Kon Nganong Gibiyaan Nako ang Akong Dakog Kita nga Karera

Sumala sa Giasoy ni Martha Teresa Márquez

HILIG kaayo kong mokanta, bisan diha sa estasyon sa radyo sa bata pa ko. Nakaeskuyla ko kutob ra sa kindergarten, apan sa ulahi nagtuon ko sa pag-awit sa Mexico City ubos sa direktor sa symphony orchestra sa nasod.

Sa 1969, sa nag-edad ako ug 24, gipaadto ako sa akong amigang danser sa usa ka awdisyon sa ilado kaniadto nga restawran ug bar nga gitawag ug La Rampa Azul. Akong gikanta ang popular nga awit nga Cucurrucucú Paloma nga gihimo sa Mexicano nga tigkomposog awit nga si Tomás Méndez, ug ang mga mamiminaw giganahan pag-ayo. Mao kadto ang sinugdanan sa akong karera ingong usa ka mag-aawit. Ingong mag-aawit, Romelia Romel ang akong gidalang ngalan.

Nakauban nakog trabaho si Tomás Méndez, maingon man ang ubang banggiitang Mexicanong tigkomposog awit ug mga mag-aawit nga sila si Cuco Sánchez ug Juan Gabriel. Makapalipay kaayong makita ang akong ngalan nga gihayagan ug nagkidlap-kidlap nga suga ug diha sa mga mantalaan ug mga magasin. Mokanta ako sa mga naytklab, sa radyo, ug mobiyahe sa lainlaing lugar sa Mexico ug Belize aron sa pagkanta. Nakauban usab nakog pasundayag ang popular nga Mexicanong propesyonal nga tigpakatawa nga si Leonorilda Ochoa sa bag-o pa ang iyang programa sa telebisyon sa Mexico.

Sa ngadto-ngadto, napopular ako ug midako ang akong kita, nga makaarang sa pagpalit ug mga alahas, mga mink coat, ug sa pagpuyo sa mahalon nga apartment. Anaa na nako ang tanan, apan dili ako malipayon. Ang akong kinabuhi walay kahulogan. Bisag gipadako nga Romano Katoliko, maulaw ako sa pagsimba kay para nako hugaw ako tungod sa akong imoral nga kinabuhi.

Kon sa Unsang Paagi Nakakat-on Ako sa Paghigugma Kang Jehova

Samtang nagrehersal para sa akong unang plaka, akong gisulti ang akong gibati ngadto sa usa ka amiga, si Lorena Wong nga mag-aawit sa lumadnong mga kanta. Akong gisultihan siya nga gusto kong magmadre aron makatabang sa mga kabos. “Magmadre ka? Nabuang ka!” siya miingon.

Dayon siya nangutana: “Nahibalo ka ba sa ngalan sa Diyos?”

“Si Ginoong Jesu-Kristo,” miingon ko.

“Dili oy, Jehova ang iyang ngalan,” siya miingon. “Si Jesus Anak niya.”

“Jehova?” Nangutana ko. Karon pa ko nakadungog nianang ngalana. Gihatagan ako ni Lorena ug Bibliya ug misaad nga magpadala siyag magtutudlo, nga usa ka Saksi ni Jehova, sa pagduaw kanako.a

Matag kita namo ni Lorena, ako siyang pangutan-on, “Kanus-a man nimo ipadala ang magtutudlo?” Gusto kong makakat-on pag dugang bahin sa Diyos.

Kasamtangan, nagsugod ako pagbasag Bibliya ug akong nakita nga Jehova gayod ang ngalan sa Diyos. (Salmo 83:18) Nakuratan ako niana. Akong nabasahan usab ang Napulo ka Sugo ug nakalitan ko sa sugo nga nag-ingon: “Dili ka manapaw.” (Exodo 20:14) Niadtong panahona, duna koy puyo-puyo nga usa ka minyo, nga maoy amahan sa akong walo ka bulang anak nga lalaki. Kining bataa mao ang akong ikaduhang anak. Duna na koy laing anak nga lalaki sa laing lalaki.

Usa ka adlaw niana, samtang nagpraktis sa usa ka awit, dihay nanuktok sa akong apartment. Ang nanuktok mao ang magtutudlo ni Lorena, si Mauricio Linares ug iyang asawa. Ilang gisaysay kanako kon unsay katuyoan sa Diyos alang sa katawhan ug gibinlan akog librong Ang Kamatuoran nga Motultol sa Kinabuhing Dayon.b Usa ka gabii lang nako kining gibasa, bisag naglisod ako sa pagsabot sa ubang mga pulong. Diha ako nagsugod sa paghigugma kang Jehova.

Gibag-o Ko ang Akong Pagkinabuhi

Samtang gitabangan ako sa mga Saksi sa pagtuon sa Bibliya ug sa pagpauswag sa akong katakos sa pagbasa, akong nakita nga kinahanglan akong magbag-o aron mapahimut-an si Jehova. Akong gidespatsar ang akong mga rebulto, medalya, ug mga pangpasuwerte, bisag gama pa kinig bulawan.

Naglisod gyod ko sa pag-undang sa pagpanigarilyo ug sa sobrang pag-inom. Kon makaagi kog tindahag ilimnong makahubog, maglaway ko. Wala na ko makighugoy-hugoy sa akong mga higala, kay ila kong tanyagan ug alkoholikong ilimnon ug dapiton sa pagpangaon sa mahalong mga restawran. Nahibalo ko nga moresulta kini sa pagkahimong alkoholiko.

Naglisod pod ko paghunong ug adtog mga parti uban sa mga dato ug mga tawong inila. Sa dihang gidapit ko sa birthday party sa usa ka iladong boksidor nga taga-Cuba, ako miampo: “Kataposan na lang gyod kini Jehova. Dili na gyod ko motambong ug ingon niini nga okasyon o mohimog butang nga dili makapahimuot kanimo.” Ug ako gyod kanang gituman.

Nakigbulag ako sa amahan sa akong ikaduhang anak bisag kuwartahan pa siya ug wala ko maengganyo sa tanan niyang gipanaad kanako kon dili ko makigbulag niya. Dili kini lalim kay nahigugma gayod ako kaniya, ug nahibalo siya niana. Siya hinambog nga miingon: “Ako ang imong Diyos! Ako ang imong Kristo!”

“Tingali kaniadto,” mitubag ko, “apan karon si Jehova na ang akong Diyos.” Iya kong gihulga nga kuhaon ang among anak ug iya akong kulatahon.

Niadtong tungora, giingnan ako sa mga tawo nga ang pagkamag-aawit sama ra sa ubang karera—nga mahimo ra kong Saksi ug mag-aawit usab. Apan gipahinumdoman ako sa uban, “Walay makapanalipod kanimo batok sa pagpanigarilyo, pag-inom, ug sa mga tanyag sa imong fans sa paghimog imoral nga mga buhat.” Akong naamgohan nga maalamon kining ulahi nga gipamulong.

Sa popular pa ako nga mag-aawit, may mga lalaki nga moduol nako nga lain ug tuyo. Nakadesisyon ako sa pagpalayo niini nga mga tentasyon. Busa sa 1975, gitapos ko ang akong kontrata sa pag-adto sa China aron sa pag-awit, ug paglabay ug unom ka bulan gibawtismohan ako ingong Saksi ni Jehova.

Mga Problema ug mga Kalipay

Unsa may akong ibuhi sa akong kaugalingon ug sa akong pamilya? Halos wala akoy grado ug walay nahibaloan gawas sa pag-awit. Akoy gisaligan sa akong magulang nga babaye nga si Irma ug sa iyang tulo ka anak, ug sa akong duha pod ka anak. Napugos kami sa pagbalhin gikan sa akong mahal ug abang nga apartment ngadto sa apartment nga dunay duha ka gamayng lawak. Naglisod gyod ko kay wala ko maanad ug pinobreng kinabuhi. Nianang panahona gisaway ko sa akong igsoong babaye ug sa mga bata ug gipugos ako sa pagpadayon sa akong pag-awit, apan determinado ako sa akong desisyon sa pag-alagad kang Jehova.

Gihinay-hinayan nakog baligya ang akong mahalong mga gamit, sama sa mga alahas, mga fur coat, awto, ug ang halin niini mao ang among gisaligan. Sa ngadto-ngadto, nahurot ang kuwarta. Aron makaikyas sa paghasi-hasi sa amahan sa akong ikaduhang anak, sa 1981 mibalhin mig puyo sa siyudad sa pikas bahin sa nasod, diin dili na niya kami makit-an.

Dinhi gitudloan ako sa mga Saksi sa paghimog tamales, donat, ug ubang pagkaon nga ikabaligya. Dayon nakakita kog trabaho sa pabrika ug sa gabii ako motrabaho. Apan naapektohan niini ang akong pagtambong sa Kristohanong mga tigom ug ang akong pag-alagad sa Diyos. Busa mihawa ako sa trabaho ug naghimo na lang kog tamales diha sa balay. Akong ibutang kini sa basket ug ilibod. Niining paagiha nasuportahan nako ang akong kaugalingon sa bug-os panahong pag-alagad.

Desisyon nga Wala Gayod Nako Mahayi

Kon pangutan-on ako sa mga tawo kon unsay akong gibati bahin sa pagbiya nako sa akong dakog kita nga karera, ako silang sultihan nga dili nako ikabaylo sa bisan unsa ang akong kahibalo kang Jehova ug sa iyang nindot nga mga katuyoan. Nalipay kaayo ko nga nakakita sa akong mga anak nga miuswag sa ilang kahibalo sa Bibliya, nagpahinungod sa ilang kaugalingon kang Jehova, ug dayon nagminyo ug isigka-magtutuo. Ang akong duha ka anak, sa tabang sa ilang mga asawa, nagmatuto sa ilang mga anak sa pag-alagad sa atong Diyos, si Jehova.

Payunir ako, nga maoy pagtawag sa mga Saksi niadtong nagsangyaw nga bug-os panahon, sa halos 30 na ka tuig. Sa tabang sa Diyos, daghan ang akong natabangan, lakip kang Irma ug sa iyang anak nga babaye, sa pagkat-on sa kamatuoran ug pagpahinungod sa ilang mga kinabuhi ngadto sa Diyos. Makapalipay kaayong makita nga ang akong gitudloan bahin sa Bibliya nagpadayon gihapon sa paglakaw sa kamatuoran—daghan kanila nag-alagad usab ingong payunir. (3 Juan 4) Karon, sa edad nga 64, duna akoy gidumala nga 18 ka pagtuon sa Bibliya.

Ang akong kakulag kahibalo bahin sa Diyos ingong usa ka batan-ong mag-aawit natagan-an, ug ang akong tinguha sa pagtabang sa uban natagbaw pinaagi sa pagsunod sa sugo ni Jesus nga “panglakaw kamo ug paghimog mga tinun-an.” (Mateo 28:19, 20) Mapasalamaton kaayo ako nga si Jehova padayong naglig-on kanako hangtod karon! Ako gayong ‘nasinati nga siya maayo.’—Salmo 34:8.

[Mga footnote]

[Hulagway sa panid 25]

Uban sa akong mga anak nga lalaki, ilang mga asawa, akong magulang babaye, nga kauban nako sa pagpayunir

[Hulagway sa panid 26]

Naghimo gihapon kog tamales nga akong ilibod sa pagsuportar sa akong bug-os panahong pag-alagad