Tabang Gikan sa ‘Diyos sa Kahupayan’

SI Haring David nakaagi ug grabeng kaguol ug daghang “makapatugaw nga mga hunahuna.” Bisan pa niana, dako kaayo siyag pagtuo nga nakasabot ang Maglalalang kanato. Siya misulat: “Oh Jehova, ikaw nakasusi kanako, ug ikaw nakaila kanako. Ikaw nahibalo sa akong paglingkod ug sa akong pagtindog. Gitagad mo ang akong hunahuna gikan sa halayo. Kay walay mausa ka pulong sa akong dila, apan, tan-awa! Oh Jehova, ikaw nahibalo na niining tanan.”—Salmo 139:1, 2, 4, 23.

Makaseguro usab kita nga ang atong Maglalalang nakasabot kanato ug sa makapaluyang epekto sa depresyon diha sa atong dili hingpit nga hunahuna ug lawas. Siya nahibalo sa mga hinungdan sa depresyon ug kon sa unsang paagi ato kining maantos. Dugang pa, iyang gipadayag kon sa unsang paagi wagtangon niya sa dayon ang depresyon. Wala nay lain pang makatabang kanato kay sa atong maluluy-ong “Diyos, Kinsa naghupay ug nagdasig ug nagpalagsik ug naglipay niadtong nagmagul-anon.”—2 Corinto 7:6, The Amplified Bible.

Apan kadtong nag-antos sa depresyon tingali mahibulong kon sa unsang paagi makatabang ang Diyos kon sila atakehon sa grabeng kaguol.

Maduol ba ang Diyos niadtong nag-antos sa depresyon?

Ang Diyos haduol sa iyang mga alagad nga nag-antos sa depresyon nga daw siya nagauban niadtong ‘dugmok ug maluya sa espiritu, sa pagbuhi sa espiritu sa mga timawa ug sa pagbuhi sa kasingkasing sa mga dugmok sa espiritu.’ (Isaias 57:15) Pagkamakahupay ang pagkahibalo nga “si Jehova haduol niadtong mga dugmok ug kasingkasing, ug siya magaluwas niadtong mga nahugno sa espiritu”!—Salmo 34:18.

Sa unsang paagi ang nagmagul-anon makabaton ug kahupayan gikan sa Diyos?

Sa tanang panahon, ang mga magsisimba sa Diyos makaduol sa “Tigpatalinghog sa pag-ampo,” kinsa makatabang kanato sa pag-antos sa makaguol nga pagbati ug mga kahimtang. (Salmo 65:2) Ang Bibliya nag-awhag kanato sa pagbubo sa atong kasingkasing ngadto kaniya: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”—Filipos 4:6, 7.

Unsa kon tungod sa mga pagbati sa kawalay pulos maghunahuna kita nga wala dungga ang atong mga pag-ampo?

Tungod sa depresyon, tingali makaingon kita nga kulang pa ang atong paningkamot sa pagpahimuot sa Diyos. Apan ang atong langitnong Amahan nakasabot sa atong emosyon, kay siya “nahinumdom nga kita abog.” (Salmo 103:14) Bisan pag ‘hukman kita sa atong mga kasingkasing,’ atong makombinsir ang atong kasingkasing nga “ang Diyos mas labaw kay sa atong mga kasingkasing ug nahibalo sa tanang butang.” (1 Juan 3:19, 20) Busa makagamit kag mga pulong diha sa imong mga pag-ampo nga imong mapupo gikan sa mga teksto sa Bibliya sama sa Salmo 9:9, 10; 10:12, 14, 17; ug 25:17.

Unsa kon nagmagul-anon kaayo kita nga maglisod kita sa pagpahayag sa atong gibati?

Kon sakit kaayo ang imong dughan nga maglisod ka sa pagpahayag sa imong gibati, ayaw ug surender! Padayon sa pagsangpit sa “Amahan sa malumong mga kaluoy ug . . . Diyos sa tanang paghupay,” kay siya nakasabot sa imong pagbati ug panginahanglan. (2 Corinto 1:3) Si Maria, nga gihisgotan sa unang artikulo, miingon: “Usahay kon maglibog kaayo ko, dili ko mahibalo kon unsay akong iampo. Apan nahibalo ko nga ang Diyos nakasabot ug motabang nako.”

Sa unsang paagi dunggon sa Diyos ang atong mga pag-ampo?

Walay gipakita ang Bibliya nga wagtangon sa Diyos ang atong tanang problema karon. Apan ang Diyos mohatag ug kusog sa pagsagubang sa “tanang butang”—apil na ang depresyon. (Filipos 4:13) “Sa unang higayon nga giatake ako ug depresyon,” miingon si Martina, “nag-ampo ako kang Jehova sa pag-ayo kanako dihadiha kay abi nakog dili na ako makaagwanta. Karon igo na kanako ang pag-ampo alang sa kusog matag adlaw.”

Ang Kasulatan maoy tuboran sa espirituwal nga kusog sa pagtabang sa mga tawo nga nag-antos ug depresyon sa pagsagubang niini. Si Sarah, nga nag-antos ug depresyon sulod sa 35 ka tuig, nakasinati mismo sa pagkahinungdanon sa pagbasag Bibliya adlaw-adlaw. Siya miingon: “Mapasalamaton kaayo ko sa nahimo sa mga doktor kanako. Apan labaw sa tanan nakita nako ang espirituwal ug praktikal nga benepisyo sa pagbasa sa Pulong sa Diyos. Nabatasan na nako ang pagbasa niini.”

Mawala na Unya ang Depresyon!

Sa dinhi pa si Jesu-Kristo sa yuta, iyang gipasundayag ang iyang hinatag sa Diyos nga gahom sa pag-ayo sa tanang balatian. Si Jesus andam gayod sa paghupay sa mga tawo nga nag-antos ug grabeng sakit. Dugang pa, siya nahibalo sa kasakit sa nagmasulub-on. Sa gabii una pa siya mamatay sa masakit nga kamatayon, ‘si Kristo nangamuyo ug nangaliya ngadto sa Usa nga arang makaluwas kaniya gikan sa kamatayon uban sa kusog nga mga pagtuaw ug mga luha.’ (Hebreohanon 5:7) Bisag makapaguol kaayo kadto kang Jesus, kita nakabenepisyo karon kay “siya makaarang sa pagtabang kanila nga ginasulayan.”—Hebreohanon 2:18; 1 Juan 2:1, 2.

Ang Bibliya nagpadayag nga katuyoan sa Diyos ang pagwagtang sa tanang makapaguol nga mga kahimtang nga makapasamot sa depresyon. Siya nagsaad: “Ako naglalang ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni kini sila motungha pa sa kasingkasing. Apan pagsadya kamo ug paglipay hangtod sa kahangtoran sa kon unsay akong gilalang.” (Isaias 65:17, 18) Ipasig-uli sa “bag-ong mga langit,” ang Gingharian sa Diyos, ang “bag-ong yuta,” usa ka katilingban sa matarong nga mga tawo sa yuta, nga hingpit ug pisikal, emosyonal, ug espirituwal nga panglawas. Ang tanang sakit wagtangon hangtod sa hangtod.