Gidisenyo ba Kini?

Ang Dili-Masuphag-Tubig nga Dahon sa Lotus

◼ Plastik nga mga tasa nga kanunayng hinlo? Mga bentana nga dili mabasa sa ulan? Gagmiting nga mga makina nga maayog andar? Sumala sa mga siyentipiko, pipila lamang kini sa makuhang kaayohan kon atong madiskobrehan ang mga sekreto sa dahon sa lotus.

Hunahunaa: Ang dahon sa lotus adunay gagmiting nga mga bugdo-bugdo nga puno sa talo. Tungod niini ang tubig dili makasuhop sa dahon. Kay naghandag man ang dahon, ang tubig igo lang modagayday. Unsay resulta niini? Ang dahon sa lotus dili lang pirmeng uga kondili hinlo pa gyod, kay mabanlas man ang hugaw ug abog.

Gusto sa mga siyentipiko nga mohimog mga butang nga dili masuphag tubig sama sa dahon sa lotus. Bisan ang gagmiting nga mga makina nga mahimong madaot sa tubig maprotektahan kon ilang sundogon ang pagkadisenyo sa dahon sa lotus. “Daghan kaayo kinig kaayohan,” nagtaho ang Science Daily.

Unsay imong hunahuna? Ang dahon sa lotus sulagma lang ba o kini gidisenyo?