Unsay Gihisgotan sa Bibliya?

GIISIP sa uban ang Bibliya ingong basahon sa kasaysayan, kay narekord man niini ang libolibong katuigan sa pagpakiglabot sa Diyos sa tawo. Gilantaw kini sa uban ingong basahon sa pamatasan kay kini dunay kapin sa 600 ka hudisyal, pamilyahanon, moral, ug relihiyosong mga balaod ug mga regulasyon nga gihatag sa Diyos sa nasod sa Israel. Gilantaw usab sa uban ang Bibliya ingong usa ka giya sa pagsimba nga nagpadayag sa hunahuna sa Diyos.

Sa pagkatinuod, husto kining tanan. Ang Bibliya nag-ingon: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.” (2 Timoteo 3:16, 17) Gani, bililhon ang tanang impormasyon diha sa Pulong sa Diyos—lakip sa mga rekord sa kasaysayan, mga balaod, ug espirituwal nga mga tambag.

Apan, ang Bibliya dili lang kay koleksiyon sa mapuslanong mga impormasyon. Ang Bibliya talagsaon kay kini mga kapadayganan gikan ni Jehova nga Diyos. Kini naghatag ug praktikal, inspirado sa Diyos nga tambag alang sa adlaw-adlaw nga kinabuhi. Gipadayag usab niini ang katuyoan ni Jehova sa yuta ug sa katawhan, maingon man kon sa unsang paagi wagtangon niya ang mga hinungdan sa pag-antos sa tawo. Labaw sa tanan, ang Bibliya nagsaysay nga ang Diyos gidaot ug nag-asoy usab kon sa unsang paagi iyang husayon kini nga isyu.

Ang Diyos Gibutang-butangan nga Bakakon ug Dili Maayong Magmamando

Ang Bibliya nag-ingon nga gilalang sa Diyos ang unang mga tawo, si Adan ug Eva, nga hingpit sa hunahuna ug lawas ug gibutang sila sa nindot kaayong dapit. Sila maoy iyang gipadumala sa yuta ug sa mga hayop. (Genesis 1:28) Kay mga anak man sa Diyos, si Adan ug Eva mahimong mabuhi sa walay kataposan sa yuta, sa kondisyon nga magmatinumanon sila sa ilang langitnong Amahan. Usa lang ka butang ang gidili kanila sa Diyos. “Gikan sa tanang kahoy sa tanaman makakaon ka hangtod sa pagkatagbaw. Apan kon bahin sa kahoy sa kahibalo sa maayo ug sa daotan dili ka gayod mokaon gikan niini, kay sa adlaw nga mokaon ka gikan niini mamatay ka gayod.”—Genesis 2:16, 17.

Apan, usa ka espirituhanong linalang nga gipaila sa Bibliya ingong Satanas nga Yawa namakak: “Dili gayod kamo mamatay.” (Genesis 3:1-5) Tungod sa pagsuki niya sa Diyos, dili lamang gitawag ni Satanas ang Maglalalang nga bakakon kondili iyang gisaway usab nga sayop ang Iyang paagi sa pagmando—nga mas maayo ug lakat ang tawo kon walay Diyos. Gikombinsir ni Satanas si Eva nga kon siya mosupak sa Diyos makabuot siya kon unsay iyang gustong paagi sa pagkinabuhi ug paggawi. Si Satanas miingon nga siya “mahisama sa Diyos”! Sa ingon giatake ni Satanas ang maayong ngalan ug katuyoan ni Jehova.

Kana nga panagsultihanay grabe kaayog epekto. Gani, ang katuyoan ni Jehova sa paghinlo sa iyang ngalan ug kadungganan maoy pangunang tema sa Bibliya. Kini gisumaryo diha sa sulondang pag-ampo ni Jesus—nga gitawag ug Amahan Namo. Gitudloan ni Jesus ang iyang mga sumusunod sa pag-ampo: “Paanhia ang imong gingharian. Matuman unta ang imong kabubut-on . . . sa yuta.”—Mateo 6:9, 10.

Kon sa Unsang Paagi Hinloan ni Jehova ang Iyang Ngalan

Si Satanas nagpatungha ug pipila ka dagkong mga isyu: Kinsay nagsulti sa tinuod—si Jehova o si Satanas? Ang pagmando ba ni Jehova sa iyang tawhanong linalang matarong ug maayo? May katungod ba siya sa pagdahom nga magmasinugtanon kaniya ang mga tawo? Ang tawo ba mas maayog lakat kon sila ray magmando sa ilang kaugalingon? Aron matubag kining mga pangutanaha, temporaryong gitugotan ni Jehova ang mga tawo sa pagmando sa ilang kaugalingon.

Unsa may resulta niini? Sukad sa unang bakak sa Eden, ang kasaysayan sa tawo tugob sa kalisod ug pag-antos, nga nagpamatuod nga si Satanas bakakon kaayo ug nga ang pagkinaugalingon nga walay pagtultol sa Diyos mosangpot lamang ug kadaot. Apan, kay mahigugmaon man si Jehova ug walay kinutoban ang iyang kaalam, buot niya nga mahinloan ang iyang ngalan pinaagi sa pagwagtang sa tanang kalisdanan nga nagsugod didto sa Eden. Iyang himoon kini pinaagi sa iyang Mesiyanikong Gingharian. Unsa kana nga Gingharian?

Solusyon sa Diyos—Ang Gingharian

Milyon-milyong tawo nag-ampo sa Amahan Namo. Ikaw among gidapit sa pagpalandong sa kahulogan niini. Tagda ang mga pulong: “Paanhia ang imong gingharian.” (Mateo 6:10) Kana nga Gingharian dili kay usa lamang ka kahimtang sa kasingkasing, ingon sa gituohan sa uban. Hinunoa, sama sa gisugyot sa terminong “hari,” kini maoy usa ka kagamhanan—langitnong kagamhanan sa kamot ni Jesu-Kristo, ang “Hari sa mga hari.” (Pinadayag 19:13, 16; Daniel 2:44; 7:13, 14) Ang Bibliya nagtudlo nga siya magmando sa tibuok yuta, nga magpatungha ug walay kataposang pakigdait sa tanang katawhan ug magpapha sa tanang pagkadaotan sa yuta. (Isaias 9:6, 7; 2 Tesalonica 1:6-10) Sa ingon ang Gingharian sa Diyos—dili ang kagamhanan sa tawo—maoy motuman sa gipamulong ni Jesus: “Matuman unta ang imong kabubut-on . . . sa yuta.”

Aron matuman kining mga pulonga, gihatag ni Jesus ang iyang kinabuhi ingong lukat sa pagtubos sa mga kaliwat ni Adan gikan sa sala ug kamatayon. (Juan 3:16; Roma 6:23) Busa, ilalom sa Gingharian sa Diyos, ang tanan nga magpasundayag ug pagtuo sa halad ni Kristo makakita nga mawala na unya ang mga epekto sa sala ni Adan ug anam-anam nga mahimong hingpit ang tawo. (Salmo 37:11, 29) Mawala na sa kataposan ang mga sakit nga nakahatag kanato ug kagul-anan, ilabina sa matigulang na. Bisan ang emosyonal nga kasakit nga ipahinabo tungod sa sakit ug kamatayon sa tawhanong pamilya “mawala na.”—Pinadayag 21:4.

Nganong makaseguro kita nga tumanon sa Diyos ang iyang mga saad? Ang usa sa mga katarongan mao nga daghan nang mga tagna sa Bibliya ang nangatuman. (Tan-awa ang panid 9.) Nan, tin-aw nga ang pagtuo ug Bibliya gipasukad dili sa binuta nga pagtuo kondili gipasukad sa katarongan ug dagayang pamatuod.—Hebreohanon 11:1.

Mapuslanong Tambag sa Atong Panahon

Gawas nga gihatagan kita ug lig-ong basehanan sa paglaom sa umaabot, gitabangan usab kita sa Bibliya sa pagkinabuhi ug mas malipayong kinabuhi karon. Pananglitan, ang Pulong sa Diyos naghatag ug mapuslanong tambag bahin sa kaminyoon, kinabuhi sa pamilya, pagpakiglabot ug tawo, pagpangitag kalipay, ug daghan pang uban. Tagda ang pipila ka pananglitan.

◼ Pamalandong una sa dili ka pa mosulti. “Adunay nagapamulong nga walay paghunahuna sama sa mga dunggab sa espada, apan ang dila sa mga maalamon makaayo.”—Proverbio 12:18.

◼ Likayi ang kasina. “Ang kalmado nga kasingkasing mao ang kinabuhi sa unod, apan ang pangabugho maoy pagkadunot sa kabukogan.”—Proverbio 14:30.

◼ Disiplinaha ang imong mga anak. “Bansaya ang bata subay sa dalan nga alang kaniya; bisan kon siya matigulang na dili siya motipas gikan niana.” “Ang usa ka bata nga pinasagdan maghatag ug kaulawan sa iyang inahan.”—Proverbio 22:6; 29:15.

◼ Magmapinasayloon. Si Jesus miingon: “Malipayon ang mga maluluy-on, sanglit sila pakitaan ug kaluoy.” (Mateo 5:7) Ang maalamong Haring Solomon misulat: “Ang gugma nagatabon bisan sa tanang kalapasan.” (Proverbio 10:12) Kon dunay nakahimo ug dakong sala kanimo nga dili ka gayod makalimot ug makapasaylo, ang Bibliya nagtambag: “Adtoa siya ug ipadayag ang iyang sayop tali kanimo ug kaniya lamang.”—Mateo 18:15.

◼ Ayaw higugmaa ang salapi. “Ang gugma sa salapi maoy gamot sa tanang matang sa makadaot nga mga butang, ug tungod sa pagpangab-ot niini nga gugma ang pipila . . . nagtusaktusak sa ilang kaugalingon sa daghang kasakitan.” (1 Timoteo 6:10) Matikdi nga gisaway sa Bibliya “ang gugma sa salapi,” dili ang salapi mismo.

“Sulat” Gikan sa Atong Langitnong Amahan

Ang Bibliya naghisgot ug daghan kaayong butang. Sama sa ato nang nasayran, kini naghisgot labaw sa tanan bahin sa Diyos ug sa iyang katuyoan. Apan kini naghisgot usab bahin kanato ug kon sa unsang paagi makabaton kita ug malipayong kinabuhi karon ug sa walay kataposan ilalom sa pagmando sa Gingharian sa Diyos. Sa usa ka paagi, ang Bibliya nahisamag usa ka sulat gikan sa atong ‘Amahan sa langit,’ si Jehova. (Mateo 6:9) Pinaagi niini, gipaambit ni Jehova kanato ang iyang bililhong mga hunahuna ug gipadayag kanato ang iyang kabubut-on ug ang iyang hamili nga personalidad.

Pinaagi sa pagbasa sa Bibliya ug sa pagpalandong niana, kita “makaila” kon kinsa gayod ang Diyos. Ang atong mapatalinghogong kasingkasing mas masuod pa kaniya. (Santiago 4:8) Tin-aw, ang Bibliya naghisgot ug labaw pa kay sa kasaysayan, tagna, ug mga balaod. Kini naghisgot usab ug personal nga relasyon—atong relasyon sa Diyos. Busa, ang Bibliya talagsaon gayod ug bililhon kaayo.—1 Juan 4:8, 16.

[Blurb sa panid 19]

Ang tema sa Bibliya matahom kaayong pagkasumaryo diha sa unang mga pulong sa sulondan nga pag-ampo ni Jesus

[Kahon/Hulagway sa panid 21]

ANG PAAGI SA PAGBASA UG BIBLIYA

Ang Bibliya nindot kaayong basahon. Gani, ang mga asoy ug mga pagtulon-an niini bahin sa paggawi gibantog kay dako kaayo kinig impluwensiya sa mga basahon sa daghang pinulongan. Ang Bibliya makatabang kanato sa pagkaila sa atong Maglalalang, si Jehova nga Diyos. Kini usab tugob sa mapuslanong kaalam. Ang sanglitanan sa Bibliya nag-ingon: “Ang kaalam mao ang pangunang butang. Batoni ang kaalam; ug uban sa tanan nga imong pagabatonan, batoni ang pagsabot.” (Proverbio 4:7) Sa unsang paagi mapahimuslan nimog maayo ang imong pagbasa ug Bibliya?

Sulayi kini pagbasa sa panahon nga abtik ang imong hunahuna. Ug ayaw pagdalidalig basa. Tinguhaa nga mapuno ang imong hunahuna sa mga kaisipan sa Diyos ug sabta pag-ayo kini. Sa matag higayon nga mahuman kag basa, palandonga ang imong nabasa, ug itandi kini sa imo nang nahibaloan. Kini magpalalom sa imong pagsabot ug pagpabili.—Salmo 143:5.

Ang uban tingali mangutana, ‘Asa mang bahina sa Bibliya ako magsugod pagbasa?’ Siyempre, sugod sa sinugdanan. Apan, ang bag-ohan pa nga mga magbabasa mas gustong magsugod sa mga Ebanghelyo—Mateo, Marcos, Lucas, ug Juan—mga asoy sa kinabuhi ug ministeryo ni Jesus. Dayon gisunod pagbasa sa uban ang matahom nga pagkasulat ug punog kaalam nga mga basahon sa balak—ang Salmo, Proverbio, ug Ecclesiastes. Human niana, maikag ka gayod sa pagbasa sa ubang mga bahin sa Bibliya. (Tan-awa sa ubos.) Ug ayawg tuo nianang giingon nga ang angay lang nimong basahon mao ang Bag-ong Tugon. Hinumdomi, “ang tibuok Kasulatan inspirado sa Diyos ug mapuslanon.”—2 Timoteo 3:16.

Ang epektibong paagi sa pagtuon sa Bibliya maoy tema por tema. Pananglitan, ang giya sa pagtuon nga Unsay Tinuod nga Gitudlo sa Bibliya? nga gigamit sa mga Saksi ni Jehova sa ilang pagsangyaw, naglakip ug tukma sa panahong mga ulohan sama sa “Kon sa Unsang Paagi Magmalipayon ang Imong Pamilya,” “Pagsimba nga Giuyonan sa Diyos,” ug “Hain ang mga Patay?”—Tan-awa ang kahon sa panid 18.

[Kahon sa panid 21]

PAGBASA SA BIBLIYA TEMA POR TEMA

Ang sinugdanan sa kinabuhi ug pagkahulog sa tawo sa sala Genesis

Ang pagsugod sa karaang nasod sa Israel Exodo ngadto sa Deuteronomio

Punog aksiyon nga mga asoy Josue ngadto sa Ester

Makapatandog nga balak ug awit Job, Salmo, Awit ni Solomon

Kaalam alang sa pagkinabuhi Proverbio, Ecclesiastes

Mga tagna ug mga giya sa paggawi Isaias ngadto sa Malaquias ug Pinadayag

Kinabuhi ug pagtulon-an ni Jesus Mateo ngadto sa Juan

Pagtukod ug pagkaylap sa Kristiyanidad Buhat

Mga sulat ngadto sa mga kongregasyon Roma ngadto sa Judas