Kahupayan Alang sa Naluya
“Ang tibuok kalalangan duyog nga nagpadayon sa pag-agulo ug anaa sa kasakitan hangtod karon.” (Roma 8:22) Sa panahon nga kana gisulat kapin sa 1,900 ka mga tuig kanhi ang pag-antos sa katawhan dako. Daghan ang naluya. Mao nga, ang mga Kristohanon giaghat: “Hupaya ang magul-anong mga kalag.”—1 Tesalonica 5:14.
Karong adlawa, mas dako ang kalisdanan sa katawhan, ug mas daghang tawo kay sa masukad ang naluya. Apan angay ba kanang makapakurat kanato? Dili gayod, tungod kay ang Bibliya nagpaila niini ingong ang “kataposang mga adlaw” ug nagtawag kanilang “mga panahong lisod sagubangon.” (2 Timoteo 3:1-5) Si Jesu-Kristo nagtagna nga sa panahon sa kataposang mga adlaw, aduna unyay “makalilisang nga mga talan-awon.”—Lucas 21:7-11; Mateo 24:3-14.
Sa dihang ang mga tawo makasinati ug walay puas nga kabalaka, kahadlok, kasubo, o ubang samang negatibong mga pagbati, sila sa masubsob mamaluya. Ang hinungdan sa depresyon o tumang kaguol mahimong ang kamatayon sa usa ka hinigugma, diborsiyo o panagbulag, pagkawala sa trabaho, o sakit nga walay-pagkaayo. Ang mga tawo usab mahimong maluya sa dihang makaugmad sila ug pagbati sa kawalay-bili, sa dihang sila mobati nga sila napakyas o nakapahigawad sa tanan. Bisag kinsa mahimong magun-ob tungod sa bug-at nga kahimtang, apan sa dihang ang usa ka tawo makaugmad sa pagbati sa kawalay-paglaom ug dili makakita ug lutsanan gikan sa daotang kahimtang, ang hilabihang depresyon o kaluya lagmit mosangpot.
Ang mga tawo sa karaang panahon nakasinati sa susamang mga pagbati. Si Job nag-antos sa sakit ug personal nga kaalaotan. Mibati siya nga gipasagdan siya sa Diyos, busa siya nagpahayag nga gipul-an sa kinabuhi. (Job 10:1; 29:2, 4, 5) Si Jacob naluya tungod sa gituohang kamatayon sa iyang anak, dili gustong lipayon ug nangandoy nga mamatay. (Genesis 37:33-35) Kay mibati nga sad-an tungod sa seryosong sala, si Haring David nag-agulo: “Naglakaw ako sa tibuok adlaw nga masulub-on. Naminhod ako ug nahugno sa hilabihan gayod.”—Salmo 38:6, 8; 2 Corinto 7:5, 6.
Karong adlawa, daghan ang naluya tungod sa pagpabudlay ug hilabihan sa ilang kaugalingon, nga nagtinguha sa pagsunod sa adlaw adlaw nga buluhaton nga saylo na sa ilang mental, emosyonal, ug pisikal nga mga katakos. Dayag ang kabug-at, inubanan sa negatibong mga hunahuna ug mga pagbati, makaapektar sa lawas ug makaamot sa kadili-timbang sa kemikal diha sa utok, mao nga motungha ang depresyon o kaluya.—Itandi ang Proverbio 14:30.
Tabang nga Ilang Gikinahanglan
Si Epafrodito, usa ka Kristohanon sa unang-siglo gikan sa Filipos, “nagmagul-anon tungod kay nadunggan [sa iyang mga higala] nga siya nasakit.” Si Epafrodito, nga nagkasakit pagkatapos sugoa sa iyang mga higala sa Roma sa pagdala ug mga abiyo kang apostol Pablo, tingali mibati nga siya nakapahigawad sa iyang mga higala ug nga sila nag-isip kaniya nga usa ka kapakyasan. (Filipos 2:25-27; 4:18) Sa unsang paagi si apostol Pablo nakatabang?
Iyang gipapauli si Epafrodito dala ang usa ka sulat ngadto sa mga higala sa Filipos nga nag-ingon: “Ihatag [kang Epafrodito] ang naandang pagdawat diha sa Ginoo uban ang bug-os nga kalipay; ug mahala kanunay ang ingon nianang matanga sa mga tawo.” (Filipos 2:28-30) Ang kamatuoran nga si Pablo nagsulti ug maayo bahin kaniya ug nga ang mga taga-Filipos nag-abiabi kaniya uban ang kainit ug pagmahal, sa tino nakapalipay kang Epafrodito ug nakatabang sa paghupay sa iyang kaluya.
Walay duhaduha, ang tambag sa Bibliya nga “hupaya ang magul-anong mga kalag” maoy labing maayo. “Kinahanglan nga imong mahibaloan nga ang uban nagmahal kanimo ingong usa ka tawo,” matud sa usa ka babaye kinsa nag-antos gumikan sa depresyon. “Kinahanglan nga ikaw makadungog nga may mosulti, ‘Nakasabot ako; mamaayo ra ka.’”
Ang tawo nga naluya sa subsob kinahanglan nga manlimbasog pinaagi sa pagpangita ug mabinationg tawo nga mapahungawan sa iyang mga pagbati. Kinahanglan nga siya usa nga maayong tigpaminaw ug mapailobon kaayo. Siya angay nga molikay sa pagsermon sa naluyang usa o paghimog mahukmanong mga pulong, sama sa, ‘Kinahanglan nga dili ka mobati niana’ o, ‘Sayop na nga tinamdan.’ Ang mga emosyon sa naluyang tawo maoy tandogonon, ug ang maong mahinawayong mga komento makapasamot lamang sa iyang pagbatig daotan sa iyang kaugalingon.
Ang usa nga naluya lagmit mobati nga walay-bili. (Jonas 4:3) Apan, angay hinumdoman sa usa ka tawo nga ang importante gayod mao ang pagpabili sa Diyos sa usa. Ang mga tawo ‘nag-isip nga walay hinungdan’ kang Jesu-Kristo, apan kana wala makapausab sa iyang tinuod nga bili alang sa Diyos. (Isaias 53:3) Magmasaligon, maingon gayod nga ang Diyos nahigugma sa iyang minahal nga Anak, siya nahigugma usab kanimo.—Juan 3:16.
Si Jesus naluoy kanilang anaa sa kaguol ug nagsulay sa pagtabang kanila nga makasabot sa ilang indibiduwal nga bili. (Mateo 9:36; 11:28-30; 14:14) Iyang gisaysay nga gipabilhan ngani sa Diyos ang gagmay, dili magsilbi nga mga guryon. “Walay usa kanila nga mahikalimtan atubangan sa Diyos,” matud niya. Unsa pa kaha ka dako ang pagpabili niya sa mga tawo nga nagasingkamot sa pagbuhat sa iyang kabubut-on! Bahin niini kanila si Jesus nag-ingon: “Apan bisan ang mga buhok sa inyong mga ulo naihap ang tanan.”—Lucas 12:6, 7.
Tinuod, ang usa ka tawo nga naluya pag-ayo, nga gidaog sa iyang mga kahuyangan ug mga kakulangan, lagmit malisdan sa pagtuo nga ang Diyos nagpabili gayod kaniya. Basin mobati siya nga dili na gayod siya takos sa gugma ug pagtagad sa Diyos. ‘Ang atong mga kasingkasing mahimong mohukom kanato,’ pamatuod sa Pulong sa Diyos. Apan mao ba kana ang motino? Dili kana mao. Ang Diyos nakasabot nga ang makasasalang mga tawo lagmit mohunahuna ug negatibo ug ngani mosaway sa ilang kaugalingon. Busa ang iyang Pulong nagalipay kanila: “Ang Diyos mas labaw kay sa atong mga kasingkasing ug nahibalo sa tanang butang.”—1 Juan 3:19, 20.
Oo, ang atong mahigugmaon langitnong Amahan makakita ug labaw pa kay sa atong mga sala ug mga kasaypanan. Siya nahibalo sa mga kahimtang sa pagpasaylo, sa atong tibuok dalan sa kinabuhi, sa atong mga motibo ug mga kiling. Siya nahibalo nga kita nakapanunod ug sala, sakit, ug kamatayon ug busa may dagkong mga limitasyon. Ang kamatuoran nga kita mobati ug kaguol ug kalagot sa atong kaugalingon pamatuod mismo nga dili nato gustong makasala ug wala pa gayod maghingapin sa pagkasala. Ang Bibliya nagaingon nga kita “gipailalom sa pagkawalay-pulos” nga dili atong kagustohan. Mao nga ang Diyos nakasabot sa atong makaluluoyng kahimtang, ug siya sa kamanggiluy-on naghunahuna sa atong mga kahuyangan.—Roma 5:12; 8:20.
“Si Jehova maluluy-on ug mapuangoron,” kita gipasaligan. “Ingon sa pagkalayo sa sidlakan gikan sa kasadpan, sa mao nga gilay-on iyang gipahilayo gikan kanato ang atong mga kalapasan. Kay siya nahibalo pag-ayo sa atong pagkaumol, nga nahinumdom nga kita abog.” (Salmo 103:8, 12, 14) Sa pagkatinuod, si Jehova mao “ang Diyos sa tanang paghupay, kinsa nagahupay kanamo sa tanan namong kasakitan.”—2 Corinto 1:3, 4.
Ang tabang nga labing gikinahanglan sa mga naluya naggikan sa pagpakigsuod sa ilang maluluy-ong Diyos ug sa pagdawat sa iyang imbitasyon sa ‘pagtugyan sa ilang palas-anon kaniya.’ Siya sa pagkatinuod makahimo sa ‘pagpabuhi sa kasingkasing sa mga nangahugno.’ (Salmo 55:22; Isaias 57:15) Busa ang Pulong sa Diyos nagadasig sa pag-ampo, nga nag-ingon: “Itugyan ang tanan ninyong mga kabalaka [kang Jehova], kay siya may kahingawa kaninyo.” (1 Pedro 5:7) Oo, pinaagi sa pag-ampo ug sa pangaliyupo ang mga tawo makaduol sa Diyos ug makatagamtam sa “kalinaw sa Diyos nga labaw sa tanang panghunahuna.”—Filipos 4:6, 7; Salmo 16:8, 9.
Ang praktikal nga mga pagpasibo sa estilo-sa-kinabuhi makatabang usab sa usa sa pagbuntog sa maluyahong pagbati. Ang pisikal nga ehersisyo, pagkaon sa masustansiyang pagkaon, paghanggab sa preskong hangin ug igong pahulay, ug paglikay sa hinobrang pagtan-aw sa TV tanantanan hinungdanon. Usa ka babaye nakatabang sa mga naluya pinaagi sa pagpabaktas kanila ug layo. Sa dihang ang naluya nga babaye nag-ingon: “Dili ko gustong mobaktas,” ang babaye sa kamaayo apan malig-on mitubag: “Oo, mobaktas ka gayod.” Ang babaye nagtaho: ‘Kami mibaktas ug unom ka kilometro. Sa dihang kami namauli, siya lapoy, apan nahuwasan ang iyang pagbati. Dili ka makatuo kon unsa ka dako ang ikatabang sa kusganong ehersisyo gawas kon imong masulayan kana.’
Hinuon, usahay imposible nga buntogon sa bug-os ang kaluya, bisan pag sulayan ang tanan, lakip ang medikal nga mga terapiya. “Nasulayan nako ang tanan,” matud sa usa ka edad-edaran nga babaye, “apan ang kaluya nagpabilin.” Sa susama, karon subsob nga imposible nga tambalan ang pagkabuta, pagkabungol, o bakol. Bisan pa, ang mga naluya makakaplag ug kahumpayan ug paglaom pinaagi sa regular nga pagbasa sa Pulong sa Diyos, nga nagatagana ug tinong paglaom sa dumalayong pagkaayo gikan sa tanang tawhanong mga balatian.—Roma 12:12; 15:4.
Sa Dihang Wala nay Maluya Pag-usab
Sa dihang gibatbat ni Jesus ang teribleng mga butang nga moabot sa yuta sa kataposang mga adlaw, siya midugang: “Inigsugod pagkahitabo niining mga butanga, tindog nga tul-id ug ihangad ang inyong mga ulo, tungod kay ang inyong kaluwasan nagakaduol na.” (Lucas 21:28) Si Jesus naghisgot bahin sa kaluwasan ngadto sa matarong bag-ong kalibotan sa Diyos, diin “ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”—Roma 8:21.
Pagkadakong kahupayan unya alang sa katawhan nga mahigawas sa mga kabug-at sa kagahapon ug sa pagmata kada adlaw uban sa samag-kristal-katin-aw nga mga pangisip, nga ikag nga mobuhat sa buluhaton sa maong adlaw! Dili na mababagan si bisan kinsa tungod sa dag-om sa kaluya. Ang seguradong saad ngadto sa katawhan mao nga ang Diyos ‘magapahid sa tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.’—Pinadayag 21:3, 4.
Gawas kon gipaila, ang tanang kinutlo sa Bibliya nagagikan sa Bag-ong Kalibotang Hubad sa Balaang Kasulatan.