Kon Nganong Napakyas ang Relihiyon

ANG pag-ingon nga ang relihiyon maoy pangunang hinungdan sa tanang panagbangi nagpasabot nga kon walay relihiyon mas menos ang gubat. Husto ba kana? Mawala ba ang gubat kon wagtangon ang relihiyon? Bisan unsa pay imong tubag, usa ka butang ang dili malalis: Ang relihiyon napakyas sa paghiusa sa katawhan. Tagda ang pipila ka katarongan nga nagpamatuod niini.

Nabahinbahin Tungod sa Relihiyon

Ang mga tawo nabahinbahin tungod sa relihiyon, ug ang pipila ka dagkong relihiyon padayong nagdumtanay. Makadahom ba kita nga ang mga Budhista, Hindu, Hudiyo, Kristiyano, ug mga Muslim magkaubang magpuyo nga malinawon?

Dugang pa, makapasubo nga bisan ang matag usa niini nga mga relihiyon nabahinbahin. Pananglitan, sumala sa usa ka banabana, ang Kakristiyanohan nabahin ngadto sa 30,000 ka denominasyon. Ang Islam nabahin usab tungod sa nagkasumpaking mga pagtulon-an. Sumala sa usa ka ahensiya sa balita sa Middle East, ang usa ka Muslim nga eskolar, si Mohsen Hojjat, miadmitir di pa dugay nga “ang pagkabahinbahin sa mga Muslim maoy pangunang hinungdan sa mga problema sa ilang taliwala.” Ang laing dagkong relihiyon, sama sa Budhismo, Hinduismo, ug Judaismo, nabahinbahin usab ngadto sa daghang nagkasumpaking mga sekta.

Nag-apil-apil sa Politika

Ang relihiyon daw nakaimpluwensiya sa halos tanang bahin sa sekular nga kinabuhi. Ang magasing The Economist nag-ingon nga “ang mga tawo wala nay lipodlipod nga mosulti bahin sa ilang tinuohan diha sa lainlaing natad, lakip na diha sa negosyo. Ang relihiyon nakaimpluwensiya usab sa ekonomiya.” Kini nakapabahinbahin sa mga tawo inay nakapahiusa kanila. Apan ang labawng makadaot nga impluwensiya sa relihiyon mao ang dugay nang pag-apil-apil niini sa politika.

Sumala sa usa ka di pa dugayng report nga gihisgotan sa nag-unang artikulo, ang usa ka grupo sa mga tigdukiduki nakaobserbar nga ang “relihiyon sagad nga mahimong hinungdan sa gubat sa dihang kini malambigit sa politika.” Gipakita niana ang laing dili malalis nga kamatuoran: Ang relihiyon nalangkit pag-ayo sa politika ug militar sukad kaniadto hangtod karon.

Makapabahinbahin nga Panagsagol

Sa daghang kayutaan, ang dagkong relihiyon maoy simbolo sa pagkamakinasodnon ug pagtuboy sa rasa. Ingong resulta, ang pagdumot tungod sa nasyonalismo, pagpihig sa rasa, ug panagbangi sa tribo ug relihiyon nagsagol. Kini nga panagsagol nakapabahinbahin sa kalibotan.

Ang makapatingala niini mao nga kadaghanan sa mga relihiyon nag-angkon nga naghawas sa Diyos sa Bibliya, ang Maglalalang. Posible ba nga paluyohan sa labing gamhanan, maalamon-sa-tanan, ug mahigugmaong Maglalalang ang mga relihiyon nga nakapabahinbahin sa katawhan ug sad-an sa dugo?

[Hulagway sa panid 6]

Libolibong Saksi ni Jehova ang nangapriso tungod sa ilang neyutral nga baroganan