Kaminyoon Nameligro

“Dili na ko makaagwanta niining among pagpuyo!” Nakadungog ka na bag ingon niana nga komento? Kon minyo ka, may panahon ba nga mibati ka ug sama niana?

DAGHAN ang nagminyo human maugmad ang mainitong gugma sa usag usa, samtang ang uban nagdali-dalig minyo tungod sa nag-uros-uros nga pagbati, ug silang tanan nagdahom nga magmalipayon sa ilang kaminyoon. Apan matikdi kining giingon sa usa ka magtatambag: “Sila moduol kanako sa dihang mawad-an na silag paglaom nga magmalipayon,” matod pa niya. “Nahigawad sila sa ilang kapikas, sa kaminyoon, sa gugma, ug usahay bisan sa kinabuhi.” Ang bugtong rason kon nganong padayon silang nag-ipon mao ang ilang sertipiko sa kaminyoon ug ang balay nga ilang gipuy-an.

Tungod sa nagbuntaog nga mga problema, ang pipila ka kaminyoon nabungkag. Ang grabeng tensiyon diha sa trabaho, pagtrabaho sa gabii, ug pag-obertaym, makapaluya sa usa nga halos wala na siyay panahon sa iyang kapikas bisan tuod nagminahalay sila. Ang gugma ug pagtahod mahimong inanay usab nga mawala tungod sa kalisod, mga problema sa pagmatuto sa mga bata, pagbalhin ug pinuy-anan, kausaban sa trabaho, ug dili-maayong panglawas. Sa ato pa, ang mga kausaban nga mahitabo sa pagpanglabay sa panahon makapatunghag mga problema nga mahimong mosangpot sa panagbulag.

Daghang inahan ang bug-os-panahong nagtrabaho ug sa samang higayon sila naghimo sa mga buluhaton sa balay. Wala na silay laing giatubang gawas sa ilang trabaho ug sa ilang mga anak. Gumikan usab sa tensiyon ug kakapoy, ang mga magtiayon wala nay panahon sa usag usa. Busa daghan ang mibati nga daw gisuyop sila sa lilo ug wala na silay mahimo pa. Kini mosangpot sa kahigawad ug pagkabugnaw sa gugma. Nganong daghan kaayong kaminyoon ang nag-atubang ug bug-at nga mga problema? Unsay imong mahimo aron magmalipayon ug magmalamposon ang imong kaminyoon?