Naghinamhinam Na Ko sa Pagsulti Kanila, “Ania Kaming Tanan!”
Sumala sa giasoy ni Abigail Austin
Nuybe anyos ako niadto. Maayo ang panahon niadtong adlawa sa Abril 1995, ug usa kami ka grupo gikan sa lokal nga kongregasyon sa mga Saksi ni Jehova nga nagsabot nga magpiknik sa kabanikanhan sa Inglaterra. Grupo-grupo kami nga nanakay ug awto. Si Sarah nga akong magulang nga babaye, si Deborah nga suod sa among pamilya, ug ako nagsakayg awto kauban ni Papa ug Mama. Sa kalit lang, dihay awto nga kusog kaayong nagpaingon kanamo ug mibangga namo. Ako ray nabuhi.
PAGLABAYG duha ka semana nakamata ako. Ang akong bagol-bagol nabuak, ug gibutangan kini sa mga doktor ug mga puthaw sa pagpatapot niini. Bisan pa niana, naulian ra ko dayon. Sa ulahi gisultihan ako sa akong mga paryente sa nahitabo, apan wala ako motuo nila. Nagtuo gyod ko nga giduaw ko sa akong mga ginikanan ug sa akong igsoong babaye samtang natulog ko, ug wala lang kami magkita. Ayha ra nako nadawat nga patay na gyod sila sa nakapauli na ko sa balay. Pwerte nakong guola.
Unsay nakatabang kanako sa pagsagubang niining grabe kaayong trahedya?
Ang Espirituwal nga Kabilin sa Akong Ginikanan
Ako ang kinamanghoran sa lima ka anak. Sa panahon sa aksidente, si Sarah 22 anyos, si Shane 20, si Jessica 17, ug si Luke 15. Ang among ginikanan buotan ug mapinanggaon. Ang akong amahang si Steve, nag-alagad ingong ansiyano sa West Yorkshire Congregation sa mga Saksi ni Jehova sa Shipley ug nailhan nga mohatag gyod ug panahon sa pagpamati ug sa pagtabang sa uban. Ang akong inahang si Carol, minahal usab pag-ayo, nga matinagdanon nga samag anak sa mga edaran diha sa kongregasyon. Maghikay siya ug mga salo-salo para sa mga batan-on ug tabangan niya kami sa pagpangitag maayong mga higala. Ang among balay bukas alang sa tanan. Gitudloan usab kami sa among ginikanan nga magmatinahoron ug magmahunahunaon sa among mga silingan.
Kada Miyerkoles sa gabii magtuon kami sa Bibliya ingong pamilya. Usahay among drama-dramahon ang mga estorya sa Bibliya ug magkostiyum sumala sa among papel. Bata pa kami nga gitudloan ni Mama ug Papa sa pagpangandam alang sa among mga tigom sa kongregasyon ug sa pagpresentar sa mensahe sa Bibliya ngadto sa mga tawo diha sa ilang mga balay. Bisag puliki sila kay lima kami nga ilang atimanon, ang among ginikanan naggugol ug panahon kanamo ug nagtabang namo nga malig-on sa espirituwal.
Sa dihang nakatapos pagtungha si Sarah, Shane, ug Jessica, sila nagpayunir, nga bug-os panahong mga ministro, sama sa among amiga nga si Deborah. Suod kaayo kami ni Sarah. Mora siyag akong ikaduhang inahan, ug panahon sa among bakasyon sa eskuylahan, magkuyog kami sa pagtudlo sa uban bahin sa Bibliya. Malipayon kaayo ako niadto. Nakita nako nga malipayon kaayo ang tanang payunir niadtong panahona, ug ganahan kaayo akong makig-uban kanila. Gusto ko nga magpayunir uban kang Sarah inighuman nakog eskuyla.
Sa mga pista opisyal, ang among pamilya ug ang uban sa kongregasyon maglingaw-lingaw. Ang mga batan-on ug tigulang mas masuod ug mahigugmaon sa usag usa. Wala ako magdahom nga kining mga higalaa mao diay makatabang sa paghupay kanako sa umaabot!
Human sa Aksidente
Sa nakagawas ako sa ospital, mipauli ko sa among balay. Si Shane ug Jessica nga nagtrabahog part-taym ug nag-alagad sa bug-os panahon, nangamas gayod sa pagbuhi ug pag-atiman kanamong tanan.
Daghang igsoon sa among kongregasyon mitabang usab. Dako kaayo silag nahimo kanamo! Ila kaming hatdan ug pagkaon, tabangan sa paghinlo sa balay, pagpamalit, ug paglaba hangtod nga nakabarog na kami sa among kaugalingon. Kami mapasalamaton kaayo. Daghang regalo ug mga kard sa pagdasig ang among nadawat gikan sa mga Saksi sa ubang dapit, nga nagpakita sa dulot nga gugma sulod sa organisasyon ni Jehova.
Paglabayg mga usa ka tuig, ang akong mga igsoong lalaki ug babaye midesisyon nga nagkinahanglan kog maayong pamilya nga moatiman nako. Dihay pipila ka buotang mga pamilya sa kongregasyon nga mitanyag sa pagtabang, busa ang akong mga igsoon nagsabot ug namalandong kon unsa kahay himoon ni Papa ug Mama nga mas maayo para nako ug sa akong espirituwalidad. Usa ka pamilya ang napili. Si Billy nga usa ka ansiyano, ug ang iyang asawa nga si Dawn, suod kaayo sa among pamilya, ug sila dunay singko anyos nga anak nga babaye nga si Lois. Ila akong gidawat sa ilang pamilya ug sukad niadto mahigugmaon nila akong giatiman nga samag ilang anak. Bisag nahimo nakong ginikanan ang Papa ug Mama ni Lois, wala gayod siya mangigi, ug karon suod kaayo kami nga morag tinuod nga magsoon.
Kon sa Unsang Paagi Nako Gisagubang ang Trahedya
Sa primero, nakapangutana ako kon nganong kining grabeng trahedya nahitabo sa among pamilya, nga unta ang akong ginikanan, maingon man si Sarah ug Deborah, nahigugma man kang Jehova ug sa ubang mga tawo. Apan nahinumdom ako sa asoy sa Bibliya bahin kang Job, nga nagpabiling matinumanon sa iyang pagtuo bisan pag namatay ang tanan niyang anak. (Job 1:19, 22) Naghunahuna ako, ‘Si Satanas maoy nakaingon sa pag-antos ug kamatayon dinhi niining kalibotana, ug malipay gyod siya kon mohunong kami sa pag-alagad sa Diyos gumikan niini nga aksidente.’ (Genesis 3:1-6; Pinadayag 12:9) Nahinumdom usab ako nga si Jehova mahigugmaong naghatag kanato ug nindot kaayong paglaom sa pagkabanhaw. (Juan 5:28, 29) Among makita pag-usab ang among pamilya ug si Deborah, niining higayona diha na sa paraisong yuta! Busa ang akong gugma kang Jehova mas misamot pa.
Kon makahibalag akog mga tawo nga nakaagom usab ug ingon niini nga mga trahedya, maguol kaayo ko kon dili nila madunggan kining bililhong saad sa Bibliya bahin sa pagkabanhaw. Madasig ako sa pagpaambit sa atong paglaom ngadto kanila, kay segurado ako nga pinaagi lang kang Jehova ug sa iyang organisasyon nga kita makalahutay niining mangitngit nga panahon sama sa ato nang nasinati, kay nahibalo nga aduna pay paglaom sa umaabot.
Tingali ang among kasinatian nakatabang usab sa laing paagi, nga nakadasig sa ubang mga ginikanan sa pagpangutana, ‘Napalig-on ba namo ang pagtuo sa among mga anak nga kon ugaling may mahitabo kanamo, sila makapadayon sa pag-alagad kang Jehova bisag wala na mi?’
Naningkamot ako sa pagkinabuhi nga samag buhi lang gihapon si Mama ug Papa. Ako nahibalo nga buot gyod nila nga magmadasigon ako sa pagtabang sa uban sama kanila. Nagpayunir ako dihang nakatapos ako pag-eskuyla, ug kami ni Lois nag-uban sa pag-alagad ingong payunir. Ang akong mga igsoong lalaki ug akong igsoong babaye minyo na ug malipayong nag-alagad kang Jehova sa ilang tagsa-tagsa ka kongregasyon.
Naghinamhinam gyod ko sa bag-ong kalibotan sa Diyos ug sa pagkabanhaw! Nianang panahona wala nay kasakit ug kamatayon. (Pinadayag 21:3, 4) Nakatabang kanako sa pagpadayon ang pagkahibalo nga kaming tanan magkauban ra unya pag-usab. Naghinamhinam na ko sa paghalog kang Mama, Papa, Sarah, ug Deborah ug sa pagsulti kanila, “Ania kaming tanan!”
[Hulagway sa panid 23]
Si Abigail (ikaduha gikan sa wala) uban sa pamilya nga misagop kaniya