Mawala ba ang Terorismo?
“KINAHANGLAN kitang maningkamot . . . aron mausab ang kasingkasing ug hunahuna.” Mao kanay nakab-ot nga konklusyon human sa 20 ka tuig nga panukiduki bahin sa personalidad sa gikaingong mga terorista.
Apan unsay makapausab sa kasingkasing ug hunahuna sa mga tawo nga nalangkit pag-ayo sa mapintas ug mapanimaslong mga buhat?
Basahon nga Makausab sa Kasingkasing
Sa katuigan sa 1990, si Hafeni misugod pagsusi sa iyang pagtuo sa Diyos ug midesisyon sa pagbatog Bibliya. Siya miingon: “Akong giuna pagbasa ang mga Ebanghelyo [Mateo, Marcos, Lucas, ug Juan], nga naundan sa sugilanon sa kinabuhi ni Jesus. Samtang nagbasa, nadani dayon ko sa personalidad ni Jesus ug sa iyang maluloton ug dili-mapihigong pagpakiglabot sa mga tawo. Nakatandog kini sa akong kasingkasing.”
Si Hafeni miingon nga sa pagpadayon niyag basa, “usa ka teksto ang nakapaamgo [niya] bahin sa panglantaw sa Diyos—ang Buhat 10:34, 35.” Kini nag-ingon: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.”
“Nakaingon ko,” matod ni Hafeni, “nga ang mga tawo mismo ang responsable sa pagpihig tungod sa tribo, nasod, ug rasa. Akong naamgohan nga ang mensahe sa Bibliya makausab sa hunahuna, ug ang labing hinungdanon sa kinabuhi mao ang pagbatog maayong baroganan atubangan sa Diyos. Mas hinungdanon kini kay sa pagpakig-away dapig sa usa ka tribo, rasa, o kolor.”
Si Joseba, nga gihisgotan sa miaging artikulo, maoy lider sa gamayng grupo sa mga komando nga nagplano sa pagbomba sa usa ka estasyon sa polis. “Apan sa wala pa namo kini mahimo,” miingon si Joseba, “ako nadakpan ug giprisog duha ka tuig.” Sa ulahi, ang iyang asawa nga si Luci nagtuon sa Bibliya uban sa mga Saksi ni Jehova. Sa ngadtongadto, si Joseba miduyog sa pagtuon.
“Samtang nagkadaghan ang akong nahibaloan bahin kang Jesus,” si Joseba nahinumdom, “siya nahimong akong sulondan. Usa sa iyang gipamulong ang nakatandog gayod kanako: ‘Ang tanang mogamit sa espada mamatay pinaagi sa espada.’ Nasayod ko nga tinuod ni.” (Mateo 26:52) Siya mipadayon: “Ang pagpatay makaaghat sa pamilya sa napatay nga magdumot ug manimalos. Ang ipatungha sa kapintasan mao lamang ang kasakit, dili ang mas maayong kalibotan.” Si Joseba mihimog kausaban sa iyang panghunahuna.
Nasinati mismo ni Hafeni ug Joseba nga ang pagtulon-an sa Bibliya makapausab sa tawo. Ang Bibliya nag-ingon nga “ang pulong sa Diyos buhi ug gamhanan” ug makatugkad sa “mga tuyo sa kasingkasing.” (Hebreohanon 4:12) Ang gahom sa Pulong sa Diyos nakatabang sa daghan sa pag-usab sa ilang hunahuna ug panggawi. Apan, duna bay ebidensiya nga naglungtad ang tibuok-yutang panaghiusa taliwala niadtong tinuod nga nagsunod sa pagtulon-an sa Bibliya?
Panag-igsoonay nga Gipasukad sa Gugma
Sa dihang si Hafeni misugod pagtambong sa tigom sa mga Saksi ni Jehova, siya natandog kaayo sa panaghiusa sa mga tawo nga lainlaig rasa. “Nalipay kaayo ko nga makatapad ug lingkod ang mga puti,” siya miingon. “Wa gyod nako damha nga moabot ang panahon nga matawag nakog igsoon ang usa ka puti. Mas nakapakombinsir kini kanako nga nahuptan sa mga Saksi ang matuod nga relihiyon, kay duna silay panaghiusa nga dugay na nakong gipangandoy ug ilang nabatonan ang gugma sa usag usa bisan pag lainlain silag rasa.”
Si Jesus miingon nga ang iyang matuod nga mga sumusunod mailhan pinaagi sa ilang ‘gugma sa usag usa.’ (Juan 13:34, 35) Siya wala usab makigbahin sa politikal nga mga panagbangi ug miingon sa iyang mga tinun-an: ‘Kamo dili bahin sa kalibotan.’ (Juan 6:15; 15:19; Mateo 22:15-22) Ang gugma ug pagkaneyutral maoy timailhan sa matuod nga Kristiyanidad kaniadto ug karon.
Pagpadapat sa Gitudlo ni Jesus
Apan sa unsang paagi motunhay ang gugma diha sa kalibotan nga nabahin tungod sa terorismo? Sa dihang motungha ang panagbangi tungod sa politikal nga mga isyu, ang mga tawo—o mga nasod—mag-awayay aron sa pagdapig sa ilang rasa, nasod, o tribo.
Pananglitan, niadtong 1914, ang garbo sa rasa maoy nagtukmod kang Gavrilo Princip sa pagpatay kang Archduke Francis Ferdinand, nga manununod sa trono sa Austria-Hungary. Si Princip membro sa usa ka organisasyon nga gitawag ug Black Hand, nga sumala sa konstitusyon niini, mas gustog “rebolusyonaryong pakigbisog imbes . . . kultural nga kalihokan” sa pagkab-ot sa mga tumong niini. Tungod sa maong pagpatay, miulbo ang gubat tali sa gitawag ug Kristohanong mga nasod, nga mitultol sa Gubat sa Kalibotan I ug sa kamatayon sa milyonmilyong sundalo nga nag-angkong sumusunod ni Jesus, ang “Prinsipe sa Pakigdait.”—Isaias 9:6.
Human sa gubat, ang usa ka inilang klerigo, si Harry Emerson Fosdick, nagsaway sa mga lider nga nag-angkong Kristohanon kay wala nila tudloi ang ilang membro sa pagsunod sa ehemplo ni Jesus. “Kita nagpasanay ug mga lalaki alang sa gubat,” siya misulat. “Atong gipakabayani ang atong mga sundalo ug bisan diha sa atong mga simbahan nagbutang kitag mga bandera sa gubat.” Si Fosdick mihinapos: “Sa usa ka ngilit sa atong baba gidayeg nato ang Prinsipe sa Pakigdait ug sa pikas gihimaya nato ang gubat.”
Sa kasukwahi, ang usa ka sosyolohikal nga pagtuon nga gipatik niadtong 1975 nag-ingon: “Ang mga Saksi ni Jehova padayong naghupot sa ilang baroganan sa dili-mapintason nga ‘Kristohanong neyutralidad’ latas sa duha ka dagkong gubat sa kalibotan ug sa misunod nga militaryong mga panagtigi panahon sa ‘Bugnawng Gubat.’ Bisag ang mga Saksi gidagmalan ug gibilanggo, sila “wala gayod mobalos sa paghimog kapintasan.” Ang pagtuon mihinapos: “Ang pagtulon-an sa mga Saksi ni Jehova nagsumikad sa ilang hugot nga pagtuo nga ang Bibliya inspiradong pulong sa Diyos.”
Kaayohan sa Pagsunod sa Bibliya
Sa dihang ang kanhing primer ministro sa Belgium gihatagan sa iyang silingan ug libro bahin sa kinabuhi ni Jesus nga nag-ulohang Ang Labing Bantogang Tawo nga Nabuhi Sukad, siya natandog kaayo sa iyang nabasa. Siya misulat sa iyang silingan: “Dayag nga kon ang mga tawo mahimong mas interesado sa mensahe sa Ebanghelyo ug mosunod sa mga prinsipyo ni Jesu-Kristo, ang kalibotan lahi unta kaayo.”
“Dili kita magkinahanglag Security Council,” siya midugang, “ug walay terorismo, [ug] dili itugot ang kapintasan.” Bisan pa niana, siya mihinapos: “Kining tanan damgo lamang.” Apan tinuod ba kana? Bisan karon, taliwala sa kalibotan nga tugob sa kapintasan, ang Bibliya nakatabang sa daghang indibiduwal nga lainlaig kagikan sa paglikay sa kapintasan ug sa pagbuntog sa kayugot nga ilang gibati tungod sa grabeng pag-ulag dugo nga ilang nasaksihan sa daghang katuigan.
Ingon sa gihubit sa unang artikulo, si Andre diriyot mamatay sa dihang ang usa ka bomba mikalas sa kinabuhi sa pipila niya ka higala. Kadto gibutang sa usa ka militanteng grupo. Sa ngadtongadto, iyang nakat-onan ug gipadapat ang tambag sa Bibliya nga ang usa kinahanglang ‘kinabubut-on nga magpasaylo.’ (Colosas 3:13) Sa ulahi, si Hafeni, nga namembro sa maong grupo pipila ka tuig human sa pagpamomba, nakakat-on sa pagpadapat sa mga prinsipyo sa Bibliya ug mihunong sa pagbuhat ug kapintasan. (Salmo 11:5) Karon, silang duha Saksi ni Jehova na ug kaubang nagtrabaho sa translation office sa mga Saksi sa usa ka nasod sa Africa.
Masaligon sa Usa ka Luwas nga Umaabot
Nakaplagan sa milyonmilyong tawo sa tibuok kalibotan nga ang pagtuon sa Bibliya nakatabang kanila sa pagbaton ug pagsalig sa usa ka luwas nga umaabot. Pananglitan, usa ka adlaw niana gipakita ni Andre sa iyang silingan ang saad sa Bibliya bahin sa matarong nga bag-ong kalibotan. (Isaias 2:4; 11:6-9; 65:17, 21-25; 2 Pedro 3:13) Sa kalit lang ang balay gilibotan sa mga sundalo nga nagdalag automatic nga mga armas ug gimandoan si Andre sa paggula aron sukitsukiton. Sa dihang ilang nahibaloan nga si Andre nagtudlog Bibliya nga gipabilhan pag-ayo sa iyang silingan, ang mga sundalo namiya.
Mao pay pagkahumag saysay ni Andre nga ang Diyos mangilabot sa kalihokan sa tawo, sama sa Iyang gibuhat sa adlaw ni Noe sa dihang “ang yuta napuno sa kapintasan.” (Genesis 6:11) Gilaglag sa Diyos ang maong kalibotan pinaagi sa lunop ug giluwas ang mahigugmaon-sa-kalinaw nga si Noe ug ang iyang pamilya. “Maingon kaniadto sa mga adlaw ni Noe,” si Jesus miingon, “mao man usab unya ang presensiya sa Anak sa tawo.”—Mateo 24:37-39.
Si Jesus, ang “Anak sa tawo,” maoy gipili sa Diyos nga magmando sa Iyang Gingharian, ug sa dili madugay siya manguna sa langitnong kasundalohan sa pagwagtang sa kapintasan sa yuta. (Lucas 4:43) Ingong langitnong Hari, si Jesus ‘makiangayon sa tanan, ug aduna unyay pakigdait.’ Iyang panalipdan ang iyang mga ginsakpan “batok sa linuog ug mapintas nga kamatayon.”—Salmo 72:7, 14, Contemporary English Version.
Unya, ang tanan nga nahigugma sa pagkamatarong ug nagpasakop niining langitnong Hari makakita sa yuta nga mahimong malinawon nga paraiso. (Lucas 23:42, 43) Ang Bibliya nagsaad: “Ang pakigdait ug hustisya magamando sa kabukiran ug kabungtoran.”—Salmo 72:1-3, CEV.
Dili ka ba malipayng mopuyo sa usa ka kalibotan nga gimandoan sa hari nga sama kaniya? Kana mao unyay kalibotan nga wala nay terorismo.
[Blurb sa panid 7]
Nasinati mismo ni Hafeni ug Joseba nga ang pagtulon-an sa Bibliya makapausab sa tawo
[Blurb sa panid 9]
‘Kon ang mga tawo mosunod sa mga prinsipyo ni Jesu-Kristo, ang kalibotan lahi unta kaayo. Dili kita magkinahanglag Security Council, ug walay terorismo, ug dili itugot ang kapintasan.’—Kanhing primer ministro sa Belgium
[Hulagway sa panid 8]
Ang pagsunod sa Bibliya nakatabang kang Hafeni ug Andre sa pagpakitag gugma sa usag usa