Makataronganon ba ang Imong mga Tumong?
● Unsay imong pangandoy sa kinabuhi? Makataronganon ba ang imong mga panahom, o naghanduraw ka sa mga butang nga dili nimo maabot? Ang usa ka maayong tigpaniid sa kinaiyahan sa tawo naghatag niining maalamong tambag: “Labi pang maayo nga matagbaw sa makita sa imong mga mata kay sa magpadaog sa pangibog; kini usab kakawangan ug paggukod sa hangin.”—Ecclesiastes 6:9, The New English Bible.
Ang “makita sa [atong] mga mata” nagtumong sa atong presenteng kahimtang. Siyempre, dili daotan ang pagpaningkamot nga moarang-arang ang atong kinabuhi. Ang buot ipasabot sa Bibliya mao nga ang mga maalamon dili angayng mangagpas ug dili-makataronganong mga tumong. Kini tingali maoy pagtinguhag kabantog, bahandi, hingpit nga kapikas, o hingpit nga panglawas.
Dugang pa, kadtong nakakab-ot ug usa ka tumong, sama sa materyal nga bahandi, mahimong mangandoy ug labaw pa. “Ang mahigugmaon lamang sa salapi dili matagbaw sa salapi, ni sa kinitaan si bisan kinsa nga mahigugmaon sa bahandi. Kini usab kakawangan,” nag-ingon ang Bibliya. (Ecclesiastes 5:10) Busa, ang mga tawong maalamon sa espirituwal kontento sa ilang nabatonan, kon unsay “makita sa [ilang] mga mata.” Oo, ilang gidawat kini nga kamatuoran: “Kita walay gidalang bisan unsa nganhi sa kalibotan, ug kita walay madala nga bisan unsa sa atong paggawas niini.”—1 Timoteo 6:7.
Ang kinaiyahan sa tawo mao nga makabaton lamang siya ug kinalabwang kalipay kon tagbawon niya ang iyang espirituwal nga panginahanglan. (Mateo 5:3) Sa unsang paagi mahimo nato kana? Si Jesu-Kristo miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mateo 4:4) Ang maong bililhong mga pulong makaplagan sa Bibliya, ug kini libreng mabatonan.
Ang usa sa maong mga pulong anaa sa Salmo 37:4. Kini nag-ingon: “Magbaton ka usab ug tumang kalipay diha kang Jehova, ug ihatag niya kanimo ang mga hangyo sa imong kasingkasing.” Ingong Diyos nga Labing Gamhanan, ihatag ni Jehova sa iyang matinumanong mga magsisimba ang mga butang nga dili ikahatag sa tawo: hingpit nga panglawas, materyal nga kasegurohan, ug walay-kataposang kinabuhi sa Paraisong yuta. (Lucas 23:43; Pinadayag 21:3, 4) Makataronganon ang pagsalig niining mga pulonga.