Luwas nga Umaabot Ilalom sa Pagmando sa Diyos
SA DILI madugay matapos na gayod ang atong mga kabalaka bahin sa umaabot, kay mandoan na sa Diyos ang Yuta pinaagi sa iyang kagamhanan, ang Gingharian sa Diyos. Diha sa hunahuna ni Jesus kining talagsaong umaabot sa dihang gitudloan niya ang iyang mga sumusunod sa pag-ampo: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.”—Mateo 6:9, 10.
Ang Gingharian sa Diyos dili gayod makigtambayayong, ni mogamit ug politikal nga mga lider. Sa kasukwahi, hanawon niini ang tanang lama sa independenteng pagmando sa tawo, sama sa gipakita sa tagna ni Daniel bahin sa “kataposang mga adlaw,” ang panahon nga kita nagkinabuhi. (2 Timoteo 3:1) “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. . . . Kini magadugmok ug magatapos niining tanang [hinimog tawong] gingharian, ug kini mobarog hangtod sa panahong walay tino.” (Daniel 2:44) Kining mga pulonga dili gayod makapahupay niadtong mopalabi sa pagmando sa tawo. Apan alang sa tanang naninguha sa pagkasoberano sa Diyos pinaagi sa iyang Gingharian, kini maoy maanindot kaayo nga saad.
Talagsaong Umaabot!
Inigmando sa Gingharian sa Diyos sa tibuok yuta, ang mga ginsakpan niini dili mabahin sa politika, rasa, relihiyon, o mga utlanan. Hinunoa, molukop sa tibuok yuta ang ilang panag-igsoonay tungod sa ilang pagtuo sa Diyos ug tim-os nga gugma. (Juan 13:34, 35; 17:3, 17) Oo, ilalom sa Gingharian sa Diyos, “molambo ang matarong,” ug duna unyay “kadagaya sa pakigdait hangtod nga ang bulan mahanaw na.”—Salmo 72:7.
Gawas pa niini, hingpiton sa Gingharian sa Diyos ang panghunahuna ug lawas sa masinugtanong mga tawo, nga maghanaw sa tanang sakit, pag-antos ug kamatayon. (Pinadayag 21:3, 4) Ang resulta? Ang atong planeta bug-os nga mahimong paraiso, ug matuman na gayod ang orihinal nga katuyoan sa Diyos nga iyang gisulti sa Eden.a—Genesis 1:28.
Ang Bugtong Maayong Balita
Sa dihang gihatag ang mga ilhanan sa “kataposan sa sistema sa mga butang,” gilakip ni Jesus ang talagsaong bahin niini. (Mateo 24:3-7) Siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—Mateo 24:14.
Uyon sa kabubut-on sa Diyos, sa 2007 halos pito ka milyong Saksi ni Jehova diha sa 236 ka nasod ang nagpaambit sa mensahe sa Gingharian sa ilang mga silingan. Malipayon nilang gigamit sa pagsangyaw ang halos 1.4 bilyong oras gikan sa ilang personal nga panahon. Nganong kombinsido kaayo ang mga Saksi sa mga saad sa Bibliya? Yano lamang ang tubag. Sama sa gisaysay sa sunod nga artikulo, ang Diyos kanunayng magtuman sa iyang gisulti.—Roma 3:4.
[Footnote]
a Tan-awa ang artikulong “Ang Hunahuna sa Bibliya: Mahimo Kahang Paraiso ang Tibuok-Yuta?” sa panid 10.
[Blurb sa panid 7]
Ang Bibliya nag-ingon nga duna unyay “kadagaya sa pakigdait”