokan [ni Jesus], bisan sa sekular lamang nga punto debista, kon itandi sa nahimo ni bisan kinsang tawo sa kasaysayan. Giila sa pangunang mga sibilisasyon sa kalibotan nga usa ka bag-ong panahon ang nagsugod sa pagkatawo ni Jesus.”
Hangtod karon dako gihapon ang kaikag bahin kang Jesu-Kristo. Pipila ka tuig kanhi, ang pangunang mga magasin sa balita sa U.S. nga Time, Newsweek, ug U.S.News and World Report dungan nga nagpatik ug mga artikulo nga may ilustrasyon sa hapin bahin kaniya. Ug, sa pagkatinuod, morag misamot pa ang kaikag sa mga tawo kang Jesus. “Ang iyang impluwensiya makita gihapon diha sa mga pelikula, musika ug uso nga sinina,” miingon ang mantalaang Toronto Star niadtong 2004. “Nahimo siyang usa sa atong inilang mga bayani.”
Apan, katingad-an nga kaniadto, ang pipila nangangkon nga si Jesus wala gayod maglungtad. Si Bruno Bauer (1809-82) maoy prominenteng magtutudlo nga mihimo niana nga pangangkon. Usa sa iyang mga estudyante mao si Karl Marx. Ning bag-o pa, si Robert E. Van Voorst, diha sa iyang librong Jesus Outside the New Testament, misulat: “Sa ulahi gilakip ni Marx sa iyang ideolohiya ang mga ideya ni Bauer nga ang sugilanon bahin kang Jesus usa lamang ka tumotumo, ug ang opisyal nga literatura sa Sobyet ug ubang Komunistang propaganda nagpakaylap niining maong pangangkon sa ulahi.”
Apan, karon pipila na lang ang molimod nga si Jesus nabuhi dinhi sa yuta. Gani, kadaghanang tawo mouyon dayon nga siya usa ka tinuod ug importante kaayong persona. Ang ulohan sa usa ka editoryal sa Wall Street Journal niadtong Disyembre 2002 nag-ingon: “Ang Siyensiya Dili Makasalikway Kang Jesus.” Ang magsusulat niini mihinapos: “Gawas sa popanagsang ateyista, kadaghanang eskolar midawat na kang Jesus sa Nasaret ingong usa ka persona sa kasaysayan.”
Apan si Jesus dili lamang usa ka persona sa kasaysayan. Ang magasing Time nagtaho nga “magkinahanglan ug katingad-ang pangatarongan ang paglimod nga ang labing impluwensiyal nga persona—dili lamang sulod niining duha ka milenyo kondili sa tibuok kasaysayan sa tawo—mao si Jesus sa Nasaret.” Kini midugang: “Usa ka lig-ong argumento ang pag-ingon nga wala nay laing kinabuhi nga sama ka impluwensiyal ug dumalayon ang epekto sama nianang kang Jesus.”
Bisan pa niana, nagpabilin gihapon ang mga pangutana: Kinsa ba gayod siya? Diin siya gikan? Unsay iyang tuyo dinhi sa yuta? Ug nganong hinungdanon kaayo nga mahibalo kita sa tanan nga angay natong mahibaloan bahin kaniya?