Gihigugma Niya ang Iyang Nakat-onan

DI PA dugay nakit-an ang usa ka sulat nga gihimo sa usa ka babaye sa wala pa siya mamatay gumikan sa kanser niadtong Mayo 2004. Wala niya mahuman ang sulat, dayag nga tungod kini kay kalit nga migrabe ang iyang sakit. Apan, kadtong nakabasa sa ulahi nianang wala mapadala nga sulat natandog pag-ayo nga sila nakahilak, ug ang ilang pagtuo sa Diyos napalig-on.

Diha sa sulat, si Susan, nga maoy nagsulat niini, nag-ingon nga tin-edyer pa siya sa dihang una siyang mitelepono sa usa ka Kristohanong ansiyano sa mga Saksi ni Jehova sa Connecticut, T.B.A. Dayon iyang gipatin-aw ang situwasyon nga iyang giatubang niadtong panahona. Sa hinapos nga bahin lamang sa miaging tuig nga nadawat sa inahan ni Susan ang maong makapatandog nga sulat ug nagpadala siya ug kopya niana ngadto sa hedkuwarter sa mga Saksi ni Jehova sa New York.

Si Susan misulat nga iyang nakita ang numero sa telepono sa ansiyano sa Connecticut diha sa direktoryo niadtong 1973. “Nianang tuiga, sa edad nga 14 anyos,” matod pa niya, “ako nakahukom nga ang akong nabasa gikan sa mga magasing Ang Bantayanang Torre ug Pagmata! mao gayod ang kamatuoran. Tungod kay wala pa akoy nahibalag nga Saksi ni Jehova, akong gipangita ang ilang numero sa telepono diha sa direktoryo ug gipili ang numero nga pareho sa akoa ang unang tulo ka numero. Sa dihang mitubag si Brader Genrich, natingala siya nga wala pa akoy nahibalag nga Saksi.”a

Usa ka Dakong Problema

Gipatin-aw ni Susan sa iyang sulat nga sa dihang siya diyes anyos, gipapuyo siya sa iyang inahan uban sa iyang iyaan sa Connecticut. Temporaryo ra unta ang pag-estar niya didto, apan paglabay sa pipila ka panahon giingnan ni Susan ang iyang inahan, kinsa nag-inusara pagpuyo didto sa Florida, nga gusto niyang magpabilin sa iyang iyaan. Sa iyang sulat miingon si Susan nga ang iyang situwasyon susama nianang “gitawag ug Stockholm syndrome, diin ang usa ka tawo motapot sa mga nagdaogdaog kaniya.”b Gimaltratar siya pag-ayo.

Misulat si Susan: “Ang akong iyaan ug ang iyang kapuyo grabe ka dagmalan. Dugang pa, pipila lang ka tawo nga dili sakop sa panimalay ang nakasulod sa balay. Sa dihang gitugotan ko sa pag-eskuyla, dili ko tagaag balon o desenteng mga besti, bisan pag si Mama nagpadalag daghang kuwarta para sa pagsuportar kanako. Usa ka parisan ra ang akong pang-ilalom nga sapot, samtang ang duha ka anak nga babaye sa akong iyaan, nga manghod nakog pipila ka tuig, nakabaton sa tanan.” Giasoy niya kini aron ipatin-aw kon nganong nagtuo siya nga masugamak gyod siya sa problema kon mahibaloan sa iyang iyaan ang iyang interes sa pagkat-on ug dugang bahin sa Bibliya.

Kon sa Unsang Paagi Miuswag ang Kahibalo ni Susan sa Bibliya

“Gipailaila ko ni Brader Genrich kang Laura, nga usa ka hamtong nga sister,” misulat si Susan, “ug migugol siyag taas nga panahon sa pagtubag sa daghan nakong mga pangutana bahin sa Bibliya. Subsob nga makigkita siya kanako diha sa usa ka komersiyal nga labhanan.” Gipatin-aw ni Susan nga hangtod nianang tungora wala pa gayod siya makahimo sukad ug kaugalingong desisyon bahin sa bisan unsang butang apan human niining maong mga panaghisgot ug sa pagbasa niya sa binase-sa-Bibliya nga literatura sama sa Ang Kamatuoran nga Motultol sa Kinabuhing Dayon, nakahimo na siya niana.

“Biyernes kadto sa gabii,” nagpadayon si Susan, “sa dihang giingnan nako ang akong iyaan nga taudtaod na akong nakigsulti sa mga Saksi. Wala ko niya pakatulga sa tibuok gabii, nga nagtindog lang sa tungatunga sa kosina. Human niana, mas determinado pa ako nga mahimong Saksi.”

Sukad niadto, si Brader Genrich padayong nagsuplay kang Susan ug literatura nga makatabang kaniya sa pagsabot sa Bibliya. “Dili gayod nako malimtan ang 1974 Yearbook of Jehovah’s Witnesses,” misulat si Susan, “tungod kay kini naghisgot kon sa unsang paagi ang mga Saksi sa Nazi nga Alemanya nakalahutay sa paglutos una pa ug panahon sa Gubat sa Kalibotan II. . . . Niadtong panahona nga akong gihangyo ang ansiyano sa pagrekord sa mga alawiton sa Gingharian aron masag-ulo nako kini. Sulod sa usa ka tuig ako nang makanta nga sunod-sunod ang tanang 119 ka awit sa 1966 nga songbok nga ‘Singing and Accompanying Yourselves With Music in Your Hearts.’”

“Sa samang higayon, hatagan usab ako ni Brader Genrich ug mga teyp sa mga pakigpulong bahin sa Bibliya, mga drama, ug mga programa sa asembliya. Ibilin niya kini sa Ruta 10 duol sa usa ka poste sa telepono, ug kuhaon nako kini didto. . . . Nagsugod na ako sa pagkahigawad sa akong kahimtang tungod kay naningkamot kong mouswag pag-ayo kutob sa mahimo nga walay tambong-tambong sa tigom. Busa gibati nako nga nawad-an na kog kusog sa pagpakigbisog.”

Miingon si Susan nga ang misunod nga duha ka tuig malisod kaayo. Wala na siya makigkita sa duha ka Saksi nga iyang nakaila. Apan, miingon siya nga ang “pagkakat-on sa tanang awit nakapaguol pag-ayo kaniya.” Ngano? “Tungod kay mahinumdoman nako ang mga liriko sa usa ka awit nga ang ‘Sundalo ni Jah dili magkinabuhing haruhay.’ Nahibalo ko nga ang maong mga pulong gisulat sa usa ka Saksi samtang didto siya sa kampo konsentrasyon sa mga Aleman panahon sa Gubat sa Kalibotan II, ug nakapasamot kini sa akong kaguol. Gibati nako nga ako talawan ug naghunahuna nga gitalikdan na ako ni Jehova.”c

Kagawasan sa Kataposan

“Nahitabo ang hinungdanong kausaban sa nag-edad akog 18 anyos. Walay Saksi nga nakaduaw sa among balay sulod sa daghang katuigan tungod kay kami naapil sa listahan sa ‘dili magpaduaw.’ Apan nianang adlawa, usa ka Saksi gikan sa laing kongregasyon ang miadto sa balay, ug nakapakig-estorya ko kaniya tungod kay ako ray nahibilin sa balay. Mao kadto ang akong nahinumdoman nga unang higayon nga nag-inusara ko sa balay sa adlawng Sabado. Giisip ko kini nga pamatuod nga wala ako talikdi ni Jehova. Busa akong giteleponohan si Brader Genrich, nga maoy akong gitawgan sa una, giingnan siya nga andam na kong mopahawa sa among balay, ug nangayo kog mga sugyot gikan kaniya. Sa ngadtongadto, natabangan ra ko sa pagpahawa.”

Si Susan mibalhin ug puyo niadtong Abril 1977. Nagpadayon ang iyang sulat: “Pagkasunod tuig, nakatambong ra gyod ko sa tanang tigom ug mga asembliya, ug nagsugod ako sa pagpakigbahin sa ministeryo. Gikontak nako pag-usab ang akong inahan. Wala siya masayod nga gimaltratar diay ko ug naguol kaayo siya. Gipaneguro dayon sa akong inahan nga mabatonan nako ang tanan nakong gikinahanglan. Pipila ka tuig una pa niana si Mama mibalhin sa Alaska. Tungod kay siya interesado usab kaayo sa mga kamatuoran sa Bibliya, mibalhin ko sa Alaska sa 1978 aron makauban siya. Sa ngadtongadto siya na-Saksi ug nagpabiling matinumanon hangtod karon.

“Sa dihang nagtambongan na ko sa mga tigom, si Brader Genrich naghikay ug usa ka grupo nga pagduaw sa tibuok-kalibotang hedkuwarter sa mga Saksi ni Jehova sa Brooklyn, New York, ug gidapit ko niya nga mokuyog sa maong grupo. Usa kadto sa labing malungtarong mga gasa nga nahatag kanako ni bisan kinsa, kay sukad niadto gipabilhan ko pag-ayo ang organisasyon ni Jehova. Aw, mao kana ang akong kaagi. Mubo ra kini tungod kay gusto nakong matapos dayon kining akong sulat.”

Sa pagkatinuod, ang mga pahayag sa ibabaw maoy mga kinutlo lamang sa single-spaced (walay blangko tali sa mga tudling), unom ka panid ug tunga nga sulat. Sa hinapos nga bahin sa iyang sulat, si Susan miingon: “Misugmat ang akong sakit didto sa ospital sa miaging bulan ug abi nakog mamatay na gyod ko . . . Nag-ampo ko kang Jehova nga kon hatagan pa ko ug duha ka semana nga maayo ang akong pamati, gusto nakong atimanon ang pipila ka butang. . . . Wala na ko magdahom nga mabuhi pag dugay, apan makaingon ko nga kining mga tuig nga ako anaa sa kamatuoran maoy maanindot kaayo, ang kinamaayohang kinabuhi nga madahom ni bisan kinsa.”

Walay paniklop o pirma ang sulat ug wala usab kini mapadala. Ang mga nakakita niini wala masayod kon kang kinsa nila ipadala ang sulat. Apan, sa nahisgotan na ganina, ang sulat sa ngadtongadto gipadala ngadto sa inahan ni Susan.

Dugang Impormasyon Bahin Kang Susan

Human sa bawtismo ni Susan sa Abril 14, 1979, ang iyang inahan mibalik sa Florida. Si Susan nagpabilin sa Alaska, tungod kay nasuod na siya sa mga igsoon sa North Pole Congregation. Wala madugay human niana, misulod siya sa bug-os-panahong ministeryo ingong payunir. Sa ngadtongadto, mibalhin siya sa Florida, ug sa 1991, naminyo siya sa usa ka Kristohanong ansiyano ug kaubang payunir, kinsa namatay wala madugay human mamatay si Susan.

Si Susan ug ang iyang bana gimahal pag-ayo sa mga igsoon ug sila parehong nagpayunir hangtod nga ang sakit ni Susan nagpugong kanila sa pagpadayon. Tanantanan, si Susan nakagugol ug kapin sa 20 ka tuig diha sa bug-os-panahong ministeryo. Ang serbisyo sa iyang lubong sa Florida gikonektar pinaagig telepono sa North Pole Congregation.

Ang sulat ni Susan makatabang kanato nga maapresyar pa ug dugang ang espirituwal nga mga panalangin nga natagamtam niadtong nag-alagad kang Jehova ug adunay maanindot nga paglaom nga mabanhaw. (Buhat 24:15) Gipatin-aw usab niining maong eksperyensiya nga ang Diyos haduol niadtong tanan nga makigsuod kaniya!—Santiago 4:7, 8.

[Mga footnote]

[Hulagway sa panid 23]

“Kining mga tuig nga ako anaa sa kamatuoran maoy maanindot kaayo, ang kinamaayohang kinabuhi nga madahom ni bisan kinsa”

[Hulagway sa panid 21]

Sa dihang si Susan nag-edad ug diyes anyos

[Hulagway sa panid 23]

Si Susan uban sa iyang bana nga si James Seymour