Makasalig Ka ba sa Tambag sa Bibliya?

‘Tuohan ba nako ang gisulti niining tawhana?’ Tingali makapangutana ka niini kon baligyaan ka sa usa ka ahente ug segunda mano nga sakyanan o kon magpatuyang ug panaad ang usa ka politiko dihang mangampanya. Dili ka mag-usik ug kuwarta o panahon sa mga produkto ug impormasyon nga dili mapuslan.

TINGALI mangutana ka usab: ‘Duna bay mapuslanong butang nga akong makat-onan sa Bibliya? Mabaslan ba ang akong paghago ug panahon nga gugolon kon kini akong basahon ug tun-an?’ Ang tubag niana nga mga pangutana makita sa teksto mismo sa Bibliya: “Ang kaalam mahimong molampos o mapakyas depende sa resulta niini.” (Mateo 11:19, Phillips) Oo, ang resulta sa pagpadapat sa mga tawo sa usa ka tambag, o “kaalam,” magpamatuod kon mapuslanon ba ang tambag. Ang mosunod maoy giingon sa mga tawo nga migahin ug panahon sa pagtuon sa Bibliya. Ang ilang gisulti makatabang kanimo sa pagdesidir kon angay ba nimong basahon ug tun-an kining talagsaong basahon.

Mga Pangutana Bahin sa Kamatayon ug sa Kinabuhi sa Laing Kalibotan

Si Karen, nga nagpuyo sa Amerika, dili pa dugayng namatyan ug inahan. Sukad sa pagkabata siya nagtuo nga ang tanang tawong buotan moadto sa langit inigkamatay. Kini nga doktrina wala kaayo makahupay kaniya. Siya nangutana: ‘Unsa na kahay dagway sa akong inahan karon nga atua na siya sa langit? Sa unsang paagi mailhan nako siya kon ugaling atua na sab ako didto? Kon ako mamatay, asa kaha ko?’

Si Karen nagsugod sa matukion nga pagtuon sa Bibliya uban sa mga Saksi ni Jehova. Iyang nakat-onan nga ang mga patay dili moadto sa langit, kondili sila morag nangatulog lang. “Sila walay nahibaloan nga bisan unsa,” nag-ingon ang Ecclesiastes 9:5. Apan posible ba nga makita pa niya ang iyang inahan?

“Ayaw kahibulong niini, tungod kay ang takna nagsingabot nga ang tanan nga anaa sa handomanang mga lubnganan makadungog sa . . . tingog [ni Kristo] ug manggula.” (Juan 5:28, 29) Kining giingon sa Bibliya nakahupay ug nakahatag ug paglaom kang Karen. Iyang nakat-onan nga pagabanhawon sa Diyos ang mga patay dinhi mismo sa yuta pinaagi ni Kristo. “Ang doktrina sa Bibliya bahin sa kamatayon ug pagkabanhaw dili gayod makalibog,” matod niya.

Unsa ang Hustong Paagi sa Pagsimba?

Sa 14 anyos pa si Angela, nga taga-Romania, giampoan siya sa usa ka ministro sa Pentekostal aron kunsaran siya ug balaang espiritu, ug misugod siya sa pagsultig lainlaing pinulongan. Apan ang iyang mga ginikanan nagtuo nga ang doktrina sa Pentekostal wala itudlo sa Bibliya. Ang ilang pamilya mihunong sa pagsimba ug nagsugod sa pagtuon ug Bibliya uban sa mga Saksi ni Jehova.

Bisan tuod naguol siya sa sinugdanan, nakita ra ni Angela ang kalainan sa gitudlo sa iyang relihiyon kanhi ug sa mga pagtulon-an sa Bibliya. Pananglitan, iyang nabasa ang Juan 17:3, nga nag-ingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” Nasabtan ni Angela nga kadtong kahimut-an sa Diyos kinahanglang makabaton una ug kahibalo bahin kaniya. Siya nangutana, “Sa unsang pagkaagi nga makadawat man ko ug espiritu sa Diyos nga wala man koy nahibaloan bahin kaniya?” Si Angela miingon, “Nagpasalamat ako kang Jehova kay gitabangan niya ako sa pagkaplag sa matuod nga pagsimba pinaagi sa iyang dinasig nga Pulong.”

Tambag nga Makapausab ug Kinabuhi

“Mainiton kaayo ako ug ulo,” matod ni Gabriel nga taga-India. “Kon ako mapikal, maningka ko, manglabay ug mga butang, ug managmal. Ang pagtuon sa Bibliya nakatabang kanako sa pagpugong sa akong pagkamainiton ug ulo. Karon kalmado na ako bisan sa makapikal nga mga kahimtang.”

Si Gabriel nakabasa ug mga teksto sama sa Proverbio 16:32, nga nag-ingon: “Siya nga mahinay sa kasuko mas maayo pa kay sa tawong gamhanan, ug siya nga nagapugong sa iyang espiritu kay niadtong nagbihag sa usa ka siyudad.” Si Dhiraj, nga nakabuntog usab sa iyang pagkamainiton ug ulo, miingon, “Kana nga teksto nakatabang usab kanako sa pag-amgo nga usa ka kahuyangan ang pagkamainiton ug ulo, apan usa ka hiyas ang pagpugong niini.”

Si Philip, nga taga-Habagatang Aprika, bugoy. Kinabuhi na niya ang pagpanulis ug pagpamalikas, ug pirme siya makakitag away. Napriso siya tungod sa iyang mga krimen. Apan bisan pag ingon niana ang iyang kinabuhi, nangandoy gayod si Philip nga mahibalo bahin sa Diyos. Sa nagsugod siya sa pagtuon sa Bibliya uban sa mga Saksi ni Jehova, siya nadasig sa pag-alagad sa Diyos ug midesidir sa pag-usab sa iyang kinabuhi. Iyang gihunong ang iyang daotang mga buhat ug wala na makig-uban sa iyang kriminal nga mga barkada. Unsang mga kamatuoran sa Bibliya ang nakadasig kaniya sa pag-usab?

Gipakita sa mga Saksi ni Jehova kaniya ang mga pulong ni Jesus sa Juan 6:44. Kini nag-ingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” Si Philip miingon, “may nakita si Jehova kanako nga maayo ug giagak niya ako ngadto sa iyang katawhan, diin akong natagamtam ang kalipay sa pagpakig-uban sa mga igsoon sa pagtuo.” Natandog usab si Philip sa mga asoy sa Bibliya bahin sa gipakita ni Jehova nga kaluoy ngadto sa mahinulsolong mga makasasala. “Pinaagi niini nga mga asoy,” matod ni Philip, “akong nakita ang pagkamakataronganon ni Jehova sa iyang pagpakiglabot sa dili hingpit nga mga tawo nga naghinulsol.”—2 Samuel 12:1-14; Salmo 51.

Ang batan-ong si Wade nga taga-Australia palahubog, nagdroga, sugarol, ug imoral. Apan dili siya malipayon. Usa ka adlaw niana nakig-estorya siya sa mga Saksi ni Jehova ug midawat ug libreng pagtuon sa Bibliya sa balay. Unsay nakat-onan ni Wade?

“Nakadayeg gayod ako sa pagtratar ni Jesus sa mga tawo,” matod ni Wade. “Siya nagpakitag kalulot, kaluoy, ug gugma sa tanan, bisan sa mga bata. Sa nagkadaghan ang akong nakat-onan, mas midako ang akong tinguha sa pagsundog kaniya. Ang Bibliya nagtudlo kanako sa pagkahimong tinuod nga lalaki ug sa pagkahimong mas maayong tawo.” Apan komosta ang tanang daotang buhat nga iyang nahimo? Si Wade nagpadayon sa pag-ingon: “Akong nakat-onan sa Bibliya nga kon maghinulsol ako sa akong mga sala ug magbag-o, pasayloon ako sa Diyos. Gani, mahimo akong mabuhi sa walay kataposan sa usa ka paraisong yuta. Sa kataposan, may paglaom na ako!” (Mateo 5:5) Gihinloan ni Wade ang iyang kinabuhi ug karon nagsimba na kang Jehova nga may hinlo nga konsensiya.

Kining imong nabasa maoy mga eksperyensiya sa mga tawong nagtinguha sa pag-usab sa ilang kinabuhi. Ilang gisusi ang Bibliya aron mahibalo sila kon ang mga pagtulon-an niini makasulbad ba sa ilang mga problema ug makatubag sa ilang mga pangutana. Ang maayong mga resulta sa ilang pagpadapat sa mga tambag niini nakapakombinsir kanila nga sila makasalig sa mapuslanong giya sa Bibliya. Busa makasalig ka usab niini.

Ang inspiradong mga pulong sa kanhiayng panahon nag-ingon: “Malipayon ang tawo nga nakakaplag ug kaalam, ug ang tawo nga nakabaton ug katakos sa pag-ila, kay ang pagbaton niini ingon nga ganansiya labi pang maayo kay sa pagbaton ug plata ingon nga ganansiya ug ang pagbaton niini ingon nga abot labaw pa kay sa bulawan. Kini labi pang bililhon kay sa korales, ug ang tanang ubang butang nga makapahimuot kanimo dili makatumbas niini. Ang daghan nga mga adlaw anaa sa tuong kamot niini; sa walang kamot niini anaa ang bahandi ug himaya. Ang mga dalan niini maoy mga dalan sa kahimuot, ug ang tanang alagianan niini maoy pakigdait. Kini maoy kahoy sa kinabuhi niadtong mga nagakupot niini, ug kadtong mga nagahawid niini pagatawgong malipayon.”—Proverbio 3:13-18.

[Kahon/Hulagway sa panid 25]

KON SA UNSANG PAAGI NAKATABANG ANG BIBLIYA SA USA KA PINIRISO

Si Bill malipayon kaayog kaminyoon. Apan una pa sa unang anibersaryo sa iyang kasal, napriso siya tungod sa krimen nga iyang nahimo sa wala pa siya maminyo.

Human sa tumang kaguol tungod kay nawad-an na siya ug kagawasan, si Bill nakadesisyon sa paggamit sa iyang panahon sa prisohan sa mapuslanong paagi. Siya miingon, “Magbasa ug magtuon ako sa Bibliya diha sa akong higdaanan.” Ug gipadapat usab niya ang iyang nakat-onan. “Ako maluloton ug mahigalaon sa akong isigkapiniriso, ug sila nahibalo nga dili ako mobuhat ug daotan sama sa ilang ginahimo. Sila moingon: ‘Gusto ni Bill nga gamiton ang iyang panahon sa pagkat-on bahin sa Diyos ug sa Bibliya. Dili gayod siya mangitag samok.’

“Tungod sa akong maayong dungog, gilikay ako sa mga piniriso sa ilang mga away-away ug mga kagubot. Nakita sa mga guwardiya nga dili ako problema. Busa ila akong gihatagan ug mga trabaho nga layo sa mga piniriso halos sa tibuok adlaw. Ang pagpadapat sa Bibliya diha sa akong kinabuhi nakapanalipod gayod kanako.”

Si Bill mitambong sa mga tigom sa mga Saksi ni Jehova nga gihimo diha sa prisohan ug puliki siya sa pagsulti sa mga piniriso bahin sa mga butang nga iyang nakat-onan. Siya nabawtismohan ingong Saksi ni Jehova samtang iyang gisilbihan ang iyang sentensiya. Mikomento bahin sa iyang nangagi, siya miingon: “Giusikan lang nako ang halos 50 ka tuig sa akong kinabuhi, ug gusto kong magbag-o. Kombinsido ako nga ang bugtong paagi nga mahimo kana sa usa ka piniriso mao ang pagpadapat sa mga pagtulon-an sa Bibliya. Ug ang tukmang paagi sa pagkat-on sa Bibliya mao ang pagtuon niini uban sa mga Saksi ni Jehova. Ang ilang relihiyon lang ang nagtudlo bahin sa kamatuoran sa Bibliya.”

Karon nga nakagawas na sa prisohan, si Bill aktibo nga nag-alagad sa kongregasyon sa mga Saksi ni Jehova sa Amerika. Siya ug ang iyang asawa padayong nagtuon sa Pulong sa Diyos ug nagpadapat sa mga pagtulon-an niini. Ila gayong gipabilhan ang giingon sa Isaias 48:17, 18: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan. Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.”

[Hulagway sa panid 23]

Si Karen, U.S.A.

[Hulagway sa panid 23]

Si Angela, Romania

[Hulagway sa panid 24]

Si Dhiraj, India

[Hulagway sa panid 24]

Si Gabriel, India

[Hulagway sa panid 24, 25]

Si Philip ug iyang pamilya, Habagatang Aprika

[Hulagway sa panid 24]

Si Wade, Australia