Pagpalig-on sa Atong Kaugalingon Pinaagi sa Katumanan sa mga Pahayag ni Jehova

“Ang tawo mabuhi, dili lamang sa tinapay, kondili sa matag pahayag nga nagagula sa baba ni Jehova.”—MATEO 4:4.

1. Sa unsang paagi Dakong Magtatagana sa Kalan-on si Jehova, apan unsay gipamulong ni Jesus bahin sa mga panginahanglan sa tawo?

SI Jehova mao ang Dakong Magtatagana sa Kalan-on. Iyang gipaila ang iyang kaugalingon nga ingon siya niini ngadto sa tawo sa unang kapitulo sa Bibliya. (Genesis 1:29, 30) Sa mas ulahi pa, ang salmistang si David mapasalamatong miingon kang Jehova: “Ang mga mata sa tanan malaomong nagahulat kanimo, ug ginahatagan mo sila sa ilang kalan-on sa matag panahon. Imong ginabuklad ang imong kamot ug ginatagbaw mo ang tinguha sa tagasatagsa ka buhing butang.” (Salmo 145:15, 16) Oo, nagtagana si Jehova ug dagayang kalan-on sa tawo ug mananap. Apan dunay kalainan kini. Samtang ang mananap nagkinahanglan lang ug pisikal nga kalan-on, si Jesus nagpakita nga ang tawo nagkinahanglan ug labaw pa kay sa pisikal nga tinapay, o kalan-on. Siya ‘kinahanglang mabuhi sa matag pahayag nga nagagula sa baba ni Jehova.’—Mateo 4:4.

2. Unsang butanga nga kinahanglan natong mahibaloan bahin sa kahulogan sa mga pulong ni Jesus sa Mateo 4:4?

² Gipahayag ni Jesus kining mga pulonga sa pagtubag kang Satanas, kinsa misulay sa pagtintal Kaniya sa paghimo pinaagi sa milagro sa mga bato nga tinapay. Wala ipugos sa Yawa ang punto apan midali pagbali sa laing tintasyon. Sumala sa iyang sayop nga pagpadapat sa Salmo 91: 11, 12, tingali wala gihapon makasabot si Satanas kon unsay gipasabot ni Jesus sa Iyang tubag sa unang tintasyon. (Mateo 4:3-7) Apan kita nga mga alagad ni Jehova interesado kaayo sa kon unsay gipamulong ni Jesus. Kita nga malipay sa dugang pang pagtuki sa Bibliya aron mabatonan ang dakong espirituwal nga kaayohan makapangutana: Ang buot bang ipasabot ni Jesus nga aron makabaton ug tugob nga kinabuhi, kinahanglang magtuon ug memoryahon sa usa ang “matag pahayag nga nagagula sa baba ni Jehova”? O unsay iyang gipasabot?

Mga Pahayag ni Jehova

3, 4. Unsa ang duha ka kahulogan sa Grego ug Hebreohanong mga pulong alang sa “pahayag”? Iilustrar.

³ Sa pagtubag kang Satanas, gikutlo ni Jesus ang Deuteronomio 8:3 sumala sa Greek Septuagint nga bersiyon niining tekstoha sa Hebreohanon. Ang Gregong pulong nga gihubad “pahayag” (rheʹma) adunay duha ka kahulogan. Usahay hubaron kining “pulong,” “ekspresyon,” o “pahayag.” Apan, ang Hebreohanong katumbas niini nga (da·varʹ), mahimong magkahulogan ug “butang.”

⁴ Sa Lucas 1:37 atong mabasa: “Kay sa Diyos walay deklarasyon [rheʹma] nga dili mahimo.” Ang Lucas 2:15 mabasa: “Ang mga magbalantay sa karnero misulti sa usag usa: ‘Tana mangadto kita sa Bethlehem ug tan-awon nato kining butang [rheʹma] nga nahitabo, nga gipahibalo kanato ni Jehova.’” Busa, ilabina kon gamiton may kalabotan kang Jehova, kining Gregong pulong mahimong magkahulogang “pulong,” “deklarasyon,” o “pahayag” sa Diyos. O mahimong magkahulogan ug “butang,” nga nagpunting ug “hitabo,” o “lihok” nga ginabatbat, ang resulta sa gipamulong, busa ang pulong natuman.

5. Unsay kahulogan sa Lucas 1:37?

⁵ Busa masabot, nga ang Lucas 1:37 wala magkahulogan nga makasulti ang Diyos ug bisan unsa. Mahimong tinuod kana sa tawo, bisag walay kalagmitang mahitabo o walay kahulogan ang iyang pulong. Apan mahitungod sa mga pulong sa Diyos, ang kahulogan sa Lucas 1:37 mao nga walay pulong o deklarasyon si Jehova nga dili matuman. Ang deklarasyon nga gihimo sa manulonda kang Maria midangat sa iyang katumanan. Ang ideya sa likod sa Hebreohanon ug Gregong mga pulong nga gigamit sa “pulong,” “pahayag,” “ekspresyon,” o “deklarasyon” matahom kaayong pagkasulti diha sa basahon ni Isaias. “Kay maingon nga ang ulan ug niyebe mangahulog gikan sa langit, ug dili na mobalik didto, kondili nagapatubig hinoon sa yuta aron magahimo niini nga manalingsing ug mamutot, ug kahatagag binhi ang mga magpupugas ug tinapay ang kumakaon, sa ingon niini ang akong pulong [Hebreohanon, da·varʹ; Grego, rheʹma] nga magagula sa akong baba mamatuman gayod. Dili kini mobalik kanako nga walay kapuslanan, kondili nga kini magatuman sa akong gikahimut-an, ug kini molampos gayod nga tungod niana kini akong gipadala.”—Isaias 55:10, 11.

“Dili Lamang sa Tinapay”

6, 7. Unsay makasaysayanhon ug geograpikal nga konteksto sa Deuteronomio 8:2, 3?

⁶ Karon, kon balikon ang punto, unsay gipasabot ni Jesus sa mikutlo sa Deuteronomio 8:3, sa iyang pag-ingon nga ang “tawo mabuhi, dili lamang sa tinapay, kondili sa matag pahayag nga nagagula sa baba ni Jehova”? (Mateo 4:4) Nag-ingon ba siya nga ang diyosnong tawo mapalig-on sa mga pahayag, mga pulong, o mga deklarasyon lamang? Igo na ba ang kahibalo sa balaang mga ekspresyon? Atong susihon ang makasaysayanhong konteksto sa mga pulong ni Jesus nga gikutlo gikan sa Deuteronomio.

⁷ Ang giya sa pagtuon sa Biliya nga “All Scripture Is Inspired of God and Benefecial” nagpahibalo kanato, sa panid 36: “Ang basahon sa Deuteronomio naundan ug gamhanong mensahe alang sa katawhan ni Jehova. Human naglibodlibod sa kamingawan sulod sa kap-atan ka tuig, ang mga anak sa Israel karon nagbarog sa ganghaan sa Yutang Saad.” Tuig kadto sa 1473 W.K.P. Ang dapit? Ang kapatagan sa Moab. Diha sa iyang ikaduhang pakigpulong sa nagtigom nga mga Israelitas, si Moises miingon: “Kinahanglang imong hinumdoman ang dalan nga gipasubay kaninyo ni Jehova nga inyong Diyos niining kap-atan ka tuig sa kamingawan, aron magpaubos kamo, sa pagsulay kaninyo aron mahibaloan kon unsay anaa sa inyong kasingkasing, kon kamo nagtinguha ba sa pagtuman sa iyang sugo o dili. Busa kamo napaubos niya ug gipaantos sa kagutom ug gipakaon kamo sa mana, nga wala ninyo matilawi ni sa inyong mga katigulangan sukad masukad; aron sa pagpahibalo kaninyo nga dili lamang sa tinapay mabuhi ang tawo kondili sa matag ekspresyon sa baba ni Jehova nga mabuhi ang tawo.”—Deuteronomio 8:2, 3.

8. Unsay kahimtang sa mga Israelitas, ug nganong gitugotan kini ni Jehova?

⁸ Hunahunaa lang kana! milyonmilyong mga Israelitas—tigulang ug batan-on, mga lalaki, mga babaye, ug mga bata—nanaglakat sulod sa 40 ka hataas kaayong katuigan diha sa “halapad ug makalilisang nga kamingawan, nga may malalang mga bitin ug mga tanga ug ugang yuta nga walay tubig.” (Deuteronomio 8:15) Nagkinahanglan sila ug tubig nga mainom ug kalan-on nga makaon. May mga panahon, nga pasagdan sila ni Jehova nga uhawon ug magutman. Ngano? Aron sa pagpasilsil diha sa ilang hunahuna nga “dili lamang sa tinapay mabuhi ang tawo kondili sa matag ekspresyon sa baba ni Jehova.”

9. Sa unsang paagi ang mga panginahanglan sa Israelitas natagan-an pinaagi sa mga pahayag ni Jehova?

⁹ Unsay kalabotan sa mga panginahanglan sa mga Israelitas ug mga pulong, o mga pahayag, nga nagagula sa baba ni Jehova? Buweno, unsang pisikal nga mga butang ang nahitabo taliwala sa mga Israelitas ingong resulta sa mga pahayag ni Jehova? Si Moises misulat: “Ang inyong besti wala gayod madunot sa ibabaw ninyo, ni nanghubag ang inyong tiil sulod sa kap-atan ka tuig. . . . Si [Jehova] nagpagula ug tubig gikan sa bato; [ug siya] nagpakaon kaninyo sa mana didto sa kamingawan.” (Deuteronomio 8:4, 15, 16) Ang kalabotan niini mao kini: Dili unta madawat sa mga Israelitas kining mga butanga kon wala pa magsugo si Jehova nga mahitabo kini. Busa, ang mga Israelitas sa literal nabuhi “sa matag ekspresyon [o, sugo] sa baba ni Jehova.”

Gipalig-on sa mga Pahayag ni Jehova

10, 11. Sa unsang ubang paagi napalig-on ang mga Israelitas sa mga pahayag ni Jehova?

¹⁰ Gawas sa pagdepende kang Jehova nianang materyal nga mga kaayohan sama sa kalan-on, tubig, ug besti, unsa pay laing paagi nga napalig-on ang mga Israelitas sa mga pahayag ni Jehova? Dihay espirituwal nga mga kaayohan usab. Gisultihan ni Moises ang mga Israelitas nga gitugotan sila ni Jehova nga makaeksperyensiya niining mga butanga diha sa disyerto ‘aron magpaubos sila, sa pagsulay kanila aron masayran kon tumanon ba gayod nila o dili ang iyang mga sugo.’ Siya midugang: “Kamo nasayod sa inyong kasingkasing nga sama sa tawo nga nagapanton sa iyang anak, sa ingon si Jehova nga inyong Diyos nagapanton kaninyo . . . sa inyong ikaayo sa kaulahian.”—Deuteronomio 8:2, 5, 16.

¹¹ Oo, kon bug-os pang gipahimuslan sa mga Israelitas ang ilang mga kasinatian sa kamingawan, makakat-on unta sila sa ‘pagkinabuhi sa matag ekspresyon sa baba ni Jehova,’ dili lamang sa pagkakat-on sa pagtuman sa iyang sinulat nga mga sugo kondili sa aktuwal nga pag-eksperyensiya sa mga resulta sa mga pahayag ni Jehova sa ilang kinabuhi ingong usa ka nasod ug sa ilang indibiduwal nga mga kinabuhi. Gihatagan sila ug igong higayon sa “pagtilaw ug sa pagtan-aw nga maayo si Jehova.” (Salmo 34:8) Kining makapalagsik nga mga kasinatian bahin sa mga pahayag ni Jehova—nga gipamulong ug nangatuman—angay untang makapalig-on kanila.

12, 13. Sa unsang paagi gipasinati ni Josue ang iyang kaugalingon sa mga pahayag ni Jehova, ug unsay iyang gipamatud-an?

¹² Si Josue, nga maoy misunod kang Moises ingong pangulo sa Israel, nagtudo sa iyang kaugalingon bahin sa mga pahayag ni Jehova pinaagi sa pagpuno sa iyang hunahuna niini. Napalig-on ang iyang pagtuo pinaagi sa pagtan-aw sa ilang katumanan. Human sa kamatayon ni Moises, mipahayag si Jehova kang Josue: “Ayaw pag-ibulag kining basahon sa kasugoan sa imong baba, ug sa mahinay basahon mo kini sa adlaw ug sa gabii, aron magmatngon ka sa pagbuhat sumala sa tanan nga nahisulat niini; kay sa ingon ikaw magmauswagon sa imong panaw ug makalihok nga maalamon.”—Josue 1:8.

¹³ Sa dihang hapit nang matapos ang iyang kinabuhi, human nga matinumanong nakatuman sa pulong ni Jehova ug nakakita sa katumanan niini diha sa katawhan ni Jehova, si Josue nakapamatuod: “Busa gihatag ni Jehova ngadto sa Israel ang tanang yuta nga iyang gipanumpa nga ihatag ngadto sa ilang mga katigulangan, ug ilang gipanag-iya kini ug namuyo didto. Dugang pa, gihatagan sila ni Jehova ug kalinaw sa ilang tanang palibot, sumala gayod sa iyang gipanumpa ngadto sa ilang mga katigulangan, ug walay bisan usa sa ilang mga kaaway nga mitindog sa ilang atubangan. Ang tanan nilang mga kaaway gitugyan ni Jehova sa ilang mga kamot. Walay saad [Hebreohanon, da·varʹ; Grego, rheʹma] nga napakyas sa maayong mga saad nga gihatag ni Jehova sa balay sa Israel; ang tanan nangatuman.” (Josue 21:43-45) Si Josue tinuod nga nabuhi ug napalig-on, dili sa literal nga tinapay lamang, “kondili sa matag pahayag nga nagagula sa baba ni Jehova.”—Mateo 4:4.

Pagkinabuhi Karon Pinaagi sa mga Pahayag ni Jehova

14. (a) Pinaagi sa dugang pang pagtuki sa Mateo 4:4, sa unsang paagi masabtan pa natog dugang ang buot ipasabot ni Jesus? (b) Unsay nakapalig-on sa mapabilhong mga Israelitas?

¹⁴ Human nga nakatapos sa dugang pang pagtuki sa ibabaw nga mga pulong nga gikutlo ni Jesus sa pagtubag sa tintasyon sa Yawa, mas nasabtan nato karon kon unsay buot ipasabot ni Jesus. Kining makasaysayanhon ug geograpikong konteksto sa asoy ni Moises, nga gikutlo ni Jesus, nagpakita nga ang mga pahayag ni Jehova nga niini magkinabuhi ang diyosnong mga lalaki ug mga babaye dili ingong mga pulong lamang nga nakat-onan pinaagi sa memoriya. Alang niadtong mga Israelitas, nalangkit ang “matag pahayag ni Jehova” sa mana, tubig, ug besti nga wala madunot. Oo, ang mga pahayag naglakip sa ilang katumanan, sa katingalahang mga butang nga gihimo ni Jehova alang sa iyang katawhan. Ang ilang pag-eksperyensiya niining mga butanga, sa katumanan sa mga pahayag ni Jehova, nakapadasig sa mapabilhong mga Israelitas.

15. Sa unsang paagi napahimsog kita sa mga pahayag ni Jehova?

¹⁵ Maingon man usab karon, aron mapalig-on ang katawhan ni Jehova, dili lamang ang pagbasa ug pagtuon sa mga pahayag ni Jehova ang gikinahanglan. Kondili ang pag-eksperyensiya usab, sa kinatibuk-an ug sa tinagsatagsa, sa katingalahang paagi sa pag-atiman ni Jehova kanato ug sa paglihok alang kanato. Kon matinagdanon kaayo kita sa pagpakiglabot ni Jehova kanato, mas labi pang mapalig-on kita niining nangatuman nga mga pahayag, mapabaskog ang atong pagtuo, ang atong espirituwalidad.

16. (a) Unsay gihatagan ug pagtagad sa salmista? (b) Unsa usab ang kinahanglan natong buhaton, ug sa unsang paagi makatabang kini kanato?

¹⁶ Ang salmista misulat: “Hinumdoman ko ang mga buhat ni Jah; kay handomon ko ang mga gihimo mong katingalahan sa nangaging panahon. Ug palandongon ko ang tanan nimong kalihokan, ug maoy akong tagdon ang imong pagpakiglabot.” (Salmo 77:11, 12) Kon maoy atong tagdon ang mga buhat, mga gihimo, mga kalihokan, ug ang pagpakiglabot ni Jehova alang sa iyang katawhan, sa masayod nga sila maoy pisikal nga ekspresyon sa iyang mga pahayag, kining balaang mga tagana mahimong espirituwal nga tinapay alang kanato. Mas makapasuod kini kanato sa personal nga relasyon kang Jehova. Mahisama kita kang Jesus. Midumili siya sa paghimo sa mga bato nga tinapay sa pagsugyot sa Yawa. Maingon man mainampingon kita sa dili pagtugot sa materyal nga mga butang o sa pagbutang ug sobrang pagtagad sa materyal nga mga panginahanglan nga makapahulog kanato sa lit-ag sa Yawa ug sa pagbiya sa pagsimba kang Jehova.

17. Sa unsang paagi maayong panig-ingnan si Jesus?

¹⁷ Si Jesus miingon: “Ang akong kalan-on mao ang pagtuman sa kabubut-on sa nagpadala kanako ug sa pagtapos sa iyang buluhaton.” (Juan 4:34) Usa siya ka katingalahang panig-ingnan, nagpakita kanato sa praktikal nga paagi nga ang “tawo mabuhi, dili sa tinapay lamang, kondili sa matag pahayag nga nagagula sa baba ni Jehova.” —Mateo 4:4.

Naghulat sa Dugang nga mga Instruksiyon

18. Unsang balaang pahayag ang natuman karon?

¹⁸ Si Jehova, pinaagi sa iyang Anak, miingon nga “kining maayong balita sa gingharian igawali sa tanang pinuy-anang yuta” sa dili pa moabot ang kataposan. (Mateo 24:14) Kanang balaang pahayag nagakatuman na ingong resulta sa tibuok-yutang buluhatong pagsangyaw sa mga Saksi ni Jehova. Ikaw ba ‘nagkinabuhi’ niana nga pahayag nga gikan sa baba ni Jehova pinaagi sa bug-os nga pakigbahin sa buluhatong pagsangyaw ug busa makadawat sa espirituwal nga pagpalig-on tungod kay imong gituman ang iyang kabubut-on?

19, 20. Unsang ubang balaang mga pahayag nga sa dili madugay mopatunghag kulbahinam nga mga hitabo?

¹⁹ Ang ubang mga pahayag ni Jehova hapit nang mopatunghag kulbahinam nga mga hitabo sa haduol nga umaabot. “Ang napulo ka sungay” ug “ang mapintas nga mananap” mobali batok sa “babayeng bigaon,” ang Babilonyang Bantogan. Oo, ang kalaglagan nianang kalibotanong empiryo sa bakak nga relihiyon pinaagi sa batok-relihiyosong mga elemento sulod sa Tinipong Kanasoran mahimong tagsaong lihok nga maoy resulta sa katumanan sa usa sa mga pahayag ni Jehova.—Pinadayag 17:16, 17.

²⁰ Laing tagsaong balaang pahayag matuman sa dihang sab-itan ni Jehova sa malarawanon ug “taga” ang apapangig sa Gog, o Satanas, nga nagahagit kaniya ug sa iyang “kasundalohan” sa pag-atake sa Iyang katawhan sa yuta. (Ezekiel 38:2-4, 8-12) Apan laing balaang pahayag molaglag sa mga panon ni Gog. (Ezekiel 39:1-6)a Magkahulogan kini sa “gubat sa dakong adlaw sa Diyos nga Makagagahom” sa Har–Magedon. (Pinadayag 16:14, 16; 19:11-21) Pagkakulbahinam unya kana alang sa matinumanong katawhan ni Jehova sa pagtan-aw sa katumanan niining balaang mga pahayag ug, sa tunga sa gubat, mabatian sa mahulagwayon kining dugang pahayag: “Bumarog kamo ug tan-awa ang kaluwasan ni Jehova kaninyo.”—2 Cronicas 20:17.

21. Unsang mga hitabo ang motungha sa katumanan sa mga pahayag ni Jehova.

²¹ Dayon, tumanon ang usa pa ka balaang pahayag, gaposon ni Kristo si Satanas ug ang iyang mga demonyo ug itambog sila sa bung-aw sulod sa “usa ka libo ka tuig.” (Pinadayag 20:1-3) Kanang usa ka libo ka tuig magatugot sa pagtuman sa ubang mga pahayag ni Jehova, lakip sa pagbanhaw sa mga patay ug sa “pag-ayo sa tanang kanasoran,” sa masinundanong katawhan. (Pinadayag 20:11-15; 22:1, 2) Sa panahon ning usa ka libo ka tuig nga yugto sa paghukom, matin-aw nga mohatag si Jehova ug dugang mga instruksiyon, nga wala pa nato mahibaloi karon, sa dihang buksan ang bag-ong “mga basahon.” (Pinadayag 20:12) Pagkakatingalahan alang sa mga makalabang buhi sa “dakong kasakitan” ug sa binanhawng mga patay ang pagdawat sa instruksiyon ug pagtultol alang niining dugang nga mga instruksiyon nga makita niining wala mabuksi nga “mga basahon” ni Jehova ug sa pagtuman kanila nga malipayon!

22. Unsay gidasig kanato nga buhaton karon?

²² Uban niining katingalahang palaabuton atubangan kanato, maayong atong pahimuslan sa bug-os ang higayon nga atong nabatonan karon aron sa pagsinati sa mga pahayag ni Jehova ug sa paghimog matukiong personal nga pagtuon sa iyang Pulong ug sa pakigbahin sa buluhatong pagsangyaw uban sa dugang nga pagkabalaka sa mga lihok ni Jehova alang kanato.

[Mga footnote]

Makahinumdom Ka Ba?

◻ Sa unsang paagi nakakat-on ang mga Israelitas sa pagkinabuhi “sa matag ekspresyon sa baba ni Jehova”?

◻ Sa unsang paagi ang mga Israelitas nagakaon sa espirituwal sa mga pahayag ni Jehova?

◻ Sa unsang paagi magakinabuhi kita sa mga pahayag ni Jehova?

◻ Unsang mga pahayag ni Jehova ang pagatumanon pa?

[Hulagway sa panid 14]

Unsay kahulogan alang kanimo sa tubag ni Jesus sa tintasyon ni Satanas?

[Hulagway sa panid 16]

Ang mga Israelitas nga nagkinabuhi “sa matag ekspresyon sa baba ni Jehova” may direktang mga kaayohan sa lawas