Pagmata! Nakaluwas sa Kinabuhi sa Batang Gisabak

● Ang taga-Mexico nga si Anita, nga may tulo ka anak, mabdos na usab.a Iyang gisultihan ang iyang bana nga dili na niya gustong manganak pa, ug buhaton niya ang tanan aron makuha ang iyang gisabak. Buot pa gani niyang maghikog! Nianang panahona, si Anita nagtuon sa Bibliya uban sa mga Saksi ni Jehova apan wala pa kaayo magpadapat sa iyang nakat-onan. “May pagka-garbosa ako,” matod niya.

Ang Saksi nga nagdumalag pagtuon kang Anita nagtudlo kaniya sa mga prinsipyo sa Bibliya nga mapadapat sa iyang kahimtang. Pananglitan, iyang gitudlo kang Anita nga giisip sa Diyos nga sagrado ang kinabuhi sa bata diha sa sabakan. Sa Israel kaniadto, kon pananglit ang usa ka tawo makaaksidente ug babayeng mabdos, dayon ang babaye o ang iyang gisabak mamatay, ang maong tawo pagahukmang mamumuno sumala sa Balaod sa Diyos. (Exodo 21:22, 23)b Apan si Anita desidido na gayod nga magpakuha.

“Dunay misugyot nga aron makuha ang bata, magpaindyeksiyon kog usa ka matang sa medisina,” miingon si Anita. “Busa mipalit ko niana ug akong gihangyo ang akong higala nga indyeksiyonan ko. Buweno, iya kong giindyeksiyonan apan wala kadtoy epekto. Akong nasayran sa ulahi nga dili gusto ang akong higala nga makuha ang bata, ug tubig diay ang iyang giindyeksiyon.”

Apan nangita gihapog paagi si Anita. Sa upat ka bulan na ang iyang tiyan, nakakita siyag doktor nga maoy mohimo sa aborsiyon. Unom ka adlaw una siya magpakuha, gihatagan siya sa Saksi ug kopya sa artikulong “Talaadlawan sa Batang Wala pa Matawo,” nga gipatik sa Septiyembre 22, 1980 nga isyu sa Pagmata! Ang kataposang bahin sa maong “talaadlawan” nag-ingon: “Karon ako gipatay ni mama.” Morag gikumot ang kasingkasing ni Anita, ug pila ka oras siyang naghilak. “Nakapahigmata kanako ang maong artikulo,” siya miingon.

Nanganak si Anita ug usa ka himsog nga batang babaye. Siya miingon: “Nalipay ko nga akong nailhan si Jehova, kinsa akong gihigugma pag-ayo.” Iya usab nga gitudloan ang iyang anak bahin sa Pulong sa Diyos aron ang bata mahigugma usab kang Jehova. Ang iyang anak miingon nga utang niya ang iyang kinabuhi sa Diyos—tungod kay Siya ang Tinubdan sa kinabuhi, ug ang mga pagtulon-an diha sa Iyang Pulong, nga gihisgotan diha sa Pagmata!, nakaluwas sa iyang kinabuhi.

[Mga footnote]