Gidisenyo ba Kini?

Bayanan sa Scaly-Foot Snail

● Kini maoy usa sa kinalig-onag bayanan nga nadiskobrehan diha sa kinaiyahan. Ang scaly-foot snail (matang sa hilahila), nga makita sa kinailadman sa Indian Ocean, makasugakod sa presyur sa tubig sa giladmong mga 2,400 metros. Dugang pa, kini makasugakod sa tubig nga acidic kaayo ug mag-usab-usab ang temperatura—lakip na sa init nga tubig nga mobugwak gikan sa mga buho sa ilalom sa dagat. Ang bayanan manalipod usab sa kinhason batok sa mga manunukob.

Hunahunaa: Ang bayanan sa scaly-foot snail adunay tulo ka lut-od. Ang una gilangkobag iron sulfide; ang ikaduha susama sa protinang sapaw nga makaplagan diha sa ubang matang sa hilahila; ug ang ikatulo gilangkobag minerales sa kalsiyum nga gitawag ug aragonite. Tungod niining tulo ka lut-od nga depensa, ang scaly-foot snail makasugakod sa dihang atakehon kini sa alimango, nga maningkamot sa pagdugmok sa bayanan niini gamit ang mga paak. Lagmit himoon kini sa alimango sulod sa pipila ka adlaw, apan dili gayod mabuak ang bayanan.

Gamit ang indenter, usa ka himan nga may diamante sa tumoy, nadiskobrehan sa mga tigdukiduki nga “ang gawas nga bahin sa bayanan gidisenyo nga moliki sa paagi nga mosuhop ug enerhiya,” nagtaho ang magasing Discover. “Ang mga liki maporma lamang diha sa lut-od nga may mga partikulo sa iron sulphide. Kining ‘gagmitoyng pagliki’ dili lamang mosuhop ug enerhiya, kondili tinoon usab niini nga dili maporma ang dagkong liki.” Sa laing bahin, kon atakehon ang snail, ang tungatunga nga lut-od mosuhop sa mekanikal nga enerhiya.

Gustong sundogon sa mga tigdukiduki ang estruktura sa bayanan sa scaly-foot snail aron makaimbentog lig-ong helmet, dili-madutlag-bala nga tsaliko, ug kasko sa barko ug ayroplano. “Magamit usab kini bisan diha sa mga tubo sa aseite sa Arctic nga kanunayng madumbolan sa dagkong tipak sa yelo,” matod sa Discover.

Unsay imong hunahuna? Ang bayanan ba sa scaly-foot snail sulagmang mitungha, o kini ba gidisenyo?

[Diagram sa panid 23]

(Alang sa aktuwal nga pagkahan-ay, tan-awa ang publikasyon)

Indenter

Gawas nga lut-od

Tungatunga nga lut-od

Sulod nga lut-od

[Picture Credit Line sa panid 23]

Courtesy Anders Warén