Gidisenyo ba Kini?
Ang Papilit sa Sandcastle Worm
● Ang mga siruhano magsumpay sa nabali nga bukog gamit ang mga tusok nga puthaw, nipis nga palid sa metal, ug tornilyo, apan ang maong mga himan lisod kaayong gamiton diha sa gagmayng tipik sa bukog. Kaniadto, ang mga tigdukiduki wala makahimog papilit nga mobagtok diha sa basa nga palibot sulod sa lawas sa tawo. Nakakaplag silag posibleng solusyon pinaagi sa pag-estudio sa sandcastle worm!
Hunahunaa: Ang sandcastle worm maggama sa morag tubo nga puy-anan niini ilawom sa dagat gamit ang mga partikulo sa balas ug kinhason. Ang mga partikulo sumpaysumpayon gamit ang papilit nga gigama diha sa usa ka glandula sa dughan sa ulod. Kini nga papilit mas maayo kay nianang ginama sa tawo karon. Kini adunay talagsaong hugpong sa mga protina nga kon sagolon mopabagtok dayon sa papilit ilalom sa tubig. Ang sandcastle worm gitawag ug batid nga mason, ug tinuod gayod kana. Si Russell Stewart, sa University of Utah, miingon nga nasulbad niining gamitoyng mananap ang “komplikadong mga problema maylabot sa pagpapilit.”
Ang mga tigdukiduki nakahimog papilit nga susama nianang sa sandcastle worm, nga mas lig-on pa. Ang papilit nga gamiton unya diha sa mga operating room kinahanglang biodegradable usab aron nga kon gamiton kini sa pagsumpay sa nabali nga bukog, ang papilit mahilis samtang moalim ang bukog. Kon kini nga papilit mapamatud-an nga magamit diha sa tawo, kini mahimong dakong kalamposan sa natad sa medisina.
Unsay imong hunahuna? Ang talagsaong papilit sa sandcastle worm sulagma bang mitungha? O kini ba gidisenyo?
[Hulagway sa panid 26]
Ang mga tigdukiduki naglaom nga ilang masumpay ang nabali nga bukog nga dili na mogamit ug metal
[Picture Credit Line sa panid 26]
Sandcastle worm: © Peter J. Bryant, University of California, Irvine